बारामती तालुक्यात जिओ नेटवर्कचा ‘लपंडाव’; वडगाव निंबाळकरसह पश्चिम भाग त्रस्त, ग्राहक हवालदिल!

बारामती : संपूर्ण बारामती तालुक्यात आणि विशेषतः तालुक्याच्या पश्चिम भागात जिओ कंपनीच्या नेटवर्कने नागरिकांना अक्षरशः रडकुंडीला आणले आहे. वडगाव निंबाळकर आणि आजूबाजूच्या गावांमध्ये नेटवर्क वारंवार विस्कळीत होण्याचे प्रमाण वाढले असून, कधी अर्धा तास, तर कधी दोन तास आणि काही वेळा तर चक्क दिवसभर सेवा ठप्प राहण्याचे प्रकार घडत आहेत. डिजिटल युगात बिनबोभाट सेवा देण्याचा दावा करणाऱ्या कंपन्या ग्राहकांची दिशाभूल करत असून, पैसे पूर्ण भरूनही अर्धवट सेवा मिळत असल्याने नागरिकांमध्ये संतापाची लाट उसळली आहे.

डिजिटल युगात ‘रेंज’ नसल्याने जगणे झाले कठीण

आजच्या काळात मोबाईल हा केवळ संवादाचे माध्यम उरला नसून तो जीवनावश्यक वस्तू बनला आहे. सकाळपासून ते रात्रीपर्यंत प्रत्येक गोष्टीत मोबाईलचा हस्तक्षेप वाढला आहे.

१. आर्थिक व्यवहार ठप्प: आज चहाच्या टपरीपासून ते मोठ्या दुकानांपर्यंत सर्व व्यवहार ‘ऑनलाईन’ (UPI) होतात. मात्र, रेंज नसल्याने हे व्यवहार वारंवार फेल होतात, ज्यामुळे ग्राहकांचा आणि व्यापाऱ्यांचा मोठा खोळंबा होतो.

२. शासकीय व खाजगी कामे: अनेक सरकारी योजनांचे अर्ज, बँकेचे ओटीपी (OTP), विद्यार्थ्यांचे ऑनलाईन क्लास आणि ‘वर्क फ्रॉम होम’ करणाऱ्या कर्मचाऱ्यांची कामे केवळ नेटवर्क नसल्याने अडकून पडतात.

३. अत्यावश्यक सेवा: दवाखाना, मेडिकल इमर्जन्सी किंवा तातडीच्या संपर्क वेळी नेटवर्क जाणे हे जीवावर बेतू शकते.

रिचार्ज पूर्ण, सेवा अपूर्ण: ग्राहकांची उघड लुटालूट

टेलीकॉम कंपन्या दर महिन्याला रिचार्जचे दर वाढवत आहेत. ग्राहकांकडून २८ दिवसांचे किंवा ८४ दिवसांचे पैसे पूर्ण वसूल केले जातात. मात्र, त्या बदल्यात मिळणारी सेवा अत्यंत निकृष्ट दर्जाची आहे. “पैसे घेताना तत्परता दाखवणारी कंपनी, सेवा देताना का हात आखडता घेते?” असा सवाल आता सामान्य नागरिक विचारत आहेत. महिन्यातील कित्येक तास किंवा दिवस नेटवर्क नसेल, तर कंपनी ग्राहकांना त्या दिवसांचे पैसे परत करणार का? हा मुद्दा आता ऐरणीवर आला आहे.

तक्रार तरी कोठे करायची?

सामान्य माणसाला नेटवर्क नसताना तक्रार कोठे करावी, हेच समजत नाही.

कस्टमर केअरचा जाच

अनेक कंपन्यांनी थेट मानवी संवाद (Customer Executive) टाळण्यासाठी सर्व सेवा ऑनलाईन केल्या आहेत. ज्यांचे नंबर सुरू आहेत, तिथेही IVR प्रणालीचे लांबलचक रेकॉर्डिंग ऐकून ग्राहक वैतागतात. अनेकदा ‘आमच्या अधिकाऱ्याशी बोलण्यासाठी…’ हे बटण दाबेपर्यंत किंवा कॉल कनेक्ट होण्याआधीच संपर्क तुटतो.

संघटनांची निष्क्रियता: ग्राहकांच्या हक्कासाठी लढणाऱ्या ग्राहक मंच किंवा संघटना या गंभीर प्रश्नावर मूग गिळून गप्प का आहेत? असा प्रश्न निर्माण झाला आहे. कंपन्यांच्या या मनमानी कारभाराला चाप लावणारे कोणीही उरले नाही का?

कंपनी मालामाल, जनता मात्र बेहाल

खाजगी मोबाईल कंपन्या दरवर्षी हजारो कोटींचा नफा कमवत आहेत, मात्र पायाभूत सुविधा सुधारण्याकडे त्यांचे दुर्लक्ष होत आहे. टॉवर्सची अपुरी संख्या आणि मेंटेनन्सचा अभाव यामुळे ग्रामीण भागातील जनता होरपळून निघत आहे.

जनतेचा आक्रोश: ‘याला कोणी वाली आहे का?’

वडगाव निंबाळकरसह पश्चिम पट्ट्यातील नागरिकांनी या त्रासाला कंटाळून आता “याला कोणी वाली आहे का?” असा आर्त सवाल केला आहे. लोकप्रतिनिधी आणि प्रशासनाने यात लक्ष घालून या कंपन्यांना जाब विचारावा, अन्यथा तीव्र आंदोलनाचा इशारा त्रस्त ग्राहकांनी दिला आहे.