बारामतीत मोठी खळबळ! बारामती शहर पोलिसांचा धोबीपछाड कुस्तीच्या तालमीत घातक शस्त्रास्त्रांचा साठा रक्ताचा सडा पडण्यापूर्वीच ४ सराईत गुन्हेगार गजाआड.

बारामती: कुस्तीची तालीम म्हणजे पहिलवानांसाठी एक पवित्र ठिकाण. मात्र, याच तालमीतील लाल मातीचा आखाडा रक्ताने माखण्याची मोठी तयारी बारामती शहर पोलिसांनी उधळून लावली आहे. शहरातील शिवाजीनगर, कसबा परिसरातील एका कुस्तीच्या तालमीमध्ये लाल मातीखाली अत्यंत शिताफीने दडवून ठेवलेला घातक शस्त्रास्त्रांचा साठा पोलिसांनी कोम्बिंग ऑपरेशन राबवत जप्त केला आहे. पूर्ववैमनस्यातून शहरात एका गंभीर आणि जीवघेण्या हल्ल्याचा कट रचला जात असल्याची गोपनीय माहिती पोलिसांना मिळाली होती. या कारवाईत पोलिसांनी ४ लोखंडी धारदार कोयते आणि १ तलवार जप्त केली असून, खुनाचा प्रयत्न, दरोडा आणि मोक्कासारख्या गंभीर गुन्ह्यांची पार्श्वभूमी असलेल्या ४ सराईत गुन्हेगारांना बेड्या ठोकल्या आहेत. न्यायालयाने या चारही आरोपींना ६ नोव्हेंबर २०२६ पर्यंत पोलीस कोठडी सुनावली आहे. या धडक कारवाईमुळे बारामतीत टळलेला मोठा अनर्थ आणि गुन्हेगारांची हिंमत यावर मोठी चर्चा सुरू झाली आहे.

​

बारामती शहर व परिसरात घडणाऱ्या हाणामाऱ्या, वाढती दहशत आणि बेकायदेशीर हत्यारांचा वापर रोखण्यासाठी बारामती शहर पोलिसांकडून सध्या विशेष कोम्बिंग ऑपरेशन राबवले जात आहे. याच मोहिमेदरम्यान, ३१ ऑक्टोबर २०२६ रोजी उपविभागीय पोलीस अधिकारी चैतन्य वसंतराव कदम यांना एका अत्यंत विश्वासू खबऱ्याकडून एक धक्कादायक माहिती मिळाली. जामदार रोड, कसबा येथील शिवाजीनगर गणेश मंदिराशेजारी असलेल्या कुस्तीच्या तालमीत काही गुन्हेगारांनी एका मोठ्या हल्ल्याच्या उद्देशाने घातक शस्त्रे गोळा करून लपवून ठेवली आहेत, अशी ती माहिती होती. या माहितीचे गांभीर्य ओळखत, वरिष्ठ अधिकाऱ्यांच्या सूचनेनुसार पोलीस निरीक्षक श्रीशैल चिवडशेट्टी यांच्या नेतृत्वाखाली तत्काळ एका विशेष शोधपथकाची स्थापना करण्यात आली. या पथकाने पंचांना सोबत घेत थेट सदर तालमीवर छापा टाकला. तालमीतील लाल माती उकरून पाहिली असता, त्याखाली लपवून ठेवलेले ४ लोखंडी धारदार कोयते आणि १ तलवार असा ५ घातक शस्त्रांचा साठा पोलिसांच्या हाती लागला. या घटनेने पोलीसही चक्रावून गेले.

शस्त्रे जप्त केल्यानंतर पोलिसांनी तातडीने तपासाची चक्रे फिरवली आणि पाच संशयितांची सखोल चौकशी सुरू केली. या प्रकरणात पोलीस शिपाई गिरीश गणपत नेवसे यांनी दिलेल्या फिर्यादीनुसार बारामती शहर पोलीस ठाण्यात शस्त्र अधिनियम आणि महाराष्ट्र पोलीस अधिनियमानुसार गुन्हा दाखल करण्यात आला. तपासाअंती पोलिसांनी चार मुख्य आरोपींना अटक केली. या चारही जणांवर यापूर्वी संघटित गुन्हेगारी (मोक्का), दरोडा, खुनाचा प्रयत्न आणि अपहरणासारखे तब्बल ११ गंभीर गुन्हे दाखल आहेत.

​अटक करण्यात आलेल्या आरोपींत

योगेश उर्फ धन्या गोकुळ कांबळे (रा. जामदार रोड, कसबा): याच्यावर बारामती शहर व तालुका पोलीस ठाण्यात दरोडा, जबरी चोरी, दुखापत करणे आणि मोक्का कायद्यांतर्गत असे एकूण ४ गंभीर गुन्हे दाखल आहेत.

