स्वातंत्र्य विद्या मंदिरात विद्यार्थ्यांचा प्रवेशोत्सव उत्साहात संपन्न; सपोनि जीवन मोहिते यांचे विद्यार्थ्यांना मोलाचे मार्गदर्शन

वडगाव निंबाळकर : दिनांक १५ जून २०२६ येथील स्वातंत्र्य विद्या मंदिर शाळेत आज नवीन विद्यार्थ्यांचा शालेय प्रवेशोत्सव आणि नवीन शैक्षणिक वर्षाचा पहिला दिवस अत्यंत उत्साहात साजरा करण्यात आला. या विशेष कार्यक्रमासाठी वडगाव निंबाळकर पोलीस ठाण्याचे नवनियुक्त सहाय्यक पोलीस निरीक्षक (एपीआय) श्री. जीवन मोहिते यांची प्रमुख उपस्थिती लाभली.

कार्यक्रमाच्या सुरुवातीला शाळेत नव्याने दाखल झालेल्या विद्यार्थ्यांचे पुष्पगुच्छ देऊन मोठ्या उत्साहात स्वागत करण्यात आले. यानंतर इयत्ता पाचवी ते दहावीच्या विद्यार्थ्यांना मान्यवरांच्या हस्ते प्रातिनिधिक स्वरूपात शालेय पुस्तकांचे वाटप करण्यात आले.

शिक्षण हीच तुमची समाजातील ओळख सपोनि जीवन मोहिते

नव्या शैक्षणिक वर्षाच्या सुरुवातीला विद्यार्थ्यांना शुभेच्छा देताना सहाय्यक पोलीस निरीक्षक श्री. जीवन मोहिते यांनी अतिशय मोलाचे मार्गदर्शन केले.

पारंपारिक पद्धतीने केवळ व्यासपीठावरून भाषण न करता, त्यांनी थेट विद्यार्थ्यांमध्ये जाऊन आणि चालत त्यांच्याशी मनमोकळा संवाद साधला.

त्यांच्या मार्गदर्शनातील प्रमुख मुद्दे

संस्कारांचे महत्त्व: विद्यार्थ्यांचे हे वय जडणघडणीचे असते. तुम्ही सर्वजण एका मातीच्या गोळ्यासारखे आहात; त्यावर जसे संस्कार होतील, तसे तुम्ही घडणार आहात.
मेहनत आणि शिस्त: काही वेळा शाळा कंटाळवाणी वाटू शकते, परंतु आयुष्यात काहीतरी मोठे घडायचे असेल तर मेहनत ही घ्यावीच लागेल. शाळा शिकत असताना मेहनत आणि शिस्त अत्यंत महत्त्वाची असते.
स्वतंत्र ओळख: प्रत्येक विद्यार्थ्याचा बुद्ध्यांक आणि क्षमता वेगळी असते, त्यामुळे प्रत्येक जण वेगळा घडत असतो. शिक्षण हीच तुमची समाजातील खरी ओळख बनते. त्यांच्या शाळेतील काही आठवणीही त्यांनी यावेळी सांगितल्या.
चांगल्या सवयींचे आचरण: आयुष्यात कायम खरे बोला, सचोटी ठेवा. अभ्यास करण्यासोबतच मैदानावरील खेळ खेळा, नियमित व्यायाम करा आणि चांगले आदर्श डोळ्यासमोर ठेवा.
धोक्यांपासून सावधगिरी: चुकीच्या मित्रांच्या किंवा चुकीच्या लोकांच्या नादाला लागू नका आणि चुकीचे मार्गदर्शन घेऊ नका. सध्याच्या काळात सोशल मीडियापासून दूर राहा. वाईट मार्गांपासून लांब राहून मिळालेल्या संधीचे सोने करा.

मुलींच्या सुरक्षिततेबाबत विशेष आवाहन
यावेळी सपोनि श्री.मोहिते आणि महिला पोलीस हवालदार शुभांगी दनाने यांनी विद्यार्थिनींना सुरक्षेबाबत अत्यंत महत्त्वाच्या सूचना दिल्या. शाळेत येता-जाता कोणतीही अडचण असेल, कोणी त्रास देत असेल किंवा रस्त्याने कोणी काही चुकीचे बोलत असेल, तर थेट माझ्याशी संपर्क साधावा किंवा तात्काळ ११२ या पोलीस क्रमांकावर संपर्क करावा. पोलीस प्रशासन त्वरित योग्य ती कारवाई करेल, असे आवाहन त्यांनी यावेळी केले.

कार्यक्रमादरम्यान, स्वातंत्र्य विद्या मंदिरातील श्री. बारवकर सर यांना नुकत्याच मिळालेल्या आदर्श व गुणवंत शिक्षक पुरस्काराबद्दल सपोनि श्री. जीवन मोहिते यांच्या हस्ते विशेष सन्मान करण्यात आला.

या प्रवेशोत्सवासाठी शाळा व्यवस्थापन समितीचे अध्यक्ष सुशीलकुमार अडागळे, सरपंच तथा प्रशासक श्री. सुनील ढोले, पंचायत समिती सदस्य श्री. जितेंद्र पवार, माजी सरपंच व विद्यमान सदस्य श्री. संजय साळवे, तंटामुक्ती अध्यक्ष श्री. सचिन साळवे, सामाजिक कार्यकर्ते श्री. नितीन गायकवाड, पत्रकार सुनिल जाधव,महिला पोलीस हवालदार शुभांगी दनाने यांच्यासह विद्यार्थ्यांसोबत आलेले पालक, ग्रामस्थ आणि शाळेतील सर्व शिक्षक-शिक्षिका मोठ्या संख्येने उपस्थित होते.

कार्यक्रमाचे प्रास्ताविक श्री. बारवकर सर यांनी केले, सूत्रसंचालनाची जबाबदारी श्री. गायकवाड सर यांनी पार पाडली, तर स्वातंत्र्य विद्या मंदिराचे प्राचार्य श्री. हेमंत तांबे सर यांनी सर्वांचे आभार मानले.