महिलेवर प्राणघातक हल्ला करून फरार झालेला सराईत गुन्हेगार जेरबंद; बारामती तालुका पोलिसांची मोठी कारवाई

बारामती : जुन्या वादातून सोनगाव (ता. बारामती) येथे एका महिलेच्या घरात घुसून तिच्यावर धारदार चाकूने जीवघेणा हल्ला करणाऱ्या फरार आरोपीला अटक करण्यात बारामती तालुका पोलिसांना यश आले आहे. अटक करण्यात आलेला आरोपी सराईत गुन्हेगार असून त्याच्यावर चोरी आणि मारामारीचे एकूण ९ गुन्हे दाखल आहेत.

२२ डिसेंबर २०२५ रोजी सोनगाव येथील कांचन साक्षर भोसले (वय ३८) या आपल्या राहत्या घरी असताना, आरोपी नियोजन संदीप भोसले याने घराचा दरवाजा तोडून आत प्रवेश केला. जुन्या भांडणाची कुरापत काढून त्याने कांचन यांच्यावर जीवे मारण्याच्या उद्देशाने धारदार चाकूने हल्ला केला. या हल्ल्यात त्यांच्या उजव्या खांद्याला गंभीर दुखापत झाली होती. या घटनेनंतर आरोपी परिसरातून फरार झाला होता. २४ डिसेंबर रोजी याप्रकरणी बारामती तालुका पोलीस ठाण्यात गुन्हा दाखल करण्यात आला होता.

पोलीस निरीक्षक चंद्रशेखर यादव यांच्या मार्गदर्शनाखाली या प्रकरणाचा तपास सुरू होता. तांत्रिक विश्लेषण आणि गोपनीय माहितीच्या आधारे पोलिसांनी आरोपीचा छडा लावला. पोलीस उपनिरीक्षक युवराज पाटील, सहाय्यक फौजदार सुरेंद्र वाघ, पोलीस हवालदार भारत खारतोडे, राजू बन्ने, मनोज आणि जितेंद्र शिंदे यांच्या पथकाने सापळा रचून आरोपीला शिताफीने अटक केली.

अटक करण्यात आलेला नियोजन भोसले हा पोलिसांच्या रेकॉर्डवरील सराईत गुन्हेगार आहे. त्याच्यावर आतापर्यंत खालीलप्रमाणे गुन्हे दाखल आहेत:

 * बारामती शहर पोलीस स्टेशन: ७ गुन्हे (चोरी आणि मारामारी)

 * वालचंदनगर पोलीस स्टेशन: २ गुन्हे

 * फरार: आरोपी एकूण ४ गुन्ह्यांमध्ये पोलिसांना चकवा देऊन फरार होता.

बारामती तालुका पोलिसांनी आरोपीवर भारतीय न्याय संहिता (BNS) कलम १०९, ११८(१), ११५(२), १८९(२), १९०, १९१(१)(२)(३) अंतर्गत गुन्हा नोंदवला आहे. अटकेनंतर त्याला पुढील न्यायालयीन प्रक्रियेसाठी पुण्याच्या येरवडा कारागृहात रवानगी करण्यात आली आहे. या प्रकरणाचा पुढील तपास पोलीस उपनिरीक्षक युवराज पाटील व पोलीस अंमलदार राजू बन्ने करत आहेत.

बारामती तालुका पोलिसांच्या या धडक कारवाईमुळे परिसरातून समाधान व्यक्त केले जात असून, गुन्हेगारांमध्ये दहशतीचे वातावरण पसरले आहे.