मोठी बातमी! सदानंद दाते १ जानेवारीपासून महाराष्ट्राचे नवे पोलीस महासंचालक? केंद्राकडून ‘घरवापसी’ला मंजुरी; रश्मी शुक्ला ३१ डिसेंबरला होणार निवृत्त

मुंबई:’राष्ट्रीय तपास यंत्रणे’चे (NIA) प्रमुख आणि २६/११ च्या हल्ल्यात पराक्रम गाजवणारे ज्येष्ठ आयपीएस अधिकारी सदानंद दाते (Sadanand Date) यांची महाराष्ट्राच्या पोलीस महासंचालक पदी (DGP) नियुक्ती होण्याचा मार्ग आता मोकळा झाला आहे. केंद्रीय कॅबिनेट समितीने त्यांना एनआयएच्या प्रमुख पदावरून मुक्त करून पुन्हा मूळ महाराष्ट्र केडरमध्ये परत पाठविण्याच्या (repatriation) प्रस्तावाला मंजुरी दिली आहे. त्यामुळे १ जानेवारी २०२६ पासून राज्याच्या पोलीस दलाची सूत्रे सदानंद दाते यांच्या हाती जाण्याची दाट शक्यता निर्माण झाली आहे.

​रश्मी शुक्ला ३१ डिसेंबरला निवृत्त: राज्याच्या विद्यमान पोलीस महासंचालक रश्मी शुक्ला यांना राज्य सरकारने दिलेला दोन वर्षांचा वाढीव कार्यकाळ ३१ डिसेंबर रोजी संपत आहे. त्यांच्या जागी नव्या प्रमुखाची निवड प्रक्रिया अंतिम टप्प्यात आहे.

​दाते यांचे नाव आघाडीवर: राज्य शासनाने केंद्रीय लोकसेवा आयोगाला (UPSC) सेवाज्येष्ठतेनुसार ७ वरिष्ठ अधिकाऱ्यांची यादी पाठवली आहे. यामध्ये १९९० च्या बॅचचे सदानंद दाते हे सर्वात वरिष्ठ अधिकारी आहेत. केंद्राने त्यांना कार्यमुक्त करण्यास मान्यता दिल्याने त्यांच्या नियुक्तीतील सर्वात मोठी तांत्रिक अडचण दूर झाली आहे.

​स्पर्धेत कोण?

यूपीएससीकडे पाठवलेल्या यादीत दाते यांच्यासह महासंचालक (विधी आणि तांत्रिक) संजय वर्मा, गृहरक्षक दलाचे समादेशक रितेश कुमार, एसीबीचे महासंचालक संजीवकुमार सिंघल, अर्चना त्यागी, संजीव कुमार आणि रेल्वेचे महासंचालक प्रशांत बुरडे यांचा समावेश आहे. यूपीएससी यातील तीन नावांची शिफारस करेल, ज्यातून एका नावावर राज्य शासन शिक्कामोर्तब करेल.

​’फोर्स वन’चे पहिले प्रमुख ते राज्याचे DGP, दाते यांचा प्रवास

​सदानंद दाते हे पोलीस दलात त्यांच्या कर्तव्यकठोर आणि अत्यंत प्रामाणिक प्रतिमेसाठी ओळखले जातात.

​२६/११ चे हिरो: मुंबईवरील २६/११ च्या दहशतवादी हल्ल्यात कामा हॉस्पिटलमध्ये अतिरेक्यांशी लढताना त्यांनी जीवाची पर्वा केली नाही. या चकमकीत ते जखमी झाले होते. त्यांच्या या शौर्यासाठी त्यांना राष्ट्रपती पोलीस पदकाने गौरवण्यात आले आहे.

​फोर्स वन आणि एटीसी: दहशतवादाचा बिमोड करण्यासाठी राज्याने स्थापन केलेल्या ‘फोर्स वन’ (Force One) या विशेष पथकाचे ते पहिले प्रमुख होते. तसेच मुंबई पोलीस दलात ‘दहशतवादविरोधी कक्ष’ (Anti-Terrorism Cell) स्थापन करण्याचे श्रेयही त्यांनाच जाते.

​अष्टपैलू अनुभव: दाते यांनी मुंबई गुन्हे शाखा आणि कायदा व सुव्यवस्था विभागाचे सहआयुक्तपद, राज्याचे एटीएस प्रमुख, मीरा-भाईंदर-वसई-विरारचे पोलीस आयुक्तपद भूषविले आहे. याशिवाय केंद्रात सीबीआय (CBI) च्या आर्थिक गुन्हे शाखेत आणि छत्तीसगडमध्ये नक्षलविरोधी अभियानात (CRPF) त्यांनी महत्त्वपूर्ण कामगिरी बजावली आहे.

​सदानंद दाते हे डिसेंबर २०२६ मध्ये निवृत्त होणार आहेत. मात्र, सर्वोच्च न्यायालयाच्या निर्देशानुसार पोलीस महासंचालक पदावर नियुक्ती झाल्यास त्यांना किमान दोन वर्षांचा निश्चित कार्यकाळ मिळण्याची शक्यता आहे.