बारामती व माळेगाव नगरपरिषद मतमोजणी: उद्या वाहतूक व्यवस्थेत मोठे बदल; जाणून घ्या पर्यायी मार्ग

बारामती: बारामती आणि माळेगाव नगरपरिषद सार्वत्रिक निवडणूक २०२५ च्या मतमोजणीच्या पार्श्वभूमीवर, कायदा व सुव्यवस्था राखण्यासाठी आणि वाहतूक कोंडी टाळण्यासाठी जिल्हाधिकारी जितेंद्र डुडी यांनी उद्या (दि. २१ डिसेंबर) वाहतूक व्यवस्थेत महत्त्वाचे बदल केले आहेत. बारामती शहर आणि माळेगाव बुद्रुक परिसरातील वाहतूक पर्यायी मार्गाने वळविण्यात येणार असून नागरिकांनी सहकार्य करण्याचे आवाहन प्रशासनातर्फे करण्यात आले आहे.

बारामती शहरातील वाहतूक बदल (सकाळी ५ ते रात्री ८ वाजेपर्यंत)

बारामती नगरपरिषदेची मतमोजणी म.ए.सो. हायस्कूल येथे होणार आहे. यामुळे खालीलप्रमाणे बदल करण्यात आले आहेत:

 * भिगवणकडे जाणारी वाहतूक: तीन हत्ती चौक – माळावरची देवी – कोर्ट कॉर्नर मार्गे रिंग रोडने वळविण्यात येईल. तसेच, भिगवण चौक – ॲडव्हायझर चौक – टी.सी. कॉलेज – सातव चौक मार्गे सम्यक चौक – भिगवण रोड असा मार्ग असेल.

 * बारामतीकडे येणारी वाहतूक: भिगवण रोडकडून येणारी वाहने कोर्ट कॉर्नर – माळावरची देवी – मोतीबाग चौक – मार्केट यार्ड मार्गे येतील. तसेच, सम्यक चौक – सातव चौक – भिगवण चौक असाही पर्याय उपलब्ध असेल.

 * विशेष सूचना: तिरंगा चौक रेल्वे स्टेशन गेट सर्व्हिस रोड चालू ठेवण्यात येणार आहे.

माळेगाव बु. वाहतूक बदल (सकाळी ८ ते सायंकाळी ६ वाजेपर्यंत)

माळेगाव नगरपरिषदेची मतमोजणी क्रीडा संकुल, माळेगाव बु. येथे होणार आहे.

 * बंद रस्ता: माळेगाव पोलीस ठाण्यासमोरील गोफणेवस्ती फाटा ते जोशीवाडा कॉर्नर या दरम्यानचा ५०० मीटर अंतरावरील रस्ता सर्व प्रकारच्या वाहतुकीसाठी बंद राहील.

 * पर्यायी मार्ग: ही वाहतूक गोफणेवस्ती प्राथमिक आरोग्य केंद्र – न्यू इंग्लिश स्कूल – साठेनगर – राजहंस चौक या मार्गाने वळविण्यात आली आहे.

मतमोजणी केंद्रांवर होणारी गर्दी आणि सुरक्षा व्यवस्था लक्षात घेता, नागरिकांनी या बदलांची नोंद घेऊन पर्यायी मार्गांचा वापर करावा, असे आदेश जिल्हाधिकारी जितेंद्र डुडी यांनी दिले आहेत.