पुणे ग्रामीण पोलिसांच्या स्थानिक गुन्हे शाखेची इंदापूर येथे मोठी कारवाई. पुणे आणि सोलापूर जिल्ह्यातील तब्बल १२ गुन्हे उघडकीस.

बारामती : पुणे ग्रामीण पोलिसांच्या स्थानिक गुन्हे शाखेने इंदापूर येथे मोठी कारवाई करत दरोडा, जबरी चोरी, घरफोडी आणि वाहन चोरी करणाऱ्या दोघांना अटक केली आहे. या कारवाईमध्ये पुणे आणि सोलापूर जिल्ह्यातील तब्बल १२ गुन्हे उघडकीस आले असून, आरोपींकडून १५ लाख ५० हजार रुपयांचा मुद्देमाल हस्तगत करण्यात आला आहे. यामध्ये १० तोळे वजनाचे सोन्याचे दागिने आणि दोन मोटारसायकलींचा समावेश आहे.

पुणे ग्रामीणचे पोलीस अधीक्षक श्री. संदीप सिंह गिल्ल यांनी जिल्ह्यातील दरोडा, घरफोडी, जबरी चोरी आणि वाहन चोरीच्या वाढत्या घटनांना आळा घालण्यासाठी आणि प्रलंबित गुन्हे उघडकीस आणण्यासाठी स्थानिक गुन्हे शाखेला विशेष सूचना दिल्या होत्या. या सूचनेनुसार अपर पोलीस अधीक्षक श्री. गणेश बिरादार (बारामती विभाग), अपर पोलीस अधीक्षक डॉ. शुभम कुमार (पुणे विभाग), उपविभागीय पोलीस अधिकारी श्री. चैतन्य कदम (बारामती उपविभाग) आणि स्थानिक गुन्हे शाखेचे प्रभारी पोलीस निरीक्षक श्री. प्रमोद क्षीरसागर यांच्या मार्गदर्शनाखाली पथक समांतर तपास करत होते.

दिनांक १ नोव्हेंबर २०२६ रोजी, स्थानिक गुन्हे शाखेचे पोलीस उपनिरीक्षक सुधीर वाळुंज आणि त्यांचे पथक इंदापूर पोलीस ठाण्याच्या हद्दीत गस्त घालत असताना त्यांना गोपनीय बातमीदारामार्फत महत्त्वाची माहिती मिळाली. घरफोडी आणि चोरीच्या गुन्ह्यातील संशयित इसम मोबाईल उर्फ हरी पवार, राहुल उर्फ चिल्या मंगेश काळे आणि महेश उर्फ मावड्या मंगेश काळे हे इंदापूर येथे येणार असल्याची माहिती पोलिसांना मिळाली होती. या माहितीच्या आधारे पोलिसांनी पुणे-सोलापूर बायपास रोडवरील जगदंब हॉटेलजवळ सापळा रचला.

काही वेळातच तीन जण मोटारसायकलींवरून तेथे आले. पोलिसांची चाहूल लागताच त्यांनी पळून जाण्याचा प्रयत्न केला, मात्र पोलिसांनी पाठलाग करून त्यांना शिताफीने ताब्यात घेतले. पोलिसांनी त्यांच्याकडे कसून चौकशी केली असता, त्यांनी आपली नावे मोबाईल उर्फ हरी पवार (वय २२ वर्षे, रा. सुगाव भोसे, ता. पंढरपूर) आणि दुसरा एक विधिसंघर्षग्रस्त बालक असल्याचे सांगितले. त्यांच्याकडे असलेल्या मोटारसायकलींबाबत विचारपूस केली असता, त्यांनी सुरुवातीला उडवाउडवीची उत्तरे दिली. अधिक चौकशी केली असता, या मोटारसायकली चोरीच्या असल्याचे निष्पन्न झाले.

पोलिसांनी त्यांच्याकडून युनिकॉर्न मोटारसायकल (MH-13 EQ-4910) आणि स्प्लेंडर मोटारसायकल (MH-13-DW-2723) जप्त केली. याव्यतिरिक्त, दौंड पोलीस ठाण्याच्या हद्दीतील खडकी येथील घरफोडीच्या गुन्ह्यात चोरीला गेलेला मोबाईल फोनही त्यांच्याकडून हस्तगत करण्यात आला आहे. तसेच, वडगाव निंबाळकर पोलीस ठाण्यात दाखल असलेला जबरी चोरीचा गुन्हा उघडकीस आला असून, या प्रकरणी शक्तिमान हृबऱ्या काळे (वय २२ वर्षे, रा. माळेगाव, ता. बारामती) आणि एका विधिसंघर्षग्रस्त बालकाला अटक करण्यात आली आहे.

या सर्व आरोपींकडे गुन्ह्याच्या अनुषंगाने सखोल चौकशी केली असता, त्यांनी पुणे ग्रामीण जिल्ह्यात दरोड्याचा १, जबरी चोरीचा १, घरफोडीचे ८ आणि सोलापूर ग्रामीण जिल्ह्यातील मोटारसायकल चोरीचे २ असे एकूण १२ गुन्हे केल्याची कबुली दिली आहे. या १२ गुन्ह्यांमध्ये दौंड पोलीस ठाण्यातील २, इंदापूर पोलीस ठाण्यातील ३, वालचंदनगर पोलीस ठाण्यातील ३, भिगवण पोलीस ठाण्यातील १, वडगाव निंबाळकर पोलीस ठाण्यातील १, करकंब पोलीस ठाण्यातील १ आणि पंढरपूर पोलीस ठाण्यातील १ गुन्ह्याचा समावेश आहे.

सदरची महत्त्वपूर्ण कारवाई पोलीस अधीक्षक श्री. संदीप सिंह गिल्ल, अपर पोलीस अधीक्षक श्री. गणेश बिरादार, अपर पोलीस अधीक्षक डॉ. शुभम कुमार, उपविभागीय पोलीस अधिकारी श्री. चैतन्य कदम यांच्या मार्गदर्शनाखाली करण्यात आली. स्थानिक गुन्हे शाखेचे पोलीस निरीक्षक श्री. प्रमोद क्षीरसागर, इंदापूर पोलीस स्टेशनचे पोलीस निरीक्षक श्री. विलास नाळे, वडगाव निंबाळकर पोलीस स्टेशनचे सपोनी जीवन मोहिते, स्थानिक गुन्हे शाखेचे पोसई सुधीर वाळुंज, पोसई बाळासाहेब कारंडे, पोसई विनोद भोकरे आणि इतर अनेक पोलीस अधिकारी व कर्मचाऱ्यांनी या कारवाईत सहभाग घेतला. या गुन्ह्यांचा पुढील तपास दौंड पोलीस स्टेशन करत आहे.