पुणे वाहतूक पोलिसांचा ‘सायलेन्सर’ स्ट्राईक! 🚨 बुलेटचे फटाके फोडणाऱ्यांनो, सावधान! पुण्यात पोलिसांची मोठी कारवाई,

पुणे : शहरातील वाढते ध्वनीप्रदूषण आणि कर्कश आवाजाच्या बुलेटस्वारांवर पुणे शहर वाहतूक विभागाने मोठी कारवाई केली आहे. २० फेब्रुवारी २०२६ रोजी संपूर्ण पुणे शहरात राबविण्यात आलेल्या विशेष मोहिमेत तब्बल ३४८ बुलेट गाड्यांचे मॉडिफाईड सायलेन्सर जप्त करण्यात आले असून, विविध कारवायांतून प्रशासनाने लाखो रुपयांचा दंड वसूल केला आहे.

अनेक तरुण आपल्या बुलेटचे मूळ सायलेन्सर बदलून ‘फटाका’ फोडणारे किंवा कर्कश आवाज करणारे मॉडिफाईड सायलेन्सर बसवतात. यामुळे नागरिकांना, विशेषतः वृद्ध आणि रुग्णांना मोठ्या त्रासाला सामोरे जावे लागते. याची दखल घेत वाहतूक विभागाने ही मोहीम राबवली.

या कारवाईचा तपशील:

 * ३४८ बुलेट: वाहनांवर थेट कारवाई करण्यात आली.

 * जप्ती: सर्व संबंधित वाहनांचे मॉडिफाईड सायलेन्सर जागीच काढून जप्त करण्यात आले.

 * वाहने जप्त: कारवाई दरम्यान एकूण १४८ वाहने देखील जप्त करण्यात आली आहेत.

 * दंड: केवळ सायलेन्सरच्या कारवाईतून ३,३४,००० रुपये दंड जमा झाला.

याशिवाय, इतर वाहतूक नियमांचे उल्लंघन करणाऱ्या अन्य वाहनांकडूनही १५,७३,८०० रुपये दंड वसूल करण्यात आला आहे.

‘ड्रंक अँड ड्राईव्ह’ प्रकरणांतही न्यायालयात कारवाई

केवळ रस्त्यावर कारवाई करून न थांबता, वाहतूक विभागाने ‘ड्रंक अँड ड्राईव्ह’च्या प्रकरणांमध्ये न्यायालयात प्रभावी पाठपुरावा (पैरवी) केला.

 * एकूण ५३ आरोपींचे खटले न्यायालयात सादर करण्यात आले.

 * त्यापैकी ४४ आरोपींना माननीय न्यायालयाने दोषी ठरवून दंड ठोठावला.

 * एकाच दिवसात मद्यपान करून वाहन चालवणाऱ्यांकडून ४,२९,५०० रुपये दंड वसूल करण्यात आला.

पोलीस प्रशासनाचे आवाहन

पुणे शहर वाहतूक शाखेने नागरिकांना आणि पालकांना जाहीर आवाहन केले आहे की:

“मॉडिफाईड सायलेन्सरमुळे ध्वनीप्रदूषण वाढते, जे सामाजिक आरोग्यासाठी घातक आहे. तसेच मद्यपान करून वाहन चालवणे हा स्वतःचा आणि इतरांचा जीव धोक्यात घालणारा गंभीर गुन्हा आहे. सुरक्षित आणि शांततामय पुणे शहरासाठी वाहतूक नियमांचे काटेकोर पालन करावे.”

ही कारवाई पोलीस उप-आयुक्त (वाहतूक शाखा) श्री हिम्मत जाधव यांच्या मार्गदर्शनाखाली करण्यात आली असून, यापुढेही अशा मोहिमा सातत्याने राबवल्या जाणार असल्याचे संकेत देण्यात आले आहेत.