अवैध धंद्यांना शहरात थारा नाही! बारामती पोलिसांची अवैध धंद्यांवर वक्रदृष्टी; सलग दोन दिवस धडक कारवाई. नागरिकांना निर्भयपणे माहिती देण्याचे आवाहन.

बारामती : शहर पोलीस हद्दीत सुरू असलेल्या अवैध दारू विक्री, मटका, जुगार आणि इतर बेकायदेशीर धंद्यांचे समूळ उच्चाटन करण्यासाठी पोलिसांनी कठोर पावले उचलली आहेत. पोलिसांच्या या धडक मोहिमेअंतर्गत गोपनीय माहितीच्या आधारे सलग दोन दिवस छापे टाकून अवैध दारू विक्रेत्यांवर गुन्हे दाखल करण्यात आले आहेत. समाजात अशांतता पसरवणाऱ्या गुन्हेगारांवर यापुढेही सातत्याने कारवाई केली जाईल, असा कडक इशारा पोलिसांनी दिला आहे.

पोलिसांनी दिलेल्या माहितीनुसार, 19 सप्टेंबर 2026 रोजी सायंकाळी साडेपाच वाजण्याच्या सुमारास बारामती-इंदापूर रोडवरील बांदलवाडी येथे देशी दारूची बेकायदेशीर विक्री होत असल्याची माहिती पोलिसांना मिळाली होती. त्यानुसार पोलिसांनी पंचांसमक्ष छापा टाकून लक्ष्मण बापू जोशी (वय 65, रा. बांदलवाडी, ता. बारामती) याला ताब्यात घेतले. त्याच्याकडून 720 रुपये किमतीच्या टँगो पंच नावाच्या 90 मिलीच्या 18 देशी दारूच्या बाटल्या जप्त करण्यात आल्या आहेत. याप्रकरणी पोलीस कॉन्स्टेबल सागर जामदार यांच्या फिर्यादीवरून लक्ष्मण जोशी याच्याविरुद्ध महाराष्ट्र दारूबंदी कायद्यांतर्गत गुन्हा दाखल करण्यात आला आहे.

या कारवाईच्या आदल्या दिवशी, म्हणजेच 18 सप्टेंबर 2026 रोजी सायंकाळी साडेपाच वाजता जळोची गावच्या हद्दीत बैलबाजाराच्या कडेला असलेल्या पत्र्याच्या आडोशाला गावठी हातभट्टीची दारू विकली जात असल्याची गोपनीय माहिती पोलिसांना मिळाली होती. या ठिकाणी छापा टाकला असता, रंजना सोमनाथ कुदळे (वय 45, रा. जळोची, बारामती) हिच्याकडे 1 हजार रुपये किमतीची अंदाजे 10 लिटर गावठी हातभट्टीची दारू एका प्लास्टिकच्या कॅनमध्ये आढळून आली. याप्रकरणी पोलीस कॉन्स्टेबल अक्षय सिताप यांच्या फिर्यादीवरून गुन्हा दाखल करण्यात आला असून, या दोन्ही गुन्ह्यांचा पुढील तपास पोलीस हवालदार रामचंद्र शिंदे करत आहेत.

सदर कारवाई पुणे ग्रामीणचे पोलीस अधीक्षक संदीप सिंह गिल्ल, अपर पोलीस अधीक्षक गणेश बिरादार, उपविभागीय पोलीस अधिकारी चैतन्य कदम, प्रभारी परिविक्षाधीन उपविभागीय पोलीस अधिकारी मनीषा ओमासे आणि पोलीस निरीक्षक श्रीशैल चिवडशेट्टी यांच्या मार्गदर्शनाखाली करण्यात आली. यामध्ये तपास पथकाचे सहाय्यक पोलीस निरीक्षक शशिकांत इंगवले, पोलीस उपनिरीक्षक सर्जेराव पुजारी आणि इतर अंमलदारांनी सक्रिय सहभाग घेतला.

नागरिकांना पोलिसांचे आवाहन

अवैध धंद्यांना शहरात कोणताही थारा दिला जाणार नाही, असे स्पष्ट करत पोलिसांनी नागरिकांना एक महत्त्वाचे आवाहन केले आहे. परिसरात अवैध दारू, मटका, जुगार, अमली पदार्थांची विक्री, शाळेच्या 100 मीटर परिसरात तंबाखूजन्य पदार्थांची विक्री, काळाबाजार किंवा महिलांच्या छेडछाडीचे प्रकार निदर्शनास आल्यास नागरिकांनी तात्काळ 112 या क्रमांकावर किंवा बारामती शहर पोलिसांशी संपर्क साधावा. परिस्थिती सुरक्षित असेल तरच पुरावे गोळा करावेत, स्वतःचा जीव धोक्यात घालू नये. माहिती देणाऱ्याचे नाव पूर्णपणे गोपनीय ठेवले जाईल. जागरूक नागरिक आणि सतर्क पोलीस यांच्या भागीदारीतून बारामती शहर अधिक सुरक्षित होईल, असा विश्वास पोलिसांनी व्यक्त केला आहे.