🛑 विशेष रिपोर्ट: बारामतीच्या सुपा गावात ‘दादा’गिरीचा अतिरेक; सत्य मांडणाऱ्या पत्रकारांचा आवाज दाबण्याचा प्रयत्न!

बारामती : निवडणुकीचे बिगुल वाजताच बारामतीत सुसंस्कृत राजकारणाला ग्रहण लागल्याचे चित्र स्पष्ट होत आहे. जिल्हा परिषद आणि पंचायत समितीच्या निवडणुका जाहीर होताच, जनतेची सेवा करण्याऐवजी ‘माध्यमांचा गळा घोटणे’ हाच काही राजकीय कार्यकर्त्यांचा अजेंडा बनला आहे की काय, असा प्रश्न आता उपस्थित होत आहे. बारामती तालुक्यातील सुपा येथे राष्ट्रवादीच्या काही वाचाळवीर कार्यकर्त्यांनी पत्रकारांना धमकावल्याचा संतापजनक प्रकार उघडकीस आला असून, या घटनेने माध्यम विश्वात संतापाची लाट उसळली आहे.

✍️ “आमच्या मनाप्रमाणे बातम्या का नाही?” हुकूमशाही प्रवृत्तीचे दर्शन

लोकशाहीत माध्यमांना ‘आरसा’ मानले जाते, पण सुपा येथील काही स्थानिक पुढाऱ्यांना हा आरसा बघणे सोयीचे वाटत नाही. मिळालेल्या माहितीनुसार, येथील काही प्रतिष्ठित म्हणवणाऱ्या राजकीय कार्यकर्त्यांनी पत्रकारांना गाठून, “आमच्या मनाप्रमाणे बातम्या का लावत नाही? आम्हाला विचारूनच बातम्या द्या,” असा जाब विचारत दमबाजी केली.

वास्तववादी आणि सत्य बातम्या दिल्यावर ज्यांचा तीळपापड होतो, असे हे कार्यकर्ते नक्की कोणाचे हित साधत आहेत? स्वतःला लोकप्रतिनिधी म्हणवून घेणाऱ्यांच्या कार्यकर्त्यांची ही ‘ठोकशाही’ म्हणजे लोकशाहीच्या चौथ्या स्तंभावर केलेले भ्याड आक्रमण आहे.

बारामती तालुक्यात उपमुख्यमंत्री अजितदादा पवार आणि ज्येष्ठ नेते शरदचंद्रजी पवार यांच्या पक्षांचे उमेदवार रिंगणात आहेत. वरिष्ठ पातळीवर नेते विकासाच्या मुद्द्यावर निवडणूक लढवत असताना, खालील फळीतील हे ‘स्वयंघोषित गावपुढारी’ मात्र दहशत माजवून मते मिळवू पाहत आहेत का? असा सवाल उपस्थित होत आहे.

स्थानिक संस्थांच्या निवडणुकीत उमेदवारी मिळाल्याचा आनंद असला तरी, पत्रकारांवर दबाव टाकून स्वतःचे अपयश लपवण्याचा हा केविलवाणा प्रयत्न आहे. राजकीय घडामोडींचे वास्तववादी वार्तांकन करणाऱ्या पत्रकारांना धमकावणे हे या कार्यकर्त्यांच्या बौद्धिक दिवाळखोरीचे लक्षण आहे.

या घटनेनंतर बारामती तालुका ग्रामीण पत्रकार संघाने आक्रमक पवित्रा घेतला आहे. पत्रकारांवर होणारे हे हल्ले आणि दडपशाही खपवून घेतली जाणार नाही.

 सुपा पोलीस ठाण्यात सर्व पत्रकार मिळून संबंधित गुंडा प्रवृत्तीच्या कार्यकर्त्यांविरोधात तक्रार दाखल करणार आहेत.

राष्ट्रवादीच्या (अजित पवार गट) वरिष्ठांनी आपल्या कार्यकर्त्यांच्या या उर्मटपणाची वेळीच गंभीर दखल घ्यावी, अन्यथा पत्रकार ‘गांधीगिरी’ मार्गाने तीव्र आंदोलन करतील, असा सज्जड दम पत्रकार संघाने दिला आहे.

निवडणुका येतील आणि जातील, पण सत्याचा आवाज दाबण्याचा प्रयत्न कराल तर तो अधिक जोराने घुमेल. “लेखणी मोडण्याचा प्रयत्न कराल, तर शाई अधिक गडद होईल,” हे या मस्तीत आलेल्या पुढाऱ्यांनी आणि त्यांच्या कार्यकर्त्यांनी वेळीच लक्षात ठेवावे.