अष्टविनायकातील ‘या’ तीन मंदिरांत भाविकांना महिनाभर प्रवेश बंद; जतन व संवर्धन कामासाठी मोठा निर्णय

पुणे: चिंचवड देवस्थान ट्रस्टच्या अंतर्गत येणाऱ्या अष्टविनायकातील महत्त्वाच्या तीन मंदिरांबाबत एक मोठी बातमी समोर आली आहे. मोरगाव, थेऊर आणि सिद्धटेक येथील श्री गणेश मंदिरे जतन, संवर्धन आणि दुरुस्तीच्या कामासाठी १० मे २०२६ ते ९ जून २०२६ या कालावधीत भाविकांसाठी पूर्णपणे बंद ठेवण्याचा निर्णय घेण्यात आला आहे.

महाराष्ट्र शासनाने अष्टविनायक विकास आराखड्यांतर्गत मंदिरांच्या देखभालीसाठी निधी उपलब्ध करून दिला आहे. पुरातत्व विभागामार्फत या मंदिरांच्या मुख्य गाभाऱ्याचे आणि सभामंडपाचे मूळ पौराणिक काळाप्रमाणे सुबक दगडी बांधकाम व संवर्धनाचे काम हाती घेण्यात आले आहे. हे काम तांत्रिकदृष्ट्या गुंतागुंतीचे असल्याने आणि भाविकांच्या सुरक्षेचा विचार करून हा निर्णय घेण्यात आला आहे.

       महत्त्वाच्या सूचना आणि निर्बंध

कालावधी: १० मे २०२६ ते ९ जून २०२६ पर्यंत मंदिरे दर्शनासाठी बंद राहतील.
नित्य पूजा: मंदिर परिसर बंद असला तरी श्रींची नित्य पूजा, अर्चा आणि इतर धार्मिक विधी परंपरेनुसार सुरू राहतील.
प्रवेश बंदी: या काळात भाविकांना मंदिर परिसरात प्रवेश किंवा थेट दर्शनाची सुविधा उपलब्ध असणार नाही.
अधिकृत व्यक्तींनाच परवानगी: केवळ पुजारी, बांधकाम यंत्रणा, कर्मचारी आणि ट्रस्टचे विश्वस्त यांनाच प्रवेश दिला जाईल.

     भाविकांना सहकार्याचे आवाहन

“ही विकासकामे मंदिराच्या दीर्घकालीन सुरक्षिततेसाठी आणि भाविकांच्या सोयीसाठी अत्यंत आवश्यक आहेत. हे काम वेळेत पूर्ण व्हावे, यासाठी भाविकांनी आणि स्थानिक नागरिकांनी मंदिर प्रशासन व पोलीस प्रशासनास सहकार्य करावे,” असे आवाहन चिंचवड देवस्थान ट्रस्टचे मुख्य विश्वस्त श्री मंदार महाराज देव यांनी केले आहे.
सह धर्मादाय आयुक्त, पुणे विभाग आणि पुरातत्व विभाग यांच्या सूचनेनुसार हा महत्त्वपूर्ण ठराव घेण्यात आला असून, भाविकांनी या बदलाची नोंद घ्यावी, असे ट्रस्टतर्फे कळवण्यात आले आहे.