पुणे शहर वाहतूक पोलिसांची धडक कारवाई: ‘ड्रंक अँड ड्राईव्ह’ मोहिमेत २३० तळीराम जाळ्यात येरवडा येथे विशेष समुपदेशन सत्र संपन्न; आता प्रत्येक सोमवारी होणार जनजागृती

पुणे: पुणे शहरातील वाढते अपघात आणि वाहतूक नियमांचे उल्लंघन रोखण्यासाठी पुणे शहर वाहतूक पोलिसांनी कंबर कसली आहे. दिनांक १३ ते १५ फेब्रुवारी २०२६ दरम्यान शहरात राबविलेल्या विशेष ‘ड्रंक अँड ड्राईव्ह’ (DD) मोहिमेअंतर्गत मद्यपान करून वाहन चालवणाऱ्या तब्बल २३० वाहनचालकांवर दंडात्मक कारवाई करण्यात आली आहे. या कारवाईनंतर केवळ दंड वसूल न करता, या चालकांचे मतपरिवर्तन करण्यासाठी विशेष समुपदेशन शिबिराचे देखील आयोजन करण्यात आले होते.

पुणे शहर वाहतूक विभागाने शहराच्या विविध भागांत ही विशेष मोहीम राबवली. यासाठी शहरातील महत्त्वाच्या ३० ठिकाणी नाकाबंदी लावण्यात आली होती. या तीन दिवसांच्या कालावधीत पोलिसांनी केलेल्या तपासणीत २३० वाहनचालक मद्यधुंद अवस्थेत वाहने चालवताना आढळून आले. या सर्वांवर मोटार वाहन कायद्यान्वये कायदेशीर कारवाई करण्यात आली आहे.

केवळ कारवाई करून न थांबता, पोलिसांनी या चालकांसाठी ‘गांधीगिरी’ स्टाइलने समुपदेशन सत्राचे आयोजन केले होते. दिनांक १६ फेब्रुवारी २०२६ रोजी दुपारी ११:०० ते २:०० या वेळेत येरवडा येथील पोलीस उपायुक्त (वाहतूक) कार्यालयात हे शिबिर पार पडले. या शिबिरास कारवाई झालेल्यांपैकी सुमारे २०० वाहनचालक उपस्थित होते.

पोलीस उपायुक्त (वाहतूक) श्री. हिम्मत जाधव यांच्या मार्गदर्शनाखाली हे सत्र पार पडले. यावेळी उपस्थित चालकांना दारू पिऊन वाहन चालवण्याचे गंभीर दुष्परिणाम, यामुळे होणारे जीवघेणे अपघात आणि त्यामुळे होणारी कुटुंबाची हानी यावर मार्गदर्शन करण्यात आले. तसेच मोटार वाहन कायद्यातील तरतुदींची माहिती देण्यात आली. यावेळी उपस्थित सर्व वाहनचालकांनी यापुढे वाहतूक नियमांचे काटेकोर पालन करण्याची आणि सुरक्षित वाहन चालवण्याची लेखी/तोंडी हमी दिली.

वाहतूक शिस्त लावण्यासाठी हा उपक्रम आता नियमित केला जाणार आहे. पुणे वाहतूक विभागाने दिलेल्या माहितीनुसार, यापुढे आठवड्याच्या प्रत्येक सोमवारी दारू पिऊन वाहन चालवताना सापडलेल्या नागरिकांसाठी मार्गदर्शन व समुपदेशन कार्यक्रम नियमितपणे राबविण्यात येणार आहे.

या उपक्रमाचे पुणेकरांकडून स्वागत होत असून, यामुळे शहरातील अपघातांचे प्रमाण कमी होण्यास मदत होईल, अशी आशा व्यक्त केली जात आहे.