बारामतीतील थरार: पतीला जिवंत गाडण्यासाठी घरातच बांधली कबर, पत्नीचा भयंकर कट उघड

बारामती : शहरात एका सस्पेन्स थ्रिलर चित्रपटालाही लाजवेल अशी अत्यंत धक्कादायक आणि हादरवून टाकणारी घटना उघडकीस आली आहे. स्वतःच्याच घरात, स्वतःच्याच पतीला जिवंत गाडण्यासाठी एका पत्नीने गॅलरीत चक्क कबर बांधल्याचा भयंकर प्रकार समोर आला आहे. सुदैवाने या कटाचा पर्दाफाश झाला असून पोलिसांनी आरोपी पत्नीला बेड्या ठोकल्या आहेत.
जामदार रोडवरील इंद्रप्रस्थ सोसायटीच्या फ्लॅट नंबर ०९ मध्ये हा सर्व थरार रंगला. याप्रकरणी ७१ वर्षीय प्रकाश कान्होबा जगताप यांनी बारामती शहर पोलीस ठाण्यात फिर्याद दिली आहे. त्यांच्या फिर्यादीनुसार, त्यांचा ४१ वर्षीय मुलगा प्रविण जगताप याची पत्नी शर्मिला (वय ३८) हिने त्याला कायमचे संपवण्याचा कट रचला होता.
३० जुलै रोजी रात्री साडेअकराच्या सुमारास या भयंकर कटाची सुरुवात झाली. शर्मिलाने प्रविणला कोणतेतरी गुंगीचे औषध दिले. औषधाच्या प्रभावाने प्रविण अर्धवट बेशुद्ध अवस्थेत गेल्यावर तिने त्याच्यावर बॅटने अमानुष मारहाण केली. पण तिचा हेतू फक्त मारहाण करण्याचा नव्हता, तर त्याची कायमची विल्हेवाट लावण्याचा होता.
यापुढील घटनाक्रम एखाद्या क्राईम थ्रिलरपेक्षा कमी नाही.

प्रविणला मारण्याच्या उद्देशाने तिने घरातच हॉलच्या गॅलरीत एक चौकोनी कट्टा बांधला. बेशुद्ध पडलेल्या आपल्या पतीला तिने या कट्ट्यात झोपवले आणि वरून कडाप्पा फरशी लावून त्याला जिवंत पुरून टाकण्याचा, कायमचे बंदिस्त करण्याचा भयानक प्रयत्न केला. १ ऑगस्टच्या सकाळपर्यंत हा सर्व थरार सुरू होता.
या घटनेची माहिती मिळताच बारामती शहर पोलिसांनी तातडीने कारवाई करत गुन्ह्याची नोंद केली.याप्रकरणी आरोपी पत्नी शर्मिला प्रविण जगताप हिला अटक केली असून न्यायालयाने तिला १० ऑगस्टपर्यंत पोलीस कोठडी सुनावली आहे.
एका पत्नीनेच पतीला मारण्यासाठी इतका थंड डोक्याने आणि क्रूर कट कसा रचला, यामागील नेमके कारण काय आहे, याचा कसून तपास आता सहाय्यक पोलीस निरीक्षक शशिकांत इंगवले करत आहेत. या घटनेमुळे संपूर्ण बारामती शहरात खळबळ उडाली असून नागरिकांमध्ये भीतीचे वातावरण आहे.