वक्तृत्व स्पर्धेतील सहभागातून विद्यार्थ्यांच्या व्यक्तिमत्त्व विकासाला चालना मिळते: युगेंद्र पवार

वडगाव निंबाळकर : स्पर्धेच्या आजच्या युगात विद्यार्थ्यांचा सर्वांगीण विकास होणे अत्यंत गरजेचे आहे. वक्तृत्व स्पर्धांमध्ये सातत्याने सहभागी झाल्यामुळे विद्यार्थ्यांचा केवळ बोलण्यातील आत्मविश्वासच वाढत नाही, तर आपले विचार प्रभावीपणे आणि स्पष्टपणे मांडण्याची क्षमताही विकसित होते. याच माध्यमातून विद्यार्थ्यांच्या व्यक्तिमत्त्वाची योग्य जडणघडण होण्यास मोठी मदत होते, असे ठाम मत विद्या प्रतिष्ठान संस्थेचे खजिनदार युगेंद्र पवार यांनी व्यक्त केले.

कोऱ्हाळे बुद्रुक (ता. बारामती) येथील नामदेवराव पाटील सार्वजनिक वाचनालयाच्या वतीने कै. वसंतराव पवार यांच्या पुण्यस्मृतिनिमित्त नुकतेच एका भव्य जिल्हास्तरीय वक्तृत्व स्पर्धेचे आयोजन करण्यात आले होते. या स्पर्धेचे शानदार उद्घाटन विद्या प्रतिष्ठानचे खजिनदार युगेंद्र पवार यांच्या शुभहस्ते संपन्न झाले. या उद्घाटन प्रसंगी उपस्थित विद्यार्थी आणि स्पर्धकांना मार्गदर्शन करताना ते बोलत होते.

आपल्या मनोगतात युगेंद्र पवार यांनी वाचनालयाच्या कार्याचे विशेष कौतुक केले. ते म्हणाले की, ग्रामीण भागातील विद्यार्थ्यांमध्ये प्रचंड गुणवत्ता दडलेली असते, मात्र त्यांना योग्य व्यासपीठ मिळणे आवश्यक असते. नामदेवराव पाटील सार्वजनिक वाचनालयाच्या माध्यमातून ग्रामीण भागातील विद्यार्थ्यांना घडविण्याचे आणि त्यांना हक्काचे व्यासपीठ मिळवून देण्याचे अतिशय मोलाचे काम सतीश मामा खोमणे यांनी गेल्या अनेक वर्षांपासून अविरतपणे सुरू ठेवले आहे, ही खरोखरच सर्वांसाठी अभिमानाची बाब आहे.
वाचनालयाच्या वतीने वर्षभर विविध विधायक व शैक्षणिक उपक्रम राबविले जातात. त्यापैकी गेल्या २३ वर्षांपासून सातत्याने सुरू असलेली ही जिल्हास्तरीय वक्तृत्व स्पर्धा हा एक अत्यंत उल्लेखनीय आणि प्रेरणादायी उपक्रम आहे. या स्पर्धेच्या माध्यमातून आजवर अनेक विद्यार्थी घडले आहेत आणि त्यांनी विविध क्षेत्रात आपले नाव कमावले आहे. हा स्तुत्य उपक्रम भविष्यातही अशाच उत्तम पद्धतीने सुरू राहण्यासाठी आपल्याकडून आवश्यक ते सर्वतोपरी सहकार्य दिले जाईल, अशी ग्वाही देखील त्यांनी यावेळी दिली. तसेच स्पर्धेत सहभागी झालेल्या सर्व नवोदित स्पर्धकांना त्यांनी पुढील वाटचालीस भरघोस शुभेच्छा दिल्या.

या महत्त्वपूर्ण कार्यक्रमास जिल्हा परिषदेच्या सदस्या रोहिणी कदम-ढोले, जिल्हा परिषदेचे माजी अध्यक्ष व वाचनालयाचे अध्यक्ष सतीश मामा खोमणे, राष्ट्रवादी काँग्रेस शरदचंद्र पवार पक्षाचे तालुकाध्यक्ष राजेंद्र बापू जगताप या प्रमुख पाहुण्यांसह अनेक मान्यवर उपस्थित होते. त्याचबरोबर प्रविण भोसले, प्रदीप गिते, वसंतदादा जगदाळे, हणुमंत चांदगुडे, मारुती माळशिकारे, हणुमंत जगदाळे, अक्षय जगताप, प्रविण मोरे, दीपक खलाटे, प्रदीप शेडकर, सागर मदन, तानाजी पानसरे, तानाजी पवार, पोपट भगत, छाया पवार, डी. एम. खोमणे, डी. के. आबा खोमणे, शरद खोमणे, नानाभाऊ माळशिकारे, सचिन खोमणे, राहुल भगत, केतन भोसले, हर्षद होळकर, निलेश गायकवाड आदी मान्यवर, ग्रामस्थ व विद्यार्थी याप्रसंगी मोठ्या संख्येने उपस्थित होते.

या कार्यक्रमाचे प्रास्ताविक दत्तात्रेय भोसले यांनी अतिशय नेटकेपणाने केले. वाचनालयाच्या वतीने राबविण्यात येणाऱ्या विविध सामाजिक व शैक्षणिक उपक्रमांची सविस्तर माहिती रघुनाथ शिर्के यांनी उपस्थितांना दिली. कार्यक्रमाचे सुरेख सूत्रसंचालन शैलजा साळवे यांनी केले, तर ग्रंथपाल अनिल चव्हाण यांनी सर्व उपस्थित मान्यवर आणि विद्यार्थ्यांचे आभार मानून कार्यक्रमाची सांगता केली.