वडगाव निंबाळकर येथे श्री छत्रपती जाणता राजा युवा प्रतिष्ठानच्या वतीने आयोजित रक्तदान शिबिराला उत्स्फूर्त प्रतिसाद; २२० दात्यांनी केले रक्तदान

वडगाव निंबाळकर : शिवजयंतीचे औचित्य साधून आणि दिवंगत नेते अजितदादा पवार यांच्या स्मृतीस विनम्र अभिवादन करण्यासाठी वडगाव निंबाळकर (ता. बारामती) येथे भव्य ‘महा रक्तदान शिबिराचे’ आयोजन करण्यात आले होते. श्री छत्रपती जाणता राजा युवा प्रतिष्ठानच्या वतीने आयोजित या शिबिरात तब्बल २२० रक्तदात्यांनी सहभाग नोंदवत सामाजिक बांधिलकी जपली.

नवनिर्वाचित पंचायत समिती सदस्य जितेंद्र पवार यांच्या मार्गदर्शनाखाली हे शिबिर पार पडले. स्थानिक प्राथमिक आरोग्य उपकेंद्र इमारतीसमोर झालेल्या या उपक्रमाची सुरुवात दिवंगत अजितदादा पवार यांच्या प्रतिमेस पुष्पहार अर्पण करून व श्रद्धांजली वाहून करण्यात आली. विशेष म्हणजे, या शिबिराचे हे २० वे वर्ष होते.

या शिबिराचे वैशिष्ट्य म्हणजे परिसरातील तब्बल ४५ तरुण मंडळांनी एकत्र येत या कार्याला हातभार लावला. केवळ युवकच नव्हे, तर गावातील महिलांनीही यात हिरहिरीने भाग घेतला. उमा निंबाळकर, वैष्णवी अचपळ, अंकिता गायकवाड, वैशाली जाधव, ज्ञानेश्वरी लोणकर, विजया निंबाळकर, राणी साळवे, संगीता दरेकर या महिलांसह काही दिव्यांग व्यक्तींनीही रक्तदान करून समाजासमोर आदर्श उभा केला.

या प्रसंगी जिल्हा परिषद सदस्या रोहिणी कदम-ढोले, राष्ट्रवादीचे जिल्हाध्यक्ष संभाजी होळकर, सोमेश्वरचे संचालक शिवाजी राजेनिंबाळकर, सुनील भगत, अविनाश शिंदे, अनिलकुमार शहा, नीलेश अगम, राहुल दरेकर, सरपंच सुनील ढोले, प्रेमलता रांगोळे यांच्यासह विविध क्षेत्रांतील मान्यवर आणि ग्रामस्थ मोठ्या संख्येने उपस्थित होते.

कार्यक्रमाच्या यशस्वीतेसाठी श्री छत्रपती जाणता राजा युवा प्रतिष्ठानचे संस्थापक अध्यक्ष जितेंद्र पवार, सचिव संतोष भोसले आणि सर्व सदस्य व संयोजकांनी विशेष परिश्रम घेतले. ‘करूया रक्तदान, वाचवूया प्राण’ हा संदेश या निमित्ताने खऱ्या अर्थाने सार्थ ठरला.