पुणे, पिंपरी-चिंचवडमधील २३ बळींनंतर प्रशासन हादरले! बारामतीत अवैध दारूभट्ट्यांवर पोलिसांचा ‘जेसीबी’ स्ट्राईक

​बारामती: पिंपरी चिंचवड आणि पुणे परिसरात विषारी दारूने तब्बल २३ जणांचे बळी घेतल्यानंतर संपूर्ण राज्यभरात खळबळ उडाली आहे. या गंभीर घटनेची राज्य शासनाने तातडीने दखल घेतल्यानंतर पुणे ग्रामीण पोलीस दलाने अवैध दारू धंद्यांविरुद्ध युद्धपातळीवर मोहीम उघडली आहे. याच पार्श्वभूमीवर बारामती शहर व तालुक्यात अवैध हातभट्ट्यांवर पोलिसांचा बडगा कोसळला असून, वडगाव निंबाळकर पोलिसांनी वाघळवाडी (ता. बारामती) हद्दीत थेट जेसीबी लावून अनेक वर्षांपासून राजरोसपणे सुरू असलेली अवैध दारूभट्टी मुळासकट उद्ध्वस्त केली आहे.

​पुण्यातील धक्कादायक घटनेनंतर वरिष्ठ पातळीवरून आलेल्या ठोस आदेशांमुळे बारामती तालुका, माळेगाव आणि वडगाव निंबाळकर पोलीस ठाण्यांच्या हद्दीत धडक कारवाईचे सत्र सुरू झाले आहे. पिढीजात आणि अनेक वर्षांपासून छुप्‍या मार्गाने सुरू असलेल्या हातभट्ट्या आता पोलिसांच्या रडारवर आल्या आहेत.

​वाघळवाडी ग्रामपंचायत ता.बारामती हद्दीतील कन्नडवस्ती येथे पाटबंधारे विभागाच्या जागेत, नीरा डावा कालव्यालगत वर्षानुवर्षे बेकायदेशीरपणे गावठी दारूची निर्मिती आणि विक्री सुरू होती. या दारूधंद्यांमुळे परिसरात गुन्हेगारी वाढून कायदा व सुव्यवस्थेचा गंभीर प्रश्न निर्माण झाला होता. वाघळवाडी ग्रामसभेने हे धंदे बंद करण्यासाठी ठराव करत पोलिसांशी पत्रव्यवहारही केला होता. अखेर, विषारी दारूच्या बळींनंतर संतप्त ग्रामस्थ आणि आक्रमक झालेले वडगाव निंबाळकर पोलीस यांनी संयुक्तपणे मोठी कारवाई केली.

​सकाळी ११ ते सायंकाळी ५ या वेळेत वडगाव निंबाळकर पोलीस ठाण्याचे सहाय्यक पोलीस निरीक्षक नागनाथ पाटील आणि पोलीस उपनिरीक्षक राहुल साबळे यांनी मोठ्या फौजफाट्यासह या अड्ड्यावर सनसनाटी छापा टाकला.

​या कारवाईदरम्यान पोलिसांना जागीच गावठी दारूचे ५ मोठे कॅन मिळून आले. यावेळी पोलिसांनी कोणतीही दयामाया न दाखवता थेट जेसीबी पाचारण केला. दारूभट्टी निर्मितीची जागा आणि तिथपर्यंत पोहोचणारा छुपी वाट असलेला रस्ता पोलिसांनी पूर्णपणे उखडून टाकला. तसेच, पत्र्याचे शेड आणि दारू विक्रीसाठी उभारलेली टपरीही जमीनदोस्त केली. पोलिसांच्या या आक्रमक पवित्र्यामुळे परिसरातील अवैध धंदेवाल्यांचे धाबे दणाणले आहेत.

​पोलिसांच्या कारवाईनंतरही अनेकदा हे गुन्हेगार पुन्हा दुसऱ्या जागी बस्तान मांडतात. यामुळे अनेकांच्या संसाराची राखरांगोळी होत असल्याने, अशा तात्पुरत्या कारवाईवर न थांबता या मृत्यूच्या सौदागरांवर कायमस्वरूपी वचक निर्माण करावा, अशी आग्रही मागणी वाघळवाडीतील स्थानिक ग्रामस्थांनी केली आहे.

​या धडक कारवाईनंतर संबंधित अवैध व्यावसायिकांना पोलिसांकडून कायदेशीर नोटिसा बजावण्यात आल्या असून, पुन्हा हा काळा बाजार सुरू केल्यास थेट कठोर कारवाईचा सज्जड इशारा देण्यात आला आहे. प्रशासनाच्या या धडक कारवाईमुळे आता बारामती तालुक्यातील अवैध धंद्यांचे समूळ उच्चाटन होणार का, याकडे सर्व नागरिकांचे लक्ष लागून आहे.