कृषीवार्ताब्रेकिंगमहाराष्ट्रराजकिय
ज्या लोकांना दादांनी भरभरून दिले तेच लोक आता स्वतःच्या स्वार्थासाठी वेगळे झाले आहेत, सोमेश्वर कारखाना पुन्हा एकदा शरद पवारांच्या ताब्यात देण्याचे आवाहन.युगेंद्र पवार
शरद पवारांचा पुरंदर-बारामती दुष्काळी दौरा: कोऱ्हाळे बुद्रुकमध्ये साहेब न थांबल्याने युगेंद्र पवारांनी साधला शेतकऱ्यांशी संवाद; सोमेश्वर कारखान्यावरून विरोधकांवर निशाणा.
0
9
3
3
4
5
बारामती/कोऱ्हाळे बुद्रुक : देशाचे ज्येष्ठ नेते आणि राष्ट्रवादी काँग्रेसचे अध्यक्ष शरद पवार यांनी आज बारामती आणि पुरंदर तालुक्यातील दुष्काळी भागाचा पाहणी दौरा केला. या दौऱ्यादरम्यान ते कोऱ्हाळे बुद्रुक येथील ‘कठीण पूल’ परिसरात आले असता, परिसरातील शेतकरी, ग्रामस्थ आणि आगामी सोमेश्वर सहकारी साखर कारखान्याच्या निवडणुकीच्या पार्श्वभूमीवर कारखान्याचे सभासद मोठ्या संख्येने त्यांच्या प्रतीक्षेत चौकात थांबले होते. मात्र, पुढील कार्यक्रमाला उशीर होत असल्याने शरद पवार तेथे न थांबताच पुढे निघून गेले. साहेब पुढे गेल्याने उपस्थित नागरिकांमध्ये काहीशी निराशा होती, मात्र विद्या प्रतिष्ठानचे खजिनदार युगेंद्र पवार यांनी तातडीने परिस्थिती हाताळत लोकांसाठी तिथेच थांबण्याचा निर्णय घेतला आणि उपस्थित शेतकरी व सभासदांशी संवाद साधून त्यांना आश्वस्त केले.
या अनौपचारिक सभेच्या सुरुवातीला पुणे जिल्हा परिषदेचे माजी अध्यक्ष श्री. सतीश मामा खोमणे यांनी उपस्थितांना संबोधित केले. त्यांनी पुरंदरमधील जिरायत भाग आणि मुढाळे परिसरातील भीषण दुष्काळी परिस्थितीचे गांभीर्य मांडले. ‘१६ फाटा’ परिसरातील पाण्याचा गंभीर प्रश्न आणि रात्रीच्या वेळी वस्त्यांवर जाऊन पाहिलेली पाण्याची भीषण टंचाई त्यांनी सांगितली. तसेच, सध्या अनेक शेतकरी दुधाच्या व्यवसायावर अवलंबून असून, या दुष्काळात लाखो रुपयांच्या महागड्या गाई जगवायच्या कशा, हा मोठा प्रश्न असल्याचे ते म्हणाले. शरद पवार साहेबांनी नेहमीच दुष्काळात शेतकऱ्यांना भक्कम साथ दिली आहे, याची आठवणही त्यांनी यावेळी करून दिली.
त्यानंतर युगेंद्र पवार यांनी नागरिकांशी संवाद साधला. शरद पवार साहेब का थांबू शकले नाहीत, याचे स्पष्टीकरण देताना ते म्हणाले, “सकाळपासून सुरू झालेल्या या दौऱ्यात साहेबांनी पुरंदरमधील परिंचे, जेऊर, मांडकी अशा १५ ते २० गावांना भेटी दिल्या. या सर्व धावपळीत दुपारचे अडीच वाजले तरी साहेबांनी जेवण केलेले नव्हते. त्यांच्या प्रकृतीची आणि वेळेची काळजी घेत ते पुढील कार्यक्रमासाठी गोविंद बागेकडे रवाना झाले.”
भाषणादरम्यान युगेंद्र पवारांनी बारामतीतील ढासळत्या कायदा व सुव्यवस्थेवर तीव्र चिंता व्यक्त केली. ते म्हणाले की, बारामतीत गुन्हेगारी प्रचंड वाढली असून पूर्वी महिलांना रात्री बाहेर फिरताना जी सुरक्षितता वाटायची, ती आता राहिलेली नाही. महिलांमध्ये भीतीचे वातावरण आहे. या गंभीर प्रश्नावर खासदार सुप्रिया सुळे यांनी पुण्यात जाऊन पोलीस अधीक्षकांची भेट घेतली असून, बारामती पुन्हा सुरक्षित करण्यासाठी कठोर कारवाई करण्याची मागणी केली असल्याचे त्यांनी सांगितले.
