स्थानिक गुन्हे शाखा व वडगाव निंबाळकर पोलिसांचे मोठे यश; सराईत गुन्हेगाराला अटक करून लाखो रुपयांचा मुद्देमाल केला हस्तगत.

बारामती : पुणे जिल्ह्यातील वडगाव निंबाळकर व स्थानिक गुन्हे अन्वेषण शाखा, पुणे ग्रामीण यांच्या पोलिसांनी संयुक्त कारवाई करत जबरी चोरी करणाऱ्या एका टोळीचा पर्दाफाश केला आहे. या कारवाईत पोलिसांनी २ लाख ३० हजार रुपये किमतीचा सोन्याचा मुद्देमाल जप्त केला आहे.

बारामती तालुक्यातील मौजे लाटे गावच्या हद्दीत घडलेल्या एका जबरी चोरीच्या घटनेबाबत वडगाव निंबाळकर पोलीस स्टेशनमध्ये गुन्हा (गु.र.नं. १८०/२०२६ बी.एन.एस. कलम ३११, ३३१(६), ३(५)) दाखल करण्यात आला होता. गुन्ह्याचे गांभीर्य ओळखून वरिष्ठ अधिकाऱ्यांच्या आदेशानुसार सहाय्यक पोलीस निरीक्षक जीवन मोहिते व पोलीस उपनिरीक्षक अझर मुलाणी यांच्यासह एका विशेष पोलीस पथकाची नेमणूक करण्यात आली होती. या पथकाने घटनास्थळावरील सीसीटीव्ही फुटेज तसेच तांत्रिक व गोपनीय माहितीच्या आधारे तपासाला सुरुवात केली. तपासादरम्यान मिळालेल्या माहितीनुसार पोलिसांनी मौजे कांबळेश्वर येथे शोध मोहीम राबवून संशयितांच्या घरांची झडती घेतली आणि घरफोडीसाठी वापरले जाणारे साहित्य जप्त केले. या तपासातून पोलिसांनी गुन्ह्यातील मुख्य आरोपी शक्तिमान अविनाश उर्फ हनम्या काळे (वय २५, रा. माळेगाव खुर्द, सध्या रा. कांबळेश्वर, ता. बारामती) याला अटक केली आहे.

अटक करण्यात आलेल्या या आरोपीकडून पोलिसांनी चोरीला गेलेला मुद्देमाल हस्तगत केला आहे. यामध्ये १ लाख ८० हजार रुपये किमतीचे १८ ग्रॅम वजनाचे सोन्याचे मनी असलेले गंठण आणि ५० हजार रुपये किमतीचे ५ ग्रॅम वजनाचे सोन्याचे टॉप्स कर्णफुले असा एकूण २ लाख ३० हजार रुपयांचा मुद्देमाल जप्त करण्यात आला आहे. पोलिसांच्या चौकशीत असे उघड झाले आहे की, सदर गुन्हा या आरोपीने एका विधी संघर्षग्रस्त बालकाच्या आणि इतर दोन फरारी साथीदारांच्या मदतीने केला होता. हे फरार आरोपी सराईत गुन्हेगार असून पोलीस त्यांचा शोध घेत आहेत. तसेच या कारवाईमुळे वडगाव निंबाळकर पोलीस स्टेशनमधील गु.र.नं. १८८/२०२६ (बी.एन.एस. कलम ३३१(४), ३०५, ६२) हा आणखी एक गुन्हा उघडकीस आला आहे.

ही कारवाई पुणे ग्रामीणचे पोलीस अधीक्षक संदीपसिंह गिल, अपर पोलीस अधीक्षक गणेश बिरादार, उपविभागीय पोलीस अधिकारी चैतन्य कदम आणि स्थानिक गुन्हे शाखेचे वरिष्ठ पोलीस निरीक्षक प्रमोद क्षीरसागर यांच्या मार्गदर्शनाखाली करण्यात आली. या मोहिमेत सहाय्यक पोलीस निरीक्षक जीवन मोहिते, पोलीस उपनिरीक्षक अझर मुलाणी यांच्यासह पोलीस हवालदार अनिल खेडकर, कल्याण खांडेकर, हृदयनाथ देवकर, भाऊसाहेब मारकड, शिपाई आबा जाधव, धनंजय भोसले, नरेंद्र यादव, सुरज धोत्रे, नागनाथ परगे, विकास येटाळे, भानुदास सरक आणि स्थानिक गुन्हे शाखेच्या इतर अधिकारी व कर्मचाऱ्यांनी सहभाग घेतला. या गुन्ह्याचा पुढील तपास पोलीस उपनिरीक्षक अझर मुलाणी करत असून, आरोपींकडून आणखी काही गुन्हे उघडकीस येण्याची शक्यता पोलिसांनी वर्तवली आहे

.