पुणे पोलिसांचा वाहतूक नियमांचे उल्लंघन करणाऱ्यांना मोठा दणका; ३ दिवसांत ५१+ लाखांचा दंड वसूल!

​पुणे: शहरातील विस्कळीत वाहतूक आणि नियमांचे उल्लंघन करणाऱ्या वाहनचालकांविरुद्ध पुणे शहर वाहतूक विभागाने आक्रमक पवित्रा घेतला आहे. २७ ते २९ मार्च दरम्यान राबविलेल्या एका विशेष मोहिमेत पोलिसांनी ट्रिपल सीट, मॉडिफाईड सायलेंसर आणि ड्रिंक अँड ड्राईव्ह करणाऱ्यांवर कारवाईचा बडगा उगारला. या धडक मोहिमेत तब्बल ५१ लाख रुपयांहून अधिक दंड वसूल करण्यात आला असून ८५२ वाहने जप्त करण्यात आली आहेत.

​शहरात वाढते ध्वनीप्रदूषण आणि कर्णकर्कश आवाजामुळे नागरिकांना होणारा त्रास लक्षात घेता, पोलिसांनी मॉडिफाईड सायलेंसर वापरणाऱ्या २३४ वाहनांवर कारवाई केली. विशेष म्हणजे, या मोहिमेत हे सर्व नियमबाह्य सायलेंसर जागीच काढून जप्त करण्यात आले आहेत.

​ट्रिपल सीट: तीन दिवसांत १२६५ वाहनचालकांवर कारवाई.

​वाहन जप्ती: नियमांचे गंभीर उल्लंघन केल्याप्रकरणी एकूण ८५२ वाहने पोलिसांकडून जप्त.

​ड्रिंक अँड ड्राईव्ह: शहरात ३० विविध ठिकाणी नाकाबंदी करण्यात आली होती, ज्यामध्ये १८६ मद्यपी वाहनचालकांवर गुन्हे दाखल करण्यात आले.

​वाहतूक विभागाने दिलेल्या माहितीनुसार, केवळ या तीन दिवसांच्या विशेष मोहिमेत ट्रिपल सीट आणि सायलेंसर कारवाईतून ५ लाख ७१ हजार रुपये, तर इतर वाहतूक नियमभंगाच्या प्रकरणांतून ५१ लाख ५४ हजार २०० रुपये असा एकूण दंड वसूल करण्यात आला आहे.

​पुणे शहर वाहतूक शाखेने नागरिकांना कडक इशारा दिला आहे की, मॉडिफाईड सायलेंसरमुळे मोठ्या प्रमाणावर ध्वनीप्रदूषण होते, जे आरोग्यास घातक आहे. सुरक्षित प्रवासासाठी ट्रिपल सीट प्रवास टाळावा आणि मद्यपान करून वाहन चालवू नये. वाहतूक नियमांचे उल्लंघन करणाऱ्यांवर यापुढील काळातही अशाच प्रकारे कठोर कारवाई सुरूच राहील, असे स्पष्ट करण्यात आले आहे.

​पुणे शहर वाहतूक शाखा – ‘तुमचा प्रवास, आमची जबाबदारी’