सुपा/मोरगाव: पुणे जिल्ह्यातील अष्टविनायकांपैकी महत्त्वाचे तीर्थक्षेत्र असलेल्या श्री मयुरेश्वर मंदिर, मोरगाव येथे आज सकाळी अचानक सशस्त्र पोलीस आणि कमांडोजचा वेढा पडल्याने परिसरात एकच खळबळ उडाली. दहशतवादी हल्ल्याच्या पार्श्वभूमीवर पोलिसांनी अत्यंत गोपनीयरीत्या राबवलेल्या ‘मॉक ड्रिल’मुळे (रंगीत तालीम) काही काळ श्वास रोखला गेला होता, मात्र ही तालीम असल्याचे समजताच प्रशासनाने सुटकेचा निश्वास सोडला.
आज सकाळी ११:३० च्या सुमारास मंदिर परिसरात संशयास्पद हालचालींची माहिती मिळताच सुपा पोलिसांनी तातडीने सूत्रे हलवली. काही वेळातच एटीएस (दहशतवादी विरोधी पथक), क्यूआरटी (क्विक रिस्पॉन्स टीम) आणि बीडीडीएस (बॉम्ब शोधक व नाशक पथक) चे जवान अत्याधुनिक शस्त्रास्त्रांसह दाखल झाले.
एका काल्पनिक दहशतवादी हल्ल्याची परिस्थिती निर्माण करून, मंदिरातील भाविकांचे रक्षण कसे करायचे आणि हल्लेखोरांना कसे जेरबंद करायचे, याचे जिवंत प्रात्यक्षिक यावेळी दाखवण्यात आले. ४४ जणांच्या या विशेष पथकाने अत्यंत समन्वयाने ही मोहीम राबवून संभाव्य धोका यशस्वीपणे मोडून काढला.
सुरक्षा यंत्रणांचा हाय-अलर्ट
* बीडीडीएस कामगिरी: संशयास्पद स्फोटक वस्तू शोधून ती सुरक्षितरीत्या नष्ट करण्याचे तंत्र पथकाने सादर केले.
* कमांडो ॲक्शन: एटीएस आणि क्यूआरटीच्या जवानांनी वेगाने हालचाली करत काल्पनिक हल्लेखोरांना घेराव घालून ताब्यात घेतले.
* प्रशासन सज्ज: पुणे ग्रामीण पोलीस अधीक्षक संदीपसिंह गिल्ल आणि अपर पोलीस अधीक्षक गणेश बिरादार यांच्या मार्गदर्शनाखाली ही कारवाई पार पडली.
“भाविक आणि स्थानिक नागरिकांच्या सुरक्षिततेसाठी पोलीस प्रशासन सदैव कटिबद्ध आहे. नागरिकांनी कोणत्याही संशयास्पद वस्तू किंवा व्यक्तीबद्दल तातडीने ११२ क्रमांकावर किंवा स्थानिक पोलीस स्टेशनला माहिती द्यावी.”
श्री.मनोजकुमार नवसरे (सहायक पोलीस निरीक्षक, सुपा)
सदर मोहिमेत सुपा पोलीस स्टेशनचे अधिकारी, एटीएसचे १ अधिकारी व ७ अंमलदार, क्यूआरटीचे ९ अंमलदार आणि होमगार्ड पथकाचे जवान सहभागी झाले होते. बारामती विभागाचे उपविभागीय पोलीस अधिकारी सुदर्शन राठोड यांच्या देखरेखीखाली ही तालीम यशस्वीरीत्या पूर्ण झाली. या यशस्वी चाचणीमुळे मयुरेश्वर मंदिराची सुरक्षा यंत्रणा किती अभेद्य आहे, याची प्रचिती आली आहे.
बातमी बद्दल आपला अभिप्राय नोंदवा
बातमी शेअर करण्यासाठी येथे क्लिक करा
