कर्तव्याचा ‘स्मार्ट’ गौरव! माळेगाव पोलीस ठाण्याला ‘ISO’ मानांकन; जिल्हा पोलीस अधीक्षकांच्या हस्ते सन्मान
बारामती : पुणे जिल्हा ग्रामीण पोलीस दलातील महत्त्वाचे केंद्र असलेल्या माळेगाव पोलीस ठाण्याने आपल्या शिस्तबद्ध आणि लोकाभिमुख कारभाराने मानाचा तुरा रोवला आहे. उत्कृष्ट कार्यप्रणाली, प्रशासकीय पारदर्शकता आणि अत्याधुनिक सेवांच्या जोरावर या पोलीस ठाण्याला ‘ISO 9001:2015’ आणि ‘स्मार्ट पोलीस ठाणे’ ही दोन प्रतिष्ठित प्रमाणपत्रे देऊन सन्मानित करण्यात आले.
पुणे जिल्ह्याचे ग्रामीण पोलीस अधीक्षक संदीप सिंह गिल यांच्या हस्ते माळेगाव पोलीस ठाण्याचे प्रभारी अधिकारी तथा सहायक पोलीस निरीक्षक सचिन लोखंडे यांनी हे पुरस्कार स्वीकारले.
माळेगाव पोलीस ठाण्याच्या दैनंदिन कामकाजाची सखोल पडताळणी केल्यानंतर हा बहुमान मिळाला आहे. यामध्ये प्रामुख्याने खालील बाबींची दखल घेण्यात आली:
- कामाचे योग्य नियोजन: गुन्ह्यांची उकल आणि रेकॉर्डचे अद्ययावत व्यवस्थापन.
- लोकाभिमुख प्रशासन: तक्रारदारांना मिळणारी सन्मानजनक वागणूक आणि जलद प्रतिसाद.
- स्वच्छता आणि शिस्त: पोलीस ठाण्यातील भौतिक सोयी-सुविधा आणि ‘स्मार्ट’ कार्यपद्धती.
अधीक्षक संदीप सिंह गिल यांच्याकडून कामकाजाचा आढावा
पुरस्कार वितरणानंतर अधीक्षक संदीप सिंह गिल यांनी पोलीस ठाण्याच्या कारभाराचा सविस्तर आढावा घेतला. यावेळी त्यांनी सर्व कर्मचाऱ्यांना मार्गदर्शन करताना, “मिळालेल्या बहुमानामुळे जबाबदारी वाढली असून, आगामी काळात अधिक गतिमान आणि पारदर्शक कामकाज करून जनतेचा विश्वास संपादीत करावा,” असा मोलाचा सल्ला दिला.
उपस्थित मान्यवर
या गौरव सोहळ्याप्रसंगी उपनिरीक्षक तुषार भोर, सहायक फौजदार संजय मोहिते, गोपनीय विभागाचे नाईक ज्ञानेश्वर सानप, नितीन कांबळे, विकास राखंडे, वैभव मोहोळकर, जालिंदर बंडगर, अमोल कोकरे, जयसिंग कचरे, तसेच महिला पोलीस कर्मचारी बनसोडे व ढेरे यांच्यासह इतर कर्मचारी उपस्थित होते.
“माझ्या कार्यकाळात पोलीस ठाण्याला ही दोन मानाची प्रमाणपत्रे मिळाली, याचा मला सार्थ अभिमान आहे. हे यश टीम वर्कचे प्रतीक असून, भविष्यात माळेगाव पोलीस ठाण्याला पुणे जिल्ह्यात ‘नंबर एक’चे पोलीस ठाणे बनवण्यासाठी मी आणि माझे सहकारी कटिबद्ध आहोत.”
— सचिन लोखंडे (सहायक पोलीस निरीक्षक, माळेगाव पोलीस ठाणे)
