निरा-मोरगाव मार्गावर काळाचा घाला: ‘धोंडे जेवणासाठी’ मामाच्या गावी जाणाऱ्या दोन सख्ख्या बहिणींचा अपघातात करुण अंत

बारामती/वडगाव निंबाळकर:
निरा-मोरगाव राज्यमार्गावर चौधरवाडी फाट्याजवळ (ता. बारामती) शनिवारी सायंकाळी काळजाचा ठोका चुकवणारी एक अत्यंत हृदयद्रावक घटना घडली. मामाच्या गावी ‘धोंडे जेवणासाठी’ आनंदाने निघालेल्या भावंडांच्या दुचाकीला एका भरधाव ट्रकने जोराची धडक दिली. या भीषण अपघातात दोन सख्ख्या बहिणींचा जागीच दुर्दैवी मृत्यू झाला असून, त्यांचा ९ वर्षांचा लहान भाऊ जीवन-मरणाची झुंज देत आहे. क्षणार्धात घडलेल्या या दुर्घटनेमुळे संपूर्ण परिसरात मोठी शोककळा पसरली आहे.
सेजल ज्ञानेश्वर बोडरे (वय १७) आणि अक्षरा ज्ञानेश्वर बोडरे (वय १५, रा. बोडरेवस्ती, ता. फलटण) अशी या अपघातात प्राण गमावलेल्या दुर्दैवी बहिणींची नावे आहेत. तर, पवन ज्ञानेश्वर बोडरे (वय ९) हा चिमुकला गंभीर जखमी झाला असून त्याच्यावर बारामती येथील रुग्णालयात अतिदक्षता विभागात उपचार सुरू आहेत. हे तिघेही इलेक्ट्रिक स्कूटीवरून मूर्टी (ता. बारामती) येथे आपल्या मामाकडे निघाले होते.

प्रत्यक्षदर्शींनी दिलेल्या माहितीनुसार, मोरगावहून नीरेकडे भरधाव वेगात जाणाऱ्या ट्रकने (क्रमांक: DD 1 G 9343) गुळुंचे गावाजवळ चौधरवाडी फाट्यावर या भावंडांच्या स्कूटीला समोरासमोर जोरदार धडक दिली. ही धडक इतकी भयानक होती की स्कूटीचा अक्षरशः चुराडा झाला. धडकेनंतर ट्रकने स्कूटीला तब्बल १५० फूटांपर्यंत फरफटत नेले, ज्यामुळे घटनास्थळ रक्ताने माखले गेले.
अपघातानंतर निर्दयी ट्रकचालक मुकेश मेघवाल याने वाहनासह घटनास्थळावरून पळ काढण्याचा प्रयत्न केला. मात्र, परिसरातील संतप्त आणि जागरूक ग्रामस्थांनी त्याचा पाठलाग करून त्याला काही अंतरावरच गाठले आणि पोलिसांच्या स्वाधीन केले.

या भीषण अपघातामुळे नागरिकांमध्ये तीव्र संताप व्यक्त होत आहे. स्थानिकांच्या म्हणण्यानुसार, हा रस्ता आणि विशेषतः अपघातग्रस्त ठिकाण अनेक वर्षांपासून अत्यंत धोकादायक बनले आहे. येथे वारंवार अपघात होत असल्याने स्पीड ब्रेकर उभारण्याची मागणी नागरिकांनी बांधकाम विभागाकडे अनेकदा केली होती. मात्र, संबंधित यंत्रणांनी याकडे जाणीवपूर्वक दुर्लक्ष केल्यानेच आज दोन निष्पाप तरुणींना आपला जीव गमवावा लागला, असा आरोप ग्रामस्थांनी केला आहे. या ठिकाणी तातडीने ठोस उपाययोजना करण्याची मागणी आता जोर धरत आहे.
घटनेची माहिती मिळताच वडगाव निंबाळकर पोलिस ठाण्याचे सहाय्यक पोलिस निरीक्षक नागनाथ पाटील यांनी आपल्या पथकासह घटनास्थळी धाव घेत पंचनामा केला. सध्या या प्रकरणाचा पुढील तपास पोलिसांकडून सुरू आहे. मात्र, जून महिन्याच्या सुट्ट्या संपून शाळा सुरू होण्याच्या काळात बोडरे कुटुंबावर कोसळलेल्या या दुःखाच्या डोंगरामुळे संपूर्ण पंचक्रोशीत हळहळ व्यक्त होत आहे.