अजितदादांच्या बालेकिल्ल्यात शिंदेंच्या शिवसेनेला ‘नो एन्ट्री’? बारामतीच्या उमेदवार यादीतून मित्रपक्ष गायब! महायुतीचा धर्म फक्त भाजपसाठी? 

बारामती : राज्याचे उपमुख्यमंत्री अजित पवार यांचा बालेकिल्ला म्हणून ओळखल्या जाणाऱ्या बारामतीत पुन्हा एकदा राजकीय घडामोडींना वेग आला आहे. आगामी जिल्हा परिषद आणि पंचायत समिती निवडणुकांसाठी राष्ट्रवादी काँग्रेस (अजित पवार गट) ची संभाव्य उमेदवारी यादी जाहीर झाल्याचे वृत्त आहे. मात्र, या यादीने महायुतीतील ‘सबका साथ’ या नाऱ्यालाच हरताळ फासल्याचे चित्र निर्माण झाले आहे. अजितदादांनी आपल्या यादीत भाजपला सामावून घेतले असले तरी, राज्याच्या सत्तेत खांद्याला खांदा लावून उभ्या असलेल्या मुख्यमंत्री एकनाथ शिंदे यांच्या शिवसेनेला मात्र बारामतीच्या वेशीवरच रोखल्याचे स्पष्ट झाले आहे.

मागील काही दिवसांपासून अजित पवार स्वतः बारामतीत ठाण मांडून होते. स्थानिक पदाधिकारी, इच्छुक उमेदवार आणि कार्यकर्त्यांशी त्यांनी मॅराथॉन बैठका घेतल्या. या खलबतांनंतर जी संभाव्य यादी समोर येत आहे, त्यामध्ये अजित पवारांनी अतिशय सावध आणि सोयीची रणनीती आखल्याचे दिसते. या उमेदवार यादीत राष्ट्रवादीसोबतच भाजपच्या काही उमेदवारांना स्थान देण्यात आले आहे. मात्र, महायुतीतील तिसरा आणि महत्त्वाचा भिडू असलेल्या शिवसेनेचा (शिंदे गट) या प्रक्रियेत कोणताही विचार करण्यात आलेला नाही.

बारामतीत महायुती म्हणून भाजपला सन्मानाने वागणूक मिळते, त्यांना सत्तेत वाटा मिळतो, मग त्याच महायुतीचा भाग असलेल्या शिवसेनेला सापत्न वागणूक का? असा संतप्त सवाल आता स्थानिक शिवसैनिकांमधून उपस्थित होत आहे. पंचायत समिती आणि जिल्हा परिषदेच्या या संभाव्य यादीत शिवसेनेला साधा विचारलेही गेले नसल्याने, “बारामतीत दादा शिवसेनेला जुमानतच नाहीत,” अशी भावना कार्यकर्त्यांमध्ये बळावली आहे. वरिष्ठांच्या पातळीवर युती असली तरी, स्थानिक पातळीवर मात्र अजित पवार शिवसेनेला महत्त्व देत नसल्याचा सूर उमटत आहे.

अजित पवारांनी राष्ट्रवादी (शरदचंद्र पवार गट) आणि भाजपला सामावून घेत एक वेगळेच राजकीय गणित मांडल्याचे बोलले जात आहे. मात्र, यात उपमुख्यमंत्री एकनाथ शिंदे यांच्या पक्षाचा विचार न झाल्याने बारामती तालुक्यात महायुतीचे भवितव्य काय असेल, यावर प्रश्नचिन्ह निर्माण झाले आहे. भाजपला सोबत घ्यायचे, पण शिवसेनेला दूर ठेवायचे, ही रणनीती भविष्यात महायुतीत दुफळी निर्माण करणारी ठरू शकते.

एकंदरीत, बारामतीत “दादा म्हणतील तीच पूर्व दिशा” हे पुन्हा एकदा अधोरेखित झाले असून, शिवसेनेला जाणीवपूर्वक बाजूला सारले जात असल्याच्या चर्चेने आता जोर धरला आहे.

“स्थानिक राजकारण काहीही असो, आम्ही लढणारच”; बारामतीत शिंदे गटाचा अजितदादांना थेट इशारा

बारामतीत जिल्हा परिषद आणि पंचायत समिती निवडणुकांवरून महायुतीत मोठी ठिणगी पडल्याचे चित्र आहे. राष्ट्रवादी काँग्रेस (अजित पवार गट) ने जाहीर केलेल्या संभाव्य यादीत भाजपला सामावून घेत शिवसेनेला (शिंदे गट) वाऱ्यावर सोडल्याचे समोर आले आहे. मात्र, आता या कृतीला शिवसेनेने जशास तसे उत्तर देण्याची तयारी दर्शवली असून,

 “स्थानिक पातळीवर काहीही असो, बारामतीत शिवसेना ताकदीने लढणारच,” अशी आक्रमक भूमिका स्थानिक व वरिष्ठ नेत्यांनी घेतल्याने राजकारण तापले आहे.

सेनेला डावलणे पडणार महागात?

मागील काही दिवसांत अजित पवारांनी बारामतीत तळ ठोकून स्थानिक समीकरणांची जुळवाजुळव केली. यात त्यांनी भाजपला सोबत घेतले, परंतु महायुतीतील महत्त्वाचे सहकारी असलेल्या एकनाथ शिंदे यांच्या शिवसेनेला विचारातही घेतले नाही, असा सूर कार्यकर्त्यांमध्ये आहे. ‘बारामतीत दादा शिवसेनेला जुमानत नाहीत,’ या चर्चेने जोर धरला असतानाच, आता शिवसेनेच्या स्थानिक व वरिष्ठ नेत्यांनी माघार न घेता मैदानात उतरण्याचा निर्णय घेतला आहे.

​आज उमेदवारी अर्जांचा धडाका

शिवसेनेला गृहीत धरण्याच्या प्रकाराला न जुमानता, शिंदे गटाने बारामतीत स्वतंत्र अस्तित्व सिद्ध करण्यासाठी कंबर कसली आहे. वरिष्ठ नेत्यांच्या आदेशानुसार, आज (ता. २१) शिवसेनेकडून उमेदवारी अर्ज दाखल करण्यात येत आहेत. त्यामुळे बारामतीत अजित पवारांच्या राष्ट्रवादीसमोर आता खुद्द सत्तेतील भागीदार असलेल्या शिवसेनेचेच आव्हान उभे राहणार असल्याचे स्पष्ट झाले आहे.

​उद्या चित्र स्पष्ट होणार

एकीकडे अजित पवारांनी भाजपला सोबत घेऊन तयार केलेली रणनीती आणि दुसरीकडे शिवसेनेचा “एकला चलो रे”चा नारा, यामुळे बारामतीतील महायुतीचे समीकरण पूर्णपणे बिघडल्याचे दिसत आहे. आज अर्ज दाखल करण्याची प्रक्रिया पार पडल्यानंतर आणि उद्या (ता. २२) छाननी व माघारीची प्रक्रिया समजल्यानंतर लढतींचे खरे चित्र स्पष्ट होईल.

​मात्र, अजित पवारांनी स्थानिक पातळीवर शिवसेनेला दिलेल्या दुय्यम वागणुकीमुळे शिवसैनिक पेटून उठले असून, ही निवडणूक आता केवळ सत्तेची नसून अस्तित्वाची लढाई झाल्याचे बोलले जात आहे.