माळेगाव बुद्रुक येथे कंत्राटदारावर जीवघेणा हल्ला; पाच अज्ञातांविरुद्ध गुन्हा दाखल

बारामती : माळेगाव बुद्रुक (ता. बारामती) येथील बास्केट बाजारसमोरील मोकळ्या जागेत एका कंत्राटदारावर पाच अज्ञात इसमांनी लाकडी काठी आणि दगडाने जीवघेणा हल्ला केल्याची धक्कादायक घटना घडली आहे. याप्रकरणी माळेगाव पोलीस स्टेशनमध्ये पाच अनोळखी आरोपींविरुद्ध भारतीय न्याय संहितेच्या विविध कलमान्वये गुन्हा दाखल करण्यात आला आहे.

फिर्यादी दिलीप धनसिंग जगताप (वय ५२, रा. धुमाळवाडी/बारामती) हे शेती व कंत्राटदारीचा व्यवसाय करतात. बुधवार, दि. १८ मार्च २०२६ रोजी सकाळी १०:५५ च्या सुमारास जगताप हे माळेगाव बुद्रुक येथील बास्केट बाजार समोरील मोकळ्या जागेत गेले होते. यावेळी २५ ते ३० वयोगटातील पाच अज्ञात इसम त्या ठिकाणी आले. त्यांनी “आमचे पैसे का देत नाही?” असे म्हणून जगताप यांच्याशी वाद घालण्यास सुरुवात केली.

वादाचे रूपांतर गंभीर हाणामारीत झाले. पाचही आरोपींनी संगनमत करून जगताप यांना शिवीगाळ करत लाथाबुक्क्यांनी मारहाण केली. इतक्यावरच न थांबता, फिर्यादीला जीवे मारण्याच्या उद्देशाने त्यांच्या डोक्यात लाकडी काठीने आणि दगडाने जोरात प्रहार करण्यात आले. या हल्ल्यात जगताप हे गंभीर जखमी झाले आहेत.

या घटनेनंतर दिलीप जगताप यांनी माळेगाव पोलीस ठाण्यात फिर्याद दिली असून, पोलिसांनी खालील कलमान्वये गुन्हा नोंदवला आहे.

कलम: ७१/२०२६ भा. न्याय. संहिता १०९(१), १८९(२), १९०, १९१(१), १९१(२), १९१(३), ३(५) सह महाराष्ट्र पोलीस अधिनियम १३५.

या घटनेची माहिती मिळताच बारामती उपविभागीय पोलीस अधिकाऱ्यांनी घटनास्थळाला भेट दिली आहे. सपोनि सचिन लोखंडे यांच्या मार्गदर्शनाखाली पोसई खटावकर या प्रकरणाचा पुढील तपास करत आहेत. आरोपी अद्याप फरार असून पोलीस त्यांचा शोध घेत आहेत.