वाईन्स शेजारील ‘ओपन बार’वर बारामती तालुका पोलिसांची धडक कारवाई; चार जणांवर खटले दाखल

बारामती (दि. 28): बारामती एमआयडीसी रोडवर वैभव वाईन्सच्या शेजारी रस्त्याच्या कडेला अनधिकृतपणे सुरू असलेल्या ‘ओपन बार’वर बारामती तालुका पोलिसांनी धडक कारवाई केली आहे. नागरिकांच्या वाढत्या तक्रारींची दखल घेत पोलिसांनी ही कारवाई केली असून, यामध्ये चार जणांवर खटले दाखल करण्यात आले आहेत. तसेच, वैभव वाईन्सला देखील याप्रकरणी लेखी नोटीस बजावण्यात आली आहे.

​पोलिसांनी दिलेल्या माहितीनुसार, सायंकाळी 7 ते रात्री 9.30 च्या सुमारास पोलिसांनी या परिसरात पेट्रोलिंग करताना ही कारवाई केली. संतोष शहा (गुड्डू पान शॉप) आणि अशोक लोंढे (मालिक टी टपरी) हे दोघे वैभव वाईन्समधून मद्य खरेदी करून बाहेर येणाऱ्या ग्राहकांना रस्त्याच्या कडेलाच ग्लास, पाणी आणि इतर साहित्य पुरवत असल्याचे निदर्शनास आले. उघडपणे मद्यपानास प्रोत्साहन देऊन त्यांनी एक प्रकारचा ‘ओपन बार’च थाटला होता. यामुळे परिसरात मद्यपींचा वावर वाढला होता आणि सर्वसामान्य नागरिकांना नाहक त्रास सहन करावा लागत होता.

​याच कारवाईदरम्यान, आशिष वाल्मिकी (अंडा भुर्जी टपरी) आणि नौशाद मुलानी (नूर चिकन सेंटर) हे कोणतीही परवानगी न घेता विनापरवाना व्यवसाय करत असल्याचे उघड झाले. तसेच, या व्यावसायिकांकडून कचरा थेट रस्त्यावर टाकला जात असल्याने परिसरात मोठी अस्वच्छता पसरली होती.

​नागरिकांच्या सततच्या तक्रारी आणि प्रत्यक्ष पाहणीनंतर पोलिसांनी या चौघांविरुद्ध मुंबई पोलीस कायदा कलम 33 (W) आणि 115 अन्वये खटले दाखल केले आहेत. कारवाईत संबंधितांचे साहित्य आणि वाहने जप्त करून पोलीस ठाण्यात जमा करण्यात आली आहेत व हे प्रकरण न्यायालयात दाखल करण्यात आले आहे. पोलिसांच्या या कारवाईमुळे एमआयडीसी परिसरातील बेकायदा धंदे करणाऱ्यांचे धाबे दणाणले आहेत.

ही यशस्वी कारवाई पोलीस निरीक्षक चंद्रशेखर यादव आणि पोलीस उपनिरीक्षक अमोल कदम यांच्या मार्गदर्शनाखाली पोलीस अंमलदार भारत खारतोडे, नितीन ढवण, शशिकांत दळवी, निलेश वाकळे, हनुमंत पाटील, दादा दराडे, ओंकार भोसले आणि संतोष कांबळे यांच्या पथकाने केली.