ब्रेकिंगमहाराष्ट्र
सुपे पोलीस ठाण्याला मानाचा तुरा! ‘स्मार्ट पोलिसिंग’वर शिक्कामोर्तब; मिळाले ‘आयएसओ ९००१:२०१५’ मानांकन
0
5
5
5
3
3
सुपा (बारामती): बारामती तालुक्यातील सुपा पोलीस स्टेशनने गुणवत्ता व्यवस्थापन प्रणालीत उत्कृष्ट कामगिरी करत आंतरराष्ट्रीय दर्जाचे ‘आयएसओ ९००१:२०१५’ (ISO 9001:2015) मानांकन पटकावले आहे. पोलीस प्रशासनाचे कामकाज अधिक पारदर्शक, शिस्तबद्ध आणि नागरिकाभिमुख करण्याच्या दिशेने टाकलेले हे एक अत्यंत महत्त्वाचे आणि यशस्वी पाऊल मानले जात आहे.
या प्रतिष्ठेच्या मानांकनाची नोंदणी १९ फेब्रुवारी २०२६ रोजी करण्यात आली असून, हे प्रमाणपत्र १९ फेब्रुवारी २०२९ पर्यंत (पुढील तीन वर्षे) वैध राहणार आहे. कायदा आणि सुव्यवस्था अबाधित राखताना उपलब्ध संसाधनांचा प्रभावी वापर, सामाजिक पोलिसिंगची (Social Policing) धडाकेबाज अंमलबजावणी आणि नागरिकांना दिल्या जाणाऱ्या सेवांच्या गुणवत्तेतील सातत्यपूर्ण सुधारणा या अत्यंत कडक निकषांवर पोलीस ठाण्याची तपासणी करण्यात आली होती. यामध्ये सुपे पोलिसांनी आपली गुणवत्ता सिद्ध केली आहे.
या यशाबाबत माहिती देताना सहाय्यक पोलीस निरीक्षक मनोजकुमार नवसरे यांनी सांगितले की, “सध्या पोलीस ठाण्याचे कामकाज ‘स्मार्ट पोलिसिंग’च्या (Smart Policing) संकल्पनेनुसार राबविले जात आहे. यामध्ये खालील सूत्रांचा काटेकोर अवलंब केला जात आहे:”
* कडक पण संवेदनशील: गुन्हेगारांवर वचक आणि नागरिकांशी सौजन्याचा व्यवहार.
* आधुनिक व गतिमान: कामकाजात गती आणि आधुनिक तंत्रज्ञानाचा वापर.
* सतर्क व जबाबदार: कोणत्याही परिस्थितीला तोंड देण्यासाठी २४ तास तत्परता.
* विश्वासार्ह व प्रतिसादक्षम: नागरिकांच्या तक्रारींची तातडीने दखल.
* तंत्रज्ञानस्नेही व प्रशिक्षित दल: बदलत्या काळानुसार पोलिसांना अद्ययावत प्रशिक्षण.
या मानांकनासाठी सुपा पोलीस ठाण्यामध्ये अनेक महत्त्वपूर्ण बदल करण्यात आले आहेत. दैनंदिन नोंदींचे १०० टक्के संगणकीकरण, तक्रार निवारण यंत्रणा अधिक सक्षम करणे, नागरिकांना वेळेत आणि दर्जेदार सेवा पुरवणे, तसेच अंतर्गत कार्यपद्धती अधिक सुटसुटीत आणि उत्तरदायी करण्यावर प्रशासनाने विशेष भर दिला आहे.
