डोर्लेवाडी (बारामती): मोबाईल आणि टीव्हीच्या वाढत्या व्यसनापासून तरुणांना दूर सारून मैदानी खेळांची आवड निर्माण करण्यासाठी आयोजित करण्यात आलेल्या ‘डोर्लेवाडी प्रीमियर लीग’ क्रिकेट स्पर्धेचा नुकताच दिमाखदार समारोप झाला. पाच दिवस रंगलेल्या या अटीतटीच्या स्पर्धेत ‘संघर्ष वरद इलेव्हन’ संघाने आपल्या उत्कृष्ट कामगिरीच्या जोरावर विजेतेपदावर नाव कोरले.
मैदानी खेळांकडे वळवण्यासाठी स्तुत्य उपक्रम
गावातील सामाजिक कार्यात सक्रिय असलेल्या तरुणांनी या स्पर्धेचे आयोजन केले होते. स्थानिक खेळाडूंना हक्काचे मैदान उपलब्ध करून देणे आणि त्यांना खेळासाठी प्रोत्साहित करणे हा यामागचा मुख्य उद्देश होता. केवळ डोर्लेवाडीतील खेळाडूंसाठी मर्यादित असलेल्या या लीगमध्ये एकूण १२ संघांनी सहभाग नोंदवून स्पर्धेची रंगत वाढवली.
साखळी पद्धतीने खेळवण्यात आलेल्या या सामन्यांमध्ये प्रत्येक संघाने विजयासाठी शर्थीचे प्रयत्न केले.
स्पर्धेचा अंतिम निकाल खालीलप्रमाणे
प्रथम क्रमांक: संघर्ष वरद इलेव्हन
द्वितीय क्रमांक: मंदार सोलर
तृतीय क्रमांक: के. पी. स्पोर्ट्स
चतुर्थ क्रमांक: छावा वॉरियर्स
विजेत्या संघांना मान्यवरांच्या हस्ते रोख रक्कम आणि स्मृतीचिन्हे देऊन गौरविण्यात आले. यावेळी रोहिणी आटोळे-खरसे, अनिकेत गवळी, दिनेश हिंदुळे, विनायक जाधव, निलेश भोपळे, सचिन निलाखे, मिलिंद घोरपडे, विनोद नवले आणि के. पी. स्पोर्ट्सचे प्रतिनिधी उपस्थित होते.
ही स्पर्धा यशस्वी करण्यासाठी ॲड. सचिन दळवी, किशोर खोत, सागर राऊत, भाऊ म्हांगडे, सुरज नवले, अजित काळकुटे आणि गौतम पवार यांनी विशेष परिश्रम घेतले. या स्पर्धेमुळे डोर्लेवाडीतील क्रीडा क्षेत्रात उत्साहाचे वातावरण निर्माण झाले आहे.
बातमी शेअर करण्यासाठी येथे क्लिक करा
