गुन्हेगारीब्रेकिंगमहाराष्ट्र
मोक्कातील आरोपीची भरधाव कारवर हुल्लडबाजी, भररस्त्यात स्टंटबाजी कराल तर थेट जेलमध्ये जाल! दहशत पसरवणाऱ्या प्रवृत्तींना बारामती पोलिसांचा कडक इशारा.
बारामतीत रस्त्यावर चारचाकी वाहनावर बसून दहशत व स्टंटबाजी करत दहशत पसरवणाऱ्या गुन्हेगारांच्या बारामती शहर पोलीसांनी मुसक्या आवळल्या.
0
8
8
1
0
8
बारामती : शहरात दहशत माजवण्याचा किंवा वर्चस्व प्रस्थापित करण्याचा प्रयत्न केल्यास बारामती पोलीस कोणतीही गय करणार नाहीत, असा सज्जड दम बारामती शहर पोलिसांनी दिला आहे. भरधाव वाहनातून धोकादायक स्टंटबाजी करत नागरिकांमध्ये दहशत निर्माण करणाऱ्या गुन्हेगारांवर पोलिसांनी तत्काळ कारवाई करत गुन्हा दाखल केला आहे. असल्या विकृती मोडून काढण्यासाठी बारामती पोलीस पूर्णपणे सक्षम असल्याचा स्पष्ट संदेश या धडक कारवाईतून देण्यात आला आहे.
मिळालेल्या माहितीनुसार, ५ सप्टेंबर २०२६ रोजी दुपारी दोन वाजेच्या सुमारास इंदापूर चौक परिसरात एक चारचाकी वाहन (एम.एच. ४२ बी.एन. १०९५) अत्यंत वेगाने आणि निष्काळजीपणे चालवले जात होते. या वाहनाच्या टपावर बसून आणि खिडकीतून शरीर बाहेर काढून काही तरुण नागरिकांकडे हातवारे करत होते.
त्यांच्या या हुल्लडबाजीमुळे इतर वाहनांना धोका निर्माण झाला, रस्त्यावरील वाहतूक विस्कळीत झाली आणि नागरिकांमध्ये भीतीचे वातावरण निर्माण झाले होते.
या गंभीर घटनेची दखल घेत पोलिसांनी तात्काळ सूत्रे हलवली. याप्रकरणी भारतीय न्याय संहिता २०२३ आणि मोटार वाहन अधिनियमाच्या विविध कलमांन्वये (गु.र.नं. ३६६/२०२६) गुन्हा दाखल करण्यात आला आहे. गुन्ह्यात वापरलेली कार पोलिसांनी जप्त केली असून,योगेश बापू लोंढे, किशोर संजय ढोरे उर्फ मोठा डावर आणि एका अनोळखी व्यक्तीवर हा गुन्हा दाखल करण्यात आला आहे.
किशोर ढोरे याच्यावर यापूर्वीही मारामारी, जबरी चोरी असे गंभीर गुन्हे दाखल असून तो मोक्का (MCOCA) प्रकरणातून जामिनावर बाहेर आहे. सार्वजनिक शांतता भंग करून जामिनाच्या अटींचे उल्लंघन केल्याप्रकरणी, त्याचा जामीन रद्द करण्यासाठी न्यायालयाकडे अहवाल सादर करण्याची कायदेशीर प्रक्रिया पोलिसांनी सुरू केली आहे.
