सोमेश्वरनगरमध्ये राज्यस्तरीय आंतरमहाविद्यालयीन वक्तृत्व स्पर्धेचे आयोजन संस्थापक अध्यक्ष कै. मुगुटराव साहेबराव काकडे-देशमुख यांच्या स्मृतीदिनानिमित्त ५ जानेवारीला स्पर्धा

सोमेश्वरनगर बारामती: येथील मुगुटराव साहेबराव काकडे महाविद्यालयाचे संस्थापक अध्यक्ष कै. मुगुटराव साहेबराव काकडे-देशमुख यांच्या स्मृतिदिनानिमित्त सोमवार, दिनांक ०५ जानेवारी २०२६ रोजी ‘राज्यस्तरीय आंतरमहाविद्यालयीन वक्तृत्व स्पर्धेचे’ आयोजन करण्यात आले आहे. या स्पर्धेच्या माध्यमातून महाराष्ट्रातील महाविद्यालयीन विद्यार्थ्यांना आपले वक्तृत्व कौशल्य सिद्ध करण्याची मोठी संधी उपलब्ध झाली आहे.

महाविद्यालयाचे प्राचार्य डॉ. देविदास वायदंडे यांनी या उपक्रमाची माहिती दिली असून, जास्तीत जास्त विद्यार्थ्यांनी या स्पर्धेत सहभाग नोंदवावा, असे आवाहन केले आहे.

*स्पर्धेचे स्वरूप आणि पारितोषिके*

ही स्पर्धा राज्यस्तरीय असून, विजेत्या स्पर्धकांसाठी आकर्षक रोख बक्षिसे व चषक देण्यात येणार आहेत.

 * प्रथम क्रमांक: ११,००० रुपये व चषक

 * द्वितीय क्रमांक: ७,००० रुपये व चषक

 * तृतीय क्रमांक: ५,००० रुपये व चषक

 * उत्तेजनार्थ: ३,००० रुपये व चषक

*स्पर्धेचे वैविध्यपूर्ण विषय*

विद्यार्थ्यांच्या वैचारिक कक्षा रुंदावण्यासाठी चालू घडामोडी आणि प्रेरणादायी विषयांची निवड करण्यात आली आहे:

१. भारतीय संविधानाचा अमृत महोत्सव

२. राष्ट्रपुरुषांच्या चरित्रातून आम्ही काय शिकावे…?

३. भविष्यातील मोबाईल तंत्रज्ञान: स्मार्ट जीवनाची नवी दिशा

४. अभिजात मराठी भाषा: सद्यस्थिती व भवितव्य

५. सहकारातील परीस: सहकार महर्षी मुगुटराव काकडे-देशमुख

*स्पर्धेचे नियम व नोंदणी*

स्पर्धेसाठी प्रवेश विनामूल्य असून प्रत्येक महाविद्यालयाला दोन स्पर्धक पाठवता येतील. प्रत्येक स्पर्धकाला आपली मते मांडण्यासाठी एकूण ८ मिनिटांचा (६+२) वेळ दिला जाईल. स्पर्धेचे माध्यम मराठी असून, स्पर्धकांकडे प्राचार्यांच्या सही-शिक्क्याचे संमतीपत्र आणि ओळखपत्र असणे अनिवार्य आहे. स्पर्धा संपल्यानंतर त्याच दिवशी निकाल जाहीर करून पारितोषिक वितरण केले जाईल.

*वेळ आणि संपर्क*

सदर स्पर्धा ५ जानेवारी रोजी सकाळी १०.०० वाजता महाविद्यालयाच्या प्रांगणात सुरू होईल. अधिक माहिती व नाव नोंदणीसाठी समन्वयक प्रा. जे. एन. खोमणे आणि प्रा. ए. एस. शिंदे (९६५७२३११३३), डॉ. नारायण राजुरवार (९८२३८२४२४८) किंवा स्पर्धा समितीच्या सदस्यांशी संपर्क साधण्याचे आवाहन करण्यात आले आहे.