बारामती: बारामती विधानसभा मतदारसंघाच्या पोटनिवडणुकीची अधिसूचना जारी झाल्यानंतर आता राजकीय हालचालींना वेग आला आहे. ही निवडणूक कोणत्याही परिस्थितीत बिनविरोध होऊ देणार नाही, असा आक्रमक पवित्रा ओबीसी आंदोलक लक्ष्मण हाके यांनी घेतला आहे.
लक्ष्मण हाके यांनी मांडलेले महत्त्वाचे मुद्दे खालीलप्रमाणे
लोकशाहीमध्ये निवडणूक बिनविरोध करणे हे लोकशाही विरोधी कृत्य असल्याचे लक्ष्मण हाके यांनी स्पष्ट केले.
अजित दादांच्या अपघाती निधनामुळे बारामतीकरांच्या मनात दुःख आणि सहानुभूती आहे, परंतु भावनेच्या आहारी जाऊन निवडणूक बिनविरोध होऊ नये अशी त्यांची ठाम भूमिका आहे.
जर राज्यकर्ते आणि विरोधकांना खरोखरच पवार कुटुंबाबद्दल एवढी सहानुभूती आणि वेदना असेल, तर त्यांनी सुनेत्रा पवार यांना थेट विधान परिषदेवर बिनविरोध पाठवावे, असा पर्याय त्यांनी सुचवला.
सुनेत्रा पवार यांना विधान परिषदेवर पाठवून, सत्ताधाऱ्यांमध्ये धमक असेल तर त्यांनी बारामती विधानसभेसाठी घरातील सोडून दुसरा कोणताही उमेदवार उभा करून दाखवावा, आम्ही त्याला पराभूत करून दाखवू, असे थेट आव्हान हाके यांनी दिले आहे.
स्थानिक प्रश्नांवर लढणार निवडणूक: ही निवडणूक केवळ राजकीय नसून ओबीसी, शोषित, वंचित, शेतकरी आणि बारामतीतील भ्रष्टाचाराच्या प्रश्नांवर लढवली जाईल. येत्या काही दिवसांत गावागावांत जाऊन जनतेच्या भावना जाणून घेतल्यानंतर उमेदवार निश्चित केला जाईल. हा उमेदवार स्वतः लक्ष्मण हाके किंवा स्थानिक पातळीवरील एखादा सामान्य कार्यकर्ता असू शकतो.
अजित पवारांच्या निधनाबाबत ज्येष्ठ नेते शरद पवार यांनी याला अपघात म्हटले आहे, तर रोहित पवार हा घातपात असल्याचा दावा करत आहेत. या परस्परविरोधी भूमिकेमुळे सामान्य जनता संभ्रमात पडली असून, केवळ राजकीय स्पेस शोधण्यासाठी हा संभ्रम निर्माण केला जात असल्याची बोचरी टीकाही हाके यांनी केली.
जनसामान्यांचे प्रश्न सोडवण्यासाठी आणि लोकशाहीचा उत्सव अबाधित ठेवण्यासाठी सत्ताधाऱ्यांच्या धोरणांविरोधात बारामती विधानसभेची निवडणूक पूर्ण ताकदीने लढवली जाईल, असा विश्वास लक्ष्मण हाके यांनी व्यक्त केला आहे.
बातमी बद्दल आपला अभिप्राय नोंदवा
बातमी शेअर करण्यासाठी येथे क्लिक करा
