वडगाव निंबाळकर: शाळा आणि महाविद्यालयांच्या परिसरात तंबाखूजन्य पदार्थांची विक्री करणाऱ्यांवर वडगाव निंबाळकर पोलिसांनी धडक कारवाई केली. शैक्षणिक संस्थांच्या १०० यार्ड परिसरात तंबाखूजन्य पदार्थांची विक्री होत असल्याच्या पार्श्वभूमीवर आज, ३ सप्टेंबर २०२६ रोजी दुपारी ४ ते ६ या वेळेत पोलिसांनी एक विशेष तपासणी मोहीम राबवली. या मोहिमेत नियमांचे उल्लंघन करणाऱ्या चार जणांवर कायदेशीर कारवाई करण्यात आली आहे.
मिळालेल्या माहितीनुसार, विद्यार्थ्यांमध्ये तंबाखू सेवनाबाबत जनजागृती व्हावी आणि त्यांना या व्यसनापासून दूर ठेवता यावे, या उद्देशाने वडगाव निंबाळकर पोलीस स्टेशनच्या पथकाने ही कारवाई केली. या पथकाने परिसरातील टपऱ्या, पानटपऱ्या, किराणा दुकाने आणि इतर विक्री केंद्रांची अचानक तपासणी केली. यावेळी शैक्षणिक संस्थांच्या १०० यार्ड परिसरात तंबाखूजन्य पदार्थांची विक्री करणाऱ्या टपरी चालक आणि दुकानदारांविरुद्ध सिगारेट व इतर तंबाखूजन्य पदार्थ (जाहिरातीस प्रतिबंध व व्यापार, वाणिज्य, उत्पादन, पुरवठा व वितरण यांचे विनियमन) अधिनियम, २००३ (COTPA Act) मधील तरतुदींनुसार चार ठिकाणी गुन्हे दाखल करण्यात आले आहेत.
या कारवाईदरम्यान पोलिसांच्या पथकाने संबंधित विक्रेत्यांकडून तंबाखूजन्य पदार्थ जप्त केले असून नियमांचे उल्लंघन करणाऱ्यांवर दंडात्मक कारवाई करण्यात आली आहे. शाळा व महाविद्यालय परिसरात तंबाखूजन्य पदार्थांची विक्री केल्यास विद्यार्थ्यांच्या आरोग्यावर विपरीत परिणाम होण्याची शक्यता असल्याने अशा प्रकारच्या विक्रीस कायद्याने सक्त बंदी घालण्यात आली असल्याचे पोलिसांनी स्पष्ट केले.
तसेच, अल्पवयीन मुलांना तंबाखूजन्य पदार्थ विक्री करणे किंवा उपलब्ध करून देणे हा कायद्याने दंडनीय गुन्हा आहे. यापुढेही शाळा आणि महाविद्यालयांच्या परिसरात अशीच धडक कारवाई आणि विशेष मोहिमा सातत्याने सुरू राहतील, तसेच नियमांचे उल्लंघन करणाऱ्यांवर कठोर कायदेशीर कारवाई केली जाईल, असा इशारा पोलीस प्रशासनाने दिला आहे.
नागरिक, पालक आणि शाळा व्यवस्थापनानेही आपल्या परिसरातील अशा बेकायदेशीर विक्रीला आळा घालण्यासाठी आणि आपला परिसर तंबाखूमुक्त ठेवण्यासाठी पोलीस प्रशासनास सहकार्य करावे, असे आवाहन वडगाव निंबाळकर पोलिसांकडून करण्यात आले आहे.
बातमी बद्दल आपला अभिप्राय नोंदवा
बातमी शेअर करण्यासाठी येथे क्लिक करा
