अपघातमहाराष्ट्र
कत्तलीसाठी गोवंशाची अवैध वाहतूक: माळेगाव हद्दीत कारच्या अपघातात अनेक वासरांचा मृत्यू, तिघांवर गुन्हा दाखल
0
9
6
5
0
5
बारामती (प्रतिनिधी): कत्तलीच्या उद्देशाने एका होंडा सिटी कारमधून दाटीवाटीने आणि क्रूरपणे गोवंशाची अवैध वाहतूक केली जात असताना, कारचा अपघात होऊन दोन वासरांचा मृत्यू झाल्याची धक्कादायक घटना माळेगाव पोलीस स्टेशनच्या हद्दीत उघडकीस आली आहे. या अपघातानंतर आरोपींनी जनावरे आणि वाहन तिथेच सोडून पोबारा केला. या प्रकरणी माळेगाव पोलिसांनी तिघांवर विविध कायद्यांतर्गत गुन्हा दाखल केला असून तब्बल २ लाख ३४ हजार रुपयांचा मुद्देमाल जप्त केला आहे.
ही घटना गुरुवारी, १५ ऑक्टोबर २०२६ रोजी सकाळी ७.२५ वाजण्याच्या सुमारास कऱ्हावागज (ता. बारामती) गावच्या हद्दीत बारामती-मोरगाव रोडवरील कृषी गार्डन हॉटेलजवळ घडली.
मुबिन अल्ताफ कुरेशी, अल्ताफ शफी कुरेशी आणि आक्रम अल्ताफ कुरेशी (सर्व रा. कुरेशी मोहल्ला, मंगळवार पेठ, फलटण, जि. सातारा) अशी गुन्हा दाखल झालेल्या आरोपींची नावे आहेत. या प्रकरणी माळेगाव पोलीस स्टेशनचे पोलीस शिपाई आबासाहेब नामदेव लंगुटे (वय ४६) यांनी फिर्याद दिली आहे.
पोलिसांनी दिलेल्या माहितीनुसार, मुबिन कुरेशी याच्या नावावर असलेल्या होंडा सिटी कारमधून (MH 06 W 6108) आरोपी अल्ताफ शफी कुरेशी आणि आक्रम अल्ताफ कुरेशी हे कत्तलीसाठी जनावरांची वाहतूक करत होते. त्यांनी या छोट्या कारमध्ये चक्क १७ जर्सी नर जातीची वासरे आणि १ म्हशीचे रेडकू अशी एकूण १८ लहान जनावरे (वय अंदाजे दोन महिने) दाटीवाटीने आणि निर्दयपणे कोंबली होती.
कार चालक अल्ताफ शफी कुरेशी याने हे वाहन भरधाव वेगात आणि निष्काळजीपणे चालवल्याने कारचा अपघात झाला. या अपघातात दोन गोवंश जातीच्या जर्सी वासरांचा दुर्दैवी मृत्यू झाला. अपघात झाल्यानंतर पोलिसांना किंवा कोणालाही माहिती न देता आरोपी घटनास्थळावरून पळून गेला.
