गुन्हेगारीब्रेकिंगमहाराष्ट्र
कोयत्याची दहशत आणि खाकीचा दणका! बारामती तालुका पोलिसांनी फिल्मी स्टाईलने आवळल्या लुटारूंच्या मुसक्या
0
5
3
1
8
6
बारामती : रात्रीची वेळ…
निर्जन रस्ता…
आणि अचानक अंधारात चमकणारी धारदार कोयत्याची पाते! भिगवण-बारामती रोडवरील जैनकवाडी फाटा येथे शुक्रवारी रात्री असाच एक थरार घडला. प्रवाशांना लुटणाऱ्या आणि कोयत्याचा धाक दाखवून दहशत माजवणाऱ्या टोळीचा बारामती तालुका पोलिसांनी अक्षरशः सिनेस्टाईल पाठलाग करून पर्दाफाश केला आहे.
शुक्रवारी (दि. ७) रात्रीचे साडेआठ वाजले होते. विश्वराजे पाटील (वय १८) आणि त्यांचे मित्र मारुती सुझुकी कॅरी गाडीतून प्रवास करत होते. गाडी जैनकवाडी फाट्याजवळ आली असता, अचानक अंधारातून ६ ते ७ जणांची टोळी रस्त्यावर आली. काही कळायच्या आतच त्यांनी गाडी अडवली. हातात लोखंडी रॉड आणि कोयते पाहून प्रवाशांच्या काळजाचा ठोका चुकला.
लुटारूंनी गाडीच्या काचा फोडल्या आणि आरडाओरडा सुरू केला. विश्वराजे यांच्या डोक्यावर कोयत्याने वार करून त्यांना रक्ताच्या थारोळ्यात पाडण्यात आले. भीतीचे वातावरण निर्माण करून लुटारूंनी फिर्यादीची स्कायबॅग, मोबाईल, पॉवर बँक, एटीएम कार्ड आणि रोख रक्कम असा एकूण १२,०२० रुपयांचा ऐवज लुटला आणि पसार झाले.
घटनेची माहिती मिळताच होमगार्ड जवान सूर्यवंशी यांनी पोलीस निरीक्षक चंद्रशेखर यादव यांना अलर्ट केले. यादव यांनी क्षणाचाही विलंब न लावता आपल्या टीमसह घटनास्थळी धाव घेतली. परिस्थितीचे गांभीर्य ओळखून त्यांनी तातडीने भिगवण, दौंड आणि यवत पोलिसांना अलर्ट केले.
लुटारू पळून जात असल्याची माहिती मिळताच पोलिसांनी त्यांचा पाठलाग सुरू केला. केडगाव चौफुला-सुपा रोडवर हा पाठलाग एखाद्या ॲक्शन चित्रपटाप्रमाणे रंगला. मोटारसायकल आणि रिक्षामधून पळणाऱ्या आरोपींना घेरण्यासाठी पोलिसांनी सापळा रचला. या झटापटीत दोन आरोपी जाळ्यात अडकले, तर काही अंधाराचा फायदा घेऊन पळाले.
पण, पोलीस इथेच थांबले नाहीत. पळून गेलेल्या आरोपींचा शोध घेत असतानाच माहिती समोर आली की, या टोळीने कुरकुंभ येथील पेट्रोल पंपावरील सेल्समन रवींद्र खडके यांच्यावरही जीवघेणा हल्ला केला होता. अखेर बारामती पोलिसांनी जिद्द सोडली नाही आणि पळालेल्या तिघांपैकी दोघांना पुन्हा शिताफीने ताब्यात घेतले.
