बारामती तालुका पोलिसांकडून विद्या प्रतिष्ठान महाविद्यालयात अंमली पदार्थ विरोधी प्रबोधन

बारामती: तरुण पिढीला अंमली पदार्थांच्या विळख्यापासून दूर ठेवण्यासाठी आणि समाजात जागरूकता निर्माण करण्यासाठी बारामती तालुका पोलिसांच्या वतीने विद्या प्रतिष्ठान महाविद्यालय, विद्यानगरी येथे अंमली पदार्थ जनजागृती मोहिमेअंतर्गत एका विशेष प्रबोधनात्मक कार्यक्रमाचे आयोजन करण्यात आले होते. काल, दिनांक १ जुलै २०२६ रोजी दुपारी साडेबारा ते दोन या वेळेत हा कार्यक्रम पार पडला.

या कार्यक्रमात बारामती तालुका पोलीस स्टेशनचे पोलीस निरीक्षक नारायण पवार यांनी विद्यार्थ्यांना सविस्तर मार्गदर्शन केले. अंमली पदार्थांचे सेवन केल्यामुळे शरीरावर आणि मनावर होणारे गंभीर दुष्परिणाम, तसेच त्यामुळे होणारे सामाजिक आणि आर्थिक नुकसान यावर त्यांनी प्रकाश टाकला. विद्यार्थ्यांनी अशा जीवघेण्या व्यसनांपासून दूर राहावे आणि एक अंमली पदार्थमुक्त समाज घडवण्यासाठी स्वतः जागरूक राहून इतरांचेही प्रबोधन करावे, असे आवाहन पवार यांनी केले. याशिवाय, अंमली पदार्थांच्या विक्रीबाबत कोणतीही गोपनीय माहिती मिळाल्यास ती त्वरित पोलिसांना देण्याचे आवाहन उपस्थित शिक्षक, विद्यार्थी आणि पालकांना करण्यात आले.

या सत्रादरम्यान पोलिसांकडून केवळ मार्गदर्शनच करण्यात आले नाही, तर विद्यार्थ्यांशी थेट संवाद साधून त्यांच्या मनातील शंकांचे निरसनही करण्यात आले. पोलिसांच्या या प्रबोधनात्मक उपक्रमाला विद्यार्थ्यांकडून अतिशय उत्स्फूर्त प्रतिसाद मिळाला.

सदर कार्यक्रमासाठी पोलीस निरीक्षक नारायण पवार यांच्यासह विद्या प्रतिष्ठान कॉलेजचे प्राचार्य भारत शिंदे, उपप्राचार्य अंकुश खोत, पोलीस उपनिरीक्षक शिंगाडे, पोलीस उपनिरीक्षक बगाडे, पोलीस अंमलदार वाकळे आणि महिला पोलीस अंमलदार पोतेकर उपस्थित होते. तसेच महाविद्यालयाच्या प्रतिनिधी ज्योती जगताप, अंकिता चौधर, नाझनीन खान आणि मुक्ता कडणे यांचीही यावेळी प्रमुख उपस्थिती होती.