सोमेश्वर साखर कारखाना निवडणूक:विद्यमान अध्यक्ष पुरुषोत्तम जगताप पराभूत.मुरुम-वाल्हा गटात राष्ट्रवादीचा दणदणीत विजय,

बारामती: श्री सोमेश्वर सहकारी साखर कारखान्याच्या निवडणुकीत मुरुम-वाल्हा गट क्रमांक २ मध्ये राष्ट्रवादी काँग्रेसच्या सर्व उमेदवारांनी निर्विवाद वर्चस्व प्रस्थापित करत मोठा विजय मिळवला आहे. या निवडणुकीत कारखान्याचे विद्यमान अध्यक्ष पुरुषोत्तम रामराजे जगताप यांना दारुण पराभवाचा सामना करावा लागला आहे. मुरुम-वाल्हा गट क्रमांक २ मध्ये मतदारांनी राष्ट्रवादीच्या उमेदवारांना भरघोस मतदान केले. विजयी उमेदवारांनी सरासरी ६,५७२ मतांच्या मोठ्या फरकाने हा विजय संपादन केला आहे.

विजयी उमेदवारांपैकी राजवर्धन शिवाजीराव शिंदे यांना १४,०१५ मते मिळाली. तसेच हृषीकेश शिवाजी गायकवाड यांना १३,९६१ मते आणि विक्रम आनंदराव भोसले यांना १३,८५४ मते मिळाली. दुसरीकडे, विद्यमान अध्यक्ष पुरुषोत्तम रामराजे जगताप यांना केवळ ७,३६४ मते मिळाली. त्यांच्यासोबतच वैभव गायकवाड यांना ६,१६८ मते, सतीश सकुंडे यांना ५,५६८ मते, संदीप चव्हाण यांना १,७६५ मते, राजेंद्र जगताप यांना १,७३३ मते आणि प्रवीण भोसले यांना २,१३७ मते मिळाली असून या सर्वांना पराभवाचा सामना करावा लागला.

या घसघशीत विजयानंतर विजयी उमेदवार विक्रम भोसले यांनी आपली प्रतिक्रिया व्यक्त केली.

विजयाचे श्रेय पक्षाच्या नेत्यांना देताना विक्रम भोसले म्हणाले की, सर्वप्रथम मी हा जो आमचा विजय झालेला आहे, तो स्वर्गीय अजित दादा पवार साहेब यांना समर्पित करतो. त्याचप्रमाणे आमच्या नेत्या, महाराष्ट्राच्या उपमुख्यमंत्री आदरणीय वहिनीसाहेब, युवा नेते पार्थ दादा आणि जय दादा यांनी जी रणनीती आखली, त्या रणनीतीप्रमाणे आमचा हा विजय झाला आहे, त्याबद्दल मी त्यांचे सर्वप्रथम आभार मानतो.
स्थानिक राजकीय समीकरणांवर बोलताना विक्रम भोसले पुढे म्हणाले की, आमच्या वाणेवाडी गावातून विद्यमान अध्यक्ष पुरुषोत्तम दादा जगताप, शरद पवार गटाचे प्रमुख राजेंद्र जगताप, प्रवीण दादा भोसले आणि मी असे एकूण चार उमेदवार रिंगणात होते. तरीसुद्धा आमच्या संपूर्ण भागातील जनतेने आणि सभासदांनी आमच्यावर व पर्यायाने पक्षावर विश्वास ठेवला, त्यामुळेच हा विजय मोठ्या फरकाने झाला आहे. ज्या ठिकाणी विरोधकांना गट नंबर दोनमध्ये मोठी आघाडी मिळण्याची खात्री होती, तिथे सर्व समीकरणे फिरली आणि उलटं चित्र पाहायला मिळालं. पार्थ दादांनी आखलेल्या अचूक रणनीतीमुळेच हा विजय साकार झाला आहे.
यावेळी विक्रम भोसले यांनी राष्ट्रवादी काँग्रेस पक्षाचे सर्व पदाधिकारी आणि सभासदांचे या विजयाबद्दल जाहीर आभार व्यक्त केले. या निकालामुळे सोमेश्वर कारखान्याच्या निवडणुकीकडे सर्वांचे लक्ष वेधले गेले आहे.