श्रीपती बाबा महाराज विद्यालयात बक्षीस वितरण व विविध गुणदर्शन सोहळा संपन्न; शाळेच्या विकासासाठी मान्यवरांचा पुढाकार

महाळुंगे (ता. ३०): येथील जनता शिक्षण संस्थेचे श्रीपती बाबा महाराज माध्यमिक विद्यालय, महाळुंगे इंगळे येथे ‘बक्षीस वितरण व विविध गुणदर्शन’ कार्यक्रम मोठ्या उत्साहात पार पडला. यावेळी शाळेच्या विकासासाठी माजी विद्यार्थ्यांनी व देणगीदारांनी भरघोस मदत जाहीर केली, तर शाळेच्या परिसरातील कचरा डेपोचा प्रश्न सोडविण्यासाठी राजकीय व सामाजिक स्तरावरून प्रयत्न करण्याचे आश्वासन देण्यात आले.

कार्यक्रमाच्या अध्यक्षस्थानी जनता शिक्षण संस्थेचे अध्यक्ष प्रा. जयप्रकाशजी जगताप होते. कार्यक्रमाची सुरुवात श्रीपती बाबा महाराज, गुरुवर्य बा. ग. जगताप, संस्थापक जयंतराव तथा दादासाहेब जगताप आणि जयंती तथा माईसाहेब जगताप यांच्या प्रतिमेचे पूजन करून करण्यात आली. यावेळी उपस्थित मान्यवरांचे स्वागत ‘संविधान प्रत’, शॉल व बुके देऊन करण्यात आले.

शाळेसाठी मदतीचा ओघ

या कार्यक्रमात शाळेच्या माजी विद्यार्थिनी व ‘शिवम् उद्योग’च्या संचालिका सौ. आश्विनी सोमनाथ तरस यांनी शाळेस २५,००० रुपयांची देणगी दिली, तर मोई गावच्या माजी सरपंच सौ. पल्लवीताई गवारी यांनी १०,००० रुपयांची मदत केली. या दोघींनीही आपल्या मनोगतात शाळेच्या आठवणींना उजाळा दिला. “महाळुंगे इंगळे ग्रामपंचायत व देवस्थान ट्रस्ट हे श्रीमंत असूनही, बहुजनांच्या शिक्षणासाठी उभ्या राहिलेल्या या पहिल्या शाळेत भौतिक सुविधांचा अभाव आहे,” अशी खंत त्यांनी व्यक्त केली. ग्रामपंचायत व देवस्थान ट्रस्टने या शाळेचा कायापालट करून तिला परिसरातील एक नंबरची शाळा बनवावे, असे आवाहन त्यांनी केले.

कचरा डेपो हलविण्याची मागणी

आर.पी.आय.च्या प्रदेश सचिव संघमित्राताई गायकवाड यांनी शाळेच्या शेजारील कचरा डेपोमुळे विद्यार्थ्यांच्या आरोग्यास धोका निर्माण होत असल्याचे निदर्शनास आणून दिले. हा डेपो ग्रामपंचायतीने त्वरित हलवावा, अशी मागणी त्यांनी केली. भाजपचे तालुका उपाध्यक्ष काळूराम उर्फ बाळासाहेब भोपे यांनीही, “ग्रामस्थ, ग्रामपंचायत व संस्था यांनी समन्वयातून हा कचरा प्रश्न सोडवावा. शाळेचा श्वास मोकळा करण्यासाठी मी स्वतः माननीय मुख्यमंत्री महोदयांशी चर्चा करेन,” असे आश्वासन दिले.

इतर देणग्या आणि उपक्रम

 * प्रशालेचे मुख्याध्यापक वाय. जी. कांबळे यांनी शाळेस १०,००० रुपये किमतीचे ‘वक्ता स्टँड’ भेट दिले.

 * श्री. आढाव सर यांनी ५,००० रुपये किमतीचे दोन स्पीकर भेट दिले.

 * आयु. विशाल गायकवाड (अध्यक्ष, आ.भा.बौ.म. खेड) यांनी विद्यार्थ्यांना बसण्यासाठी ५,००० रुपयांच्या सतरंजी भेट दिल्या.

पोलीस निरीक्षक विजय ढमाळ यांनी विद्यार्थ्यांना मोबाईलच्या अतिवापरापासून दूर राहण्याचा आणि मुलींना ‘दामिनी पथका’च्या संपर्कात राहण्याचा सल्ला दिला. संस्थेचे सचिव प्रा. सुभाष जावळे यांनी लवकरच शाळेच्या इमारतीचे नूतनीकरण व संरक्षक भिंतीचे काम सुरू करण्याचे जाहीर केले.

मुख्याध्यापकांचा गौरव

विद्यार्थ्यांसाठी आरोग्य शिबिरे, क्रीडा महोत्सव आणि सांस्कृतिक कार्यक्रम राबवून शाळेला ‘उपक्रमशील शाळा’ बनविल्याबद्दल मुख्याध्यापक वाय. जी. कांबळे यांचा संस्थेचे अध्यक्ष प्रा. जयप्रकाशजी जगताप यांच्या हस्ते ‘उपक्रमशील मुख्याध्यापक’ म्हणून विशेष सत्कार करण्यात आला. तसेच उपस्थित पत्रकारांचाही ‘संविधान प्रत’ देऊन सन्मान करण्यात आला.

या कार्यक्रमास संस्थेचे पदाधिकारी रामभाऊ मिंडे, महेशकुमार आगम, कविताताई गोरे, रविंद्रनाथ नवले, बाळासाहेब पौळ, आप्पा महाळुंगकर, शाळा व्यवस्थापन समितीच्या अध्यक्षा उषा कांबळे तसेच ग्रामस्थ व पालक मोठ्या संख्येने उपस्थित होते.

कार्यक्रमाचे प्रास्ताविक श्री. आढाव यांनी केले, सूत्रसंचालन श्री. कवडे यांनी केले, तर आभार श्री. पाटील यांनी मानले.