ब्रेकिंगमहाराष्ट्रसकारात्मक बातमीसामाजिक
बारामती शहर पोलीस ठाण्यात राष्ट्रीय पत्रकार दिनानिमित्त भव्य रक्तदान शिबिर उत्साहात संपन्न; पोलीस आणि पत्रकारांचा उत्स्फूर्त सहभाग, ७० बाटल्या रक्त संकलित

1
0
2
1
3
2
बारामती: ‘रक्तदान हेच श्रेष्ठ दान’ हा सामाजिक बांधिलकीचा विचार प्रत्यक्ष कृतीत उतरवत बारामती शहर पोलीस ठाणे आणि पत्रकार यांच्या संयुक्त विद्यमाने सोमवारी (दि. १६ नोव्हेंबर) एका भव्य रक्तदान शिबिराचे आयोजन करण्यात आले होते.

राष्ट्रीय पत्रकार दिनाचे औचित्य साधून आयोजित करण्यात आलेल्या या शिबिराला पोलीस अधिकारी, कर्मचारी आणि विविध माध्यमांच्या प्रतिनिधींनी अभूतपूर्व असा उत्स्फूर्त प्रतिसाद दिला. या शिबिरात दिवसभरात तब्बल ७० बाटल्या रक्त संकलित करण्यात आले असून, या स्तुत्य उपक्रमाचे सर्व स्तरांतून मोठे कौतुक होत आहे.
सकाळी ११ वाजता बारामती शहर पोलीस ठाण्याच्या आवारात या शिबिराची सुरुवात अतिशय उत्साही आणि सकारात्मक वातावरणात झाली. शहर पोलीस ठाण्याच्या परिविक्षाधीन प्रभारी अधिकारी मनिषा ओमासे आणि प्रभारी अधिकारी श्रीशैल्य चिवडशेट्टी यांच्या हस्ते दीप प्रज्वलन करून कार्यक्रमाचे रीतसर उद्घाटन करण्यात आले.
यावेळी बारामती नगरीचे नगराध्यक्ष सचिन सातव आणि नायब तहसीलदार स्वाती गायकवाड यांची प्रमुख उपस्थिती होती. या मान्यवरांनी पोलीस आणि पत्रकार यांनी समाजासाठी एकत्र येऊन राबवलेल्या या जीवनदायी उपक्रमाचे विशेष कौतुक केले. या उद्घाटन प्रसंगी पोलीस ठाण्याचे वरिष्ठ अधिकारी आणि कर्मचारी मोठ्या संख्येने उपस्थित होते.
दुपारच्या सत्रात उपविभागीय पोलीस अधिकारी (SDPO) चैतन्य कदम यांनी या रक्तदान शिबिराला सदिच्छा भेट देऊन पाहणी केली. त्यांनी स्वतः तिथे उपस्थित राहून सर्व रक्तदात्यांचा आणि आयोजकांचा उत्साह वाढवला. यावेळी रक्तदान करणाऱ्या पत्रकार बांधवांना चैतन्य कदम यांच्या हस्ते विशेष प्रमाणपत्रांचे वाटप करण्यात आले.




