बारामती पोलीस सक्षम, तलवारी, कोयत्यासह ७ घातक शस्त्रे जप्त; माळेगाव पोलिसांच्या धडक कारवाईने गुन्हेगारी वर्तुळात मोठी खळबळ.

बारामती : तालुक्यातील बारवनगर येथे माळेगाव पोलिसांनी धडक कारवाई करत एका व्यक्तीकडून तब्बल ७ घातक शस्त्रे जप्त केली आहेत. दादा नथुराम शिंदे असे शस्त्रास्त्रे बाळगणाऱ्या आरोपीचे नाव आहे. या कारवाईमुळे परिसरात शस्त्रांचा धाक दाखवून दहशत निर्माण करू पाहणाऱ्या गुन्हेगारी प्रवृत्तींना पोलिसांचा मोठा दणका बसला आहे.
दिनांक १८ सप्टेंबर २०२६ रोजी सायंकाळी ६ वाजता मौजे बारवनगर गावच्या हद्दीत ही कारवाई करण्यात आली. आरोपी दादा शिंदे (रा. बारवनगर, ता. बारामती) याच्या राहत्या घरासमोरील परिसरातून पोलिसांनी तलवारी, कोयता, सत्तुर, सुरा आणि कुऱ्हाड असा विनापरवाना बाळगलेला घातक शस्त्रसाठा जप्त केला. यामध्ये तीन तलवारी (दोन स्टील व एक लोखंडी), एक लोखंडी कोयता, सत्तुर, सुरा आणि लोखंडी पाते असलेली कुऱ्हाड अशा एकूण १,६०० रुपये किमतीच्या ७ हत्यारांचा समावेश आहे. या प्रकरणी माळेगाव पोलीस स्टेशनमध्ये शस्त्र अधिनियम १९५९ चे कलम ४ आणि २५ अन्वये गुन्हा दाखल करण्यात आला आहे.

माळेगाव पोलीस ठाण्याच्या हद्दीत गुन्हेगारीचा बिमोड करण्यासाठी पोलिसांनी विशेष कंबर कसली आहे.

जून २०२६ पासून पोलिसांनी केलेल्या धडक कारवायांमधून आतापर्यंत एकूण ४ अग्निशस्त्रे आणि १२ प्राणघातक हत्यारे जप्त केली आहेत. या कालावधीत एकूण ८ गुन्हे दाखल करून तब्बल १३ आरोपींच्या मुसक्या आवळण्यात पोलिसांना मोठे यश आले आहे.

पोलिसांच्या या सातत्यपूर्ण आणि आक्रमक कारवाईमुळे गुन्हेगारांची आणि भविष्यात गुन्हे करण्याच्या तयारीत असलेल्यांची अक्षरशः पळता भुई थोडी झाली आहे. शस्त्रांची भीती दाखवून सर्वसामान्यांमध्ये दहशत निर्माण करू पाहणाऱ्या किंवा अवैध मार्गाचा अवलंब करणाऱ्या कोणत्याही समाजकंटकाला सोडले जाणार नाही, हा स्पष्ट संदेश या कारवाईतून देण्यात आला आहे. अशा प्रवृत्तींना कायदेशीर मार्गाने योग्य ते शासन करण्यासाठी आणि त्यांची दहशत कायमची मोडून काढण्यासाठी बारामती पोलीस प्रशासन पूर्णपणे सक्षम आहे. कायद्याचा बडगा उगारून पोलिसांनी दिलेल्या या इशाऱ्यामुळे गुन्हेगारी वर्तुळात मोठी खळबळ उडाली असून, नागरिकांमध्ये सुरक्षिततेची भावना निर्माण झाली आहे.

ही महत्त्वपूर्ण कामगिरी पुणे ग्रामीणचे पोलीस अधीक्षक संदीपसिंह गिल, बारामती विभागाचे अपर पोलीस अधीक्षक गणेश बिरादार आणि बारामती उपविभागाचे उपविभागीय पोलीस अधिकारी चैतन्य कदम यांच्या मार्गदर्शनाखाली करण्यात आली. माळेगाव पोलीस स्टेशनचे सहाय्यक पोलीस निरीक्षक कुलदीप संकपाळ, पोलीस उपनिरीक्षक देविदास साळवे, संजय मोहिते आणि पोलीस अंमलदार अजय अवघडे, वैभव मोहोळकर, विजय वाघमोडे, महेश पठारे, ज्ञानेश्वर मोरे, राजू शिंदे, अमोल वाघमारे, सागर पवार यांच्या पथकाने ही कामगिरी यशस्वीरीत्या पार पाडली.