इन्स्टाग्राम रीलचा नाद, थेट पिस्तुलापर्यंत वाद! तांदुळवाडीत थरार: रील डिलीट करण्यावरून तरुणाचे अपहरण आणि मारहाण; बारामती पोलिसांची ‘सिंघम’ स्टाईल कारवाई

बारामती: सोशल मीडियाचे व्यसन आणि त्यातून निर्माण होणारा दुराभिमान किती टोकाला जाऊ शकतो, याचा एक भयानक अनुभव बारामती तालुक्यातील तांदुळवाडी येथे आला आहे. मंदिरात पुण्यकर्म करत असताना काढलेली एक ‘इन्स्टाग्राम रील’ दोन गटांतील रक्तरंजित संघर्षाचे कारण ठरली. अवघ्या १८ वर्षांच्या तरुणाला पिस्तुलाचा धाक दाखवून, घरात डांबून अमानुष मारहाण करण्यात आली. मात्र, बारामती तालुका पोलिसांनी या प्रकरणाचा वेगाने तपास करत दोन मुख्य आरोपींच्या मुसक्या आवळल्या आहेत.

१८ जानेवारीची रात्र. तांदुळवाडी येथील जागृत देवस्थान श्री भैरवनाथ मंदिर. गावात धार्मिक कार्यक्रमाची धामधूम सुरू होती. भाविकांच्या पंगती उठत होत्या आणि १८ वर्षीय सार्थक लक्ष्मण अंबुरे हा तरुण भक्तीभावाने जेवण वाढण्याचे काम करत होता.

याच गर्दीत कुणीतरी सार्थकचा व्हिडिओ काढला आणि तो इन्स्टाग्रामवर अपलोड केला. आपली परवानगी न घेता व्हिडिओ टाकल्याचे समजताच सार्थकने तो व्हिडिओ डिलीट करण्यास सांगितले. पण इथेच ठिणगी पडली. रील डिलीट करण्याच्या क्षुल्लक कारणावरून वादाची ठिणगी पडली आणि त्याचे रूपांतर मोठ्या गुन्ह्यात झाले.

वाद मिटल्यासारखे वाटत असतानाच, आरोपी पप्पू शितोळे याने सार्थकला “काम आहे” असे सांगून मंदिराच्या मागच्या बाजूला नेले. तिथे आधीच गणेश सुभाष जाधव, अभिजीत शेळके, अरुण जाधव आणि इतर काही जण दबा धरून बसले होते.

जणू काही एखादा चित्रपटातील सीन असावा, तसे सार्थकला शिवीगाळ करत जबरदस्तीने यश शितोळे याच्या घरात ओढत नेण्यात आले. तिथे त्याला खाली पाडून लाथा-बुक्क्यांनी आणि लोखंडी गजाने बेदम मारहाण करण्यात आली. दहशतीची परिसीमा म्हणजे, सराईत गुन्हेगार गणेश जाधव याने कमरेला लावलेले पिस्तूल काढून सार्थकला जीवे मारण्याची धमकी दिली. “हा प्रकार कुणाला सांगितला तर जिवंत सोडणार नाही,” अशी धमकी पप्पू शितोळेने दिल्याने सार्थक प्रचंड घाबरला होता.

मारहाणीत पाठीवर गंभीर जखमा आणि जीवाला धोका असल्याने सार्थकने रात्रभर तोंड उघडले नाही. मात्र, दुसऱ्या दिवशी वेदना असह्य झाल्याने त्याने आईला सर्व हकीकत सांगितली आणि थेट बारामती तालुका पोलीस ठाणे गाठले.

घटनेचे गांभीर्य ओळखून पोलीस निरीक्षक चंद्रशेखर यादव यांनी क्षणाचाही विलंब न करता आपली टीम रवाना केली. पोलिसांनी सापळा रचून या प्रकरणातील मुख्य सूत्रधार गणेश सुभाष जाधव (वय ३४) आणि पप्पू शितोळे (वय ३४) यांना बेड्या ठोकल्या. न्यायालयाने त्यांना तीन दिवसांची पोलीस कोठडी सुनावली आहे. विशेष म्हणजे आरोपी गणेश जाधव याच्यावर यापूर्वीही दोन गंभीर गुन्हे दाखल असल्याची माहिती समोर आली आहे.

या नाटकाला अजून एक दुसरी बाजूही आहे. याच वादातून दुसऱ्या गटातील एका अल्पवयीन मुलाच्या डोक्यात कोयता लागल्याची घटना घडली आहे. या मुलाच्या तक्रारीवरून सार्थक अंबुरे, आकाश अंबुरे, बापू अंबुरे, पोपट अंबुरे आणि लखन अंबुरे यांच्यावर देखील गंभीर दुखापत केल्याचा गुन्हा दाखल करण्यात आला आहे. दोन्ही बाजूंनी गुन्हे दाखल झाल्याने गावात तणावाचे वातावरण होते, पण पोलिसांनी परिस्थिती नियंत्रणात आणली आहे.

सदरची कामगिरी पोलीस अधीक्षक संदीपसिंह गील, अपर पोलीस अधीक्षक गणेश बिरादार, उपविभागीय पोलीस अधिकारी सुदर्शन राठोड यांच्या मार्गदर्शनाखाली पोलीस निरीक्षक चंद्रशेखर यादव, पो.उप.नि. युवराज पाटील आणि त्यांच्या टीममधील सुरेंद्र वाघ, भारत खारतोडे, जितेंद्र शिंदे, मनोज पवार, दादा दराडे व आफ्रिन शेख यांनी केली आहे.