करंजेपूल सोमेश्वरनगर येथे एकत्र अभ्यास करणारे आठजण पोलिस,- अभ्यासाच्या टेबलावर लिहिलं एकच वाक्य  आयसाठी भरती व्हायचं ! कष्टकरी आईबापाची लेकरं खाकी वर्दीत

बारामती : सोमेश्वरनगर येथे वेगवेगळ्या गावातून आलेल्या कष्टकरी मजूर कुटुंबातील तब्बल आठ जणांनी एकाच वेळी एकत्रित येत व एकत्रित अभ्यास व सराव करीत खाकी वर्दी मिळवली, प्रत्येकाचे गाव वेगळे असले तरी प्रत्येकाचे ध्येय एकच होते 

“पोलिसात भरती व्हायचंय”

अनेक ठिकाणी अपयश आलं.अखेर पोलिस भरतीची तयारी सुरू केली तेव्हा टेबलवर एकच वाक्य लिहिलं…

‘आयसाठी पोलिस भरती व्हायचं…!’ 

आळस किंवा कंटाळा आला की ते वाक्य वाचायचो आणि रात्री एक-दोन वाजेपर्यत जागायची प्रेरणा मिळायची. आणि त्याच वाक्याने पोलिस भरती झालो” अशी भावना शैलेश तरडे याने व्यक्त केली. 

अक्षय कदम या यशवंतानेही ‘ अपयश येतं तेव्हा आईवडिलांशिवाय आपलं कुणी नसतं’ या शब्दात आपल्या भावना मांडल्या. 

करंजेपूल ता.बारामती येथे विवेकानंद अभ्यासिकेत पोलिस भरती होण्यासाठी विविध गावांतून आलेल्या कष्टकरी कुटुंबातील तब्बल आठ जणांची एकाच वेळी पुणे पोलिस कारागृह शिपाईपदी निवड झाली आहे.

२०२४ च्या पुणे कारागृह पोलिस भरतीत 

मोनेश हाके (खंडोबाचीवाडी ता. बारामती) याने १३५, विजय धायगुडे (मासाळवस्ती ता. बारामती) १३५, 

शैलेश तरडे (सासवड ता. पुरंदर) याने १३४, 

अक्षय कदम (मुरूम ता. बारामती) याने १३३, 

राहुल पवार (कोऱ्हाळे ता. बारामती) याने १३३, 

अभिषेक गार्डी (वडगाव निंबाळकर) याने १३३, 

सीमा कर्चे (नातेपुते जि. सोलापूर) हिने १२९ 

तर रेश्मा काळे (करमाळा जि. सोलापूर) हिने १२४ गुण मिळवत पात्रता यादीत स्थान मिळविले आहे.

यशवंतांचा सन्मान परीक्षाविधीन पोलिस उपअधिक्षक कल्पना पवार, मार्गदर्शक गणेश सावंत, नितीन ननावरे यांच्या हस्ते करण्यात आला. याप्रसंगी प्रत्येकाने मनोगतात आपल्या यशाचे श्रेय आईवडिलांना दिले. सततचे सण, उत्सव, समारंभ, डीजे, मोबाईल, भांडणतंटा यात न अडकता सातत्यपूर्ण अभ्यास केल्यास यश मिळते असे गमकही त्यांनी उलगडले. 

मोनेश हाके याने आठवडा बाजार करून कुटुंब चालविणाऱ्या वडिलांच्या स्वप्नाखातर यश मिळविले. विजय धायगुडे यास दोन पोलिस भरतीत अपयश आले होते. पण पुणे कारागृह पोलिसपदी यश आले असून चालकपदीही तो वेटींगवर आहे. सासवडच्या शैलेश तरडे या पित्याचे छत्र हरविलेल्या तरूणाने आईसाठी पोलिसाची वर्दी मिळविली. मुरूमच्या अक्षय कदम याला एकेक मित्र पोलिस बनत गेला तेव्हा रडू फुटले. अखेर त्यानेही वर्दी पटकावली. मजूर कुटुंबातील राहुल पवारचे यशही लक्षणीय ठरले. अभिषेक गार्डी हा अवघ्या एकोणिसाव्या वर्षी पहिल्याच प्रयत्नात पोलिस बनला आहे. सीमा कर्चे व रेश्मा काळे यांनी नातेवाईकांकडे राहून चिकाटीने अभ्यास करत खाकी वर्दी पटकावली आहे. सतीश करे, महेश काळे, दिनेश म्हस्के, अंकुश दोडमिसे, अक्षय मोटे, राजू बडदे यांचे त्यांना मार्गदर्शन लाभले.