“बाप नावाचं आभाळ उलगडताना…” वडगाव निंबाळकरमध्ये अश्रूंचा बांध फुटला! ​पाषाणालाही पाझर फोडणारा ‘संस्कार सोहळा’; वसंत हंकारे सरांचे शब्द ऐकून प्रत्येकाचे डोळे पाणावले

​वडगाव निंबाळकर :”बाप म्हणजे काय असतो? वरून नारळासारखा कठोर, पण आतून ओल्या गऱ्यासारखा गोड… स्वतःच्या पायाला भेगा पडलेल्या असतानाही मुलाच्या पायात बूट घालणारा आणि स्वतःच फाळकं सदरा घालून मुलाला नवीन कपडे घेणारा तो बाप असतो…”

​वसंत हंकारे सरांचे हे शब्द कानावर पडले आणि वडगाव निंबाळकर येथील स्वातंत्र्य विद्यामंदिराच्या पटांगणात एकच शांतता पसरली. क्षणभर थांबून पुन्हा शब्दांची पेरणी झाली आणि उपस्थितांच्या काळजाचा बांध फुटला. निमित्त होते, तुकाईमाता युवक मंडळाने आयोजित केलेल्या ‘बाप समजून घेताना’ या विषयावरील व्याख्यानाचे!

​शुक्रवारी (दि. ५) दत्त जयंतीच्या मुहूर्तावर आयोजित हा कार्यक्रम केवळ एक व्याख्यान न राहता, तो एक ‘भावूक संस्कार सोहळा’ ठरला.

​रक्ताचं पाणी आणि व्यसनांची राखरांगोळी

तरुणाईच्या डोळ्यात अंजन घालताना हंकारे सर कडाडले, “अरे, तुमचे आई-बाप काळ्या आईच्या कुशीत राबतात. उन्हातान्हात हाडाची काडं आणि रक्ताचं पाणी करून पै-पै जमवतात. आणि तुम्ही? तुम्ही व्यसनाच्या आहारी जाऊन त्या कष्टाच्या पैशाची राखरांगोळी करता? जेव्हा व्यसनामुळे शरीर सडतं आणि दवाखान्यात बापाचा कष्टाचा पैसा पाण्यासारखा जातो, तेव्हा त्या बापाच्या डोळ्यातील वेदना कधी वाचल्यात का?” हे ऐकताना उपस्थित तरुणांच्या माना शरमेने झुकल्या होत्या.

​”लेकींनो, उंबरठा ओलांडताना…”

मुलींना मार्गदर्शन करताना सरांचा स्वर अधिकच गंभीर झाला. ते म्हणाले, “क्षणिक आकर्षणापायी, खोट्या प्रेमाच्या जाळ्यात अडकून असा कोणताही निर्णय घेऊ नका, ज्यामुळे जन्म देणाऱ्या आई-बापाची मान समाजासमोर खाली जाईल. पोलीस ठाण्याची पायरी चढण्याची वेळ आपल्या पालकांवर येऊ नये, हेच खरे लेकीचे कर्तव्य आहे.”

व्याख्यान जसजसे रंगात आले, तसतसे वातावरण भारावून गेले. बाप नावाच्या, कधीही न रडणाऱ्या माणसाचे दुःख जेव्हा हंकारे सरांनी मांडले, तेव्हा समोर बसलेले विद्यार्थी, महिला भगिनी आणि अगदी पुरुषही स्वतःचे अश्रू रोखू शकले नाहीत. अनेकजण हुंदके देऊन रडताना दिसत होते. उपस्थितांनी जणू यावेळी आपल्या आई-वडिलांना मनापासून समजून घेण्याची शपथच घेतