बारामतीत मध्यरात्री पोलिसांची मोठी कारवाई; अमृता लॉजवर छापा, सेक्स रॅकेटचा पर्दाफाश ​

बारामती : बारामती-भिगवण रोडवरील वंजारवाडी नजीक असलेल्या ‘अमृता लॉज’वर (सोमनाथ हॉटेल) बारामती तालुका पोलिसांनी मध्यरात्री धडक कारवाई करत एका मोठ्या अवैध वेश्या व्यवसायाचा पर्दाफाश केला आहे. या कारवाईत पोलिसांनी हॉटेल चालकासह दोन आरोपींना अटक केली असून, ५ महिलांची सुटका केली आहे.

१४ एप्रिल २०२६ रोजी पहाटे ३ वाजण्याच्या सुमारास पोलिसांना अमृता लॉजवर अनैतिक देहविक्रीचा व्यवसाय सुरू असल्याची अत्यंत खात्रीशीर माहिती मिळाली होती. या माहितीची शहानिशा करण्यासाठी पोलीस निरीक्षक चंद्रशेखर यादव आणि उपनिरीक्षक राम हरी भोसले यांच्या पथकाने एक बनावट (डमी) ग्राहक तयार करून थेट लॉजवर पाठवला. नियोजनपूर्वक आखलेल्या या सापळ्यात डमी ग्राहकाने इशारा करताच पंचांसमवेत दबा धरून बसलेल्या पोलिसांनी लॉजवर अचानक छापा टाकला.

छाप्यादरम्यान लॉजच्या विविध खोल्यांची झडती घेतली असता, काही ठिकाणी महिला आणि ग्राहक एकत्र आढळून आले. सखोल चौकशीत असे निष्पन्न झाले की, संबंधित आरोपी बाहेरून महिलांना आणून पैशांचे आमिष दाखवत त्यांच्याकडून जबरदस्तीने देहव्यवसाय करून घेत होते. यातून आरोपी स्वतःचा मोठा आर्थिक फायदा करत होते.

​याप्रकरणी पोलिसांनी हॉटेल चालक अजित जयसीन शेट्टी (वय ३८) आणि चाँद कलाम आलम (वय २०) यांना रंगेहाथ अटक केली आहे. तसेच, या जाळ्यात अडकलेल्या पश्चिम बंगालमधील ३ आणि भिवंडी (मुंबई) येथील २ अशा एकूण ५ महिलांची सुटका करून त्यांची रवानगी सुधारगृहात करण्यात आली आहे.

या कारवाईदरम्यान पोलिसांनी ग्राहकांची नोंद असलेले रजिस्टर, मोबाईल फोन, रोख रक्कम आणि कंडोमची पाकिटे असा एकूण १७,८०० रुपयांचा मुद्देमाल जप्त केला आहे. आरोपींविरुद्ध बारामती तालुका पोलीस ठाण्यात भारतीय न्याय संहिता (BNS) कलम १४३(३), ३(५) तसेच अनैतिक मानवी वाहतूक प्रतिबंधक कायदा १९५६ च्या कलम ४ व ५ नुसार गंभीर स्वरूपाचा गुन्हा दाखल करण्यात आला आहे.

ही कारवाई पुणे ग्रामीणचे पोलीस अधीक्षक संदीप गिल, अपर पोलीस अधीक्षक गणेश बिरादार आणि उपविभागीय पोलीस अधिकारी सुदर्शन राठोड यांच्या मार्गदर्शनाखाली, पोलीस निरीक्षक चंद्रशेखर यादव, उपनिरीक्षक रामहरी भोसले आणि पोलीस अंमलदार संतोष कांबळे, केदारनाथ बिडवे, नितीन ढवाण, राजू बनणे, निलेश वाकळे, विठ्ठल तरंगे, स्मिता गायकवाड यांच्या पथकाने अत्यंत गोपनीयतेने पार पाडली.