आदेश संजय कुचेकर (रा. साठेनगर, कसबा): याच्याविरुद्ध वालचंदनगर आणि बारामती शहर पोलीस ठाण्यात दरोडा, अपहरण, खुनाचा प्रयत्न, खंडणी आणि मोक्का कायद्यांतर्गत तब्बल ४ गुन्ह्यांची नोंद आहे.

ऋषिकेश उर्फ पप्पू अनिल चंदनशिवे (रा. साठेनगर, कसबा): या आरोपीविरुद्ध खुनाचा प्रयत्न, दरोडा आणि मोक्का अंतर्गत २ गंभीर गुन्हे दाखल असून हे प्रकरण सध्या न्यायप्रविष्ट आहे.

अभिजीत प्रदीप शिंदे (रा. मळद, ता. बारामती, जि. पुणे): याच्याविरुद्ध बारामती शहर पोलीस ठाण्यात दरोडा आणि मारहाणीचा १ गुन्हा दाखल आहे.

​अटक करण्यात आलेल्या चारही आरोपींना न्यायालयात हजर करण्यात आले असता, न्यायालयाने त्यांना ५ दिवसांची म्हणजेच ६ नोव्हेंबर २०२६ पर्यंत पोलीस कोठडी मंजूर केली आहे. या कोठडीच्या काळात बारामती पोलीस अनेक महत्त्वाच्या प्रश्नांची उत्तरे शोधत आहेत. ही धारदार शस्त्रे नेमकी कोणाकडून व कोठून आणली? ती तालमीत कुणाच्या सांगण्यावरून लपवली? यामागे कुणाचे आर्थिक पाठबळ आहे? आणि सर्वात महत्त्वाचे म्हणजे, पूर्ववैमनस्यातून या शस्त्रांनी नेमका कुणावर हल्ला करण्याचा कट रचला गेला होता? या कटात आणखी कोणाचा सहभाग आहे का, याचा तांत्रिक आणि पुराव्यांच्या आधारे सखोल तपास सुरू आहे. गुन्ह्याचा पुढील तपास पोलीस उपनिरीक्षक सर्जेराव पुजारी करत आहेत.

एका मोठ्या गँगवारची किंवा जीवघेण्या हल्ल्याची तयारी हाणून पाडण्याची ही कारवाई पुणे ग्रामीणचे पोलीस अधीक्षक संदीप सिंह गिल्ल, अपर पोलीस अधीक्षक गणेश बिरादार, उपविभागीय पोलीस अधिकारी चैतन्य कदम आणि बारामती शहरच्या प्रभारी परिविक्षाधीन पोलीस उपअधीक्षक मनीषा ओमासे यांच्या विशेष मार्गदर्शनाखाली पार पडली. प्रत्यक्ष कारवाईत पोलीस निरीक्षक श्रीशैल चिवडशेट्टी यांच्यासह पोलीस उपनिरीक्षक टेळकीकर, पोलीस हवालदार रामचंद्र शिंदे, अभिजीत एकशिंगे, पोलीस शिपाई गिरीश नेवसे, सादिक काझी व अक्षय सिताफ यांनी सहभाग घेतला. गुन्हा नोंदणीची कार्यवाही हवालदार बनसोडे यांनी केली.

​नागरिकांना आणि तरुणांना पोलिसांचे आवाहन

सार्वजनिक शांतता धोक्यात आणणाऱ्या आणि दहशत पसरवणाऱ्या प्रवृत्तींवर बारामती पोलिसांची करडी नजर आहे. परिसरात कोणीही बेकायदेशीर शस्त्रे (कोयते, तलवारी इ.) बाळगत असल्यास किंवा गंभीर गुन्ह्याची तयारी करत असल्याची माहिती मिळाल्यास नागरिकांनी घाबरून न जाता थेट बारामती शहर पोलीस ठाण्याशी किंवा ११२ या आपत्कालीन क्रमांकावर संपर्क साधावा. माहिती देणाऱ्याचे नाव व ओळख पूर्णपणे कायदेशीररित्या गोपनीय ठेवली जाईल. नागरिकांनी अशा गुन्हेगारांशी थेट सामना न करता पोलिसांची मदत घ्यावी, असे आवाहन पोलीस प्रशासनाकडून करण्यात आले आहे. या कारवाईमुळे बारामती शहरातील कायदा व सुव्यवस्था अबाधित राखण्यासाठी पोलिसांची मोहीम यापुढेही अशीच कठोरपणे सुरू राहील, असा स्पष्ट संदेश गुन्हेगारांना देण्यात आला आहे.