वडगाव निंबाळकर पोलिसांची धडाकेबाज कारवाई: जबरी चोरी करणाऱ्या सराईत टोळीचा पर्दाफाश, ११.८९ लाखांचा मुद्देमाल जप्त.पुणे आणि सातारा जिल्ह्यातील तब्बल १० जबरी चोरीचे गुन्हे उघडकीस

वडगाव निंबाळकर :
शेतकरी महिलेवर हल्ला करून दागिन्यांची जबरी चोरी करणाऱ्या आंतरजिल्हा टोळीच्या वडगाव निंबाळकर पोलिसांनी मुसक्या आवळल्या आहेत. या कारवाईत पोलिसांनी ४ आरोपींना अटक केली असून, त्यांच्याकडून तब्बल ११ लाख ८९ हजार रुपयांचे सोन्याचे दागिने आणि २ मोटारसायकली जप्त केल्या आहेत. या कारवाईमुळे पुणे आणि सातारा जिल्ह्यातील तब्बल १० जबरी चोरीचे गुन्हे उघडकीस आले आहेत.

कानाडवाडी (ता. बारामती) हद्दीत वाकी रस्त्यावरील शेतात काम करणाऱ्या स्वाती हनुमंत टकले यांच्या गळ्यावर वार करून अज्ञात तीन दुचाकीस्वार चोरट्यांनी ६ ग्रॅम वजनाचे सोन्याचे मणी व डोरले जबरीने हिसकावून नेले होते. याप्रकरणी वडगाव निंबाळकर पोलीस ठाण्यात गुन्हा दाखल करण्यात आला होता.

गुन्ह्याचे गांभीर्य ओळखून पोलिसांनी गोपनीय माहिती, सीसीटीव्ही फुटेज आणि तांत्रिक विश्लेषणाच्या आधारे तपास चक्र वेगवान केले. संशयावरून राज शिंदे आणि सनी भोसले यांना ताब्यात घेऊन खाक्या दाखवताच त्यांनी गुन्ह्याची कबुली दिली. चोरीचे दागिने विकत घेणाऱ्या बापुराव चोपडे आणि सराफ प्रवीण वेदपाठक यांनाही पोलिसांनी अटक केली.

अटक आरोपी:

• राज मिथुन शिंदे (रा. राजाळे, ता. फलटण, जि. सातारा)
• सनी रमण भोसले (रा. सांगवी, ता. फलटण, जि. सातारा)
• बापुराव भानुदास चोपडे (रा. राजाळे, ता. फलटण, जि. सातारा)
• प्रवीण ज्ञानेश्वर वेदपाठक (रा. मारवाडपेठ, ता. फलटण, जि. सातारा)
(टोळीतील पवन सॅन्डल काळे हा आरोपी सध्या फरार असून पोलीस त्याचा शोध घेत आहेत.)

पोलीस उपविभागीय अधिकारी बारामती उपविभाग चैतन्य कदम यांची पत्रकार परिषद 

आरोपींकडे सखोल चौकशी केली असता त्यांनी पुणे व सातारा जिल्ह्यातील विविध पोलीस ठाण्यांच्या हद्दीत जबरी चोऱ्या केल्याचे उघड झाले. यामध्ये वडगाव निंबाळकर, जेजुरी (२ गुन्हे), वालचंदनगर, यवत, बारामती शहर, फलटण शहर (२ गुन्हे) आणि लोणंद (२ गुन्हे) अशा एकूण १० गुन्ह्यांचा समावेश आहे.
सदरची यशस्वी कामगिरी पुणे ग्रामीणचे पोलीस अधीक्षक संदीप सिंह गिल्ल, अपर पोलीस अधीक्षक गणेश बिरादार, उपविभागीय पोलीस अधिकारी चैतन्य कदम यांच्या मार्गदर्शनाखाली वडगाव निंबाळकर ठाण्याचे सपोनि जीवन मोहिते, पोलीस हवालदार पोपट नाळे, अनिल खेडकर, आबा जाधव, नरेंद्र यादव, धनंजय भोसले, हृदयनाथ देवकर, सुरज धोत्रे आणि भाऊसाहेब मारकड यांच्या पथकाने केली. पुढील तपास सपोनि जीवन मोहिते करत आहेत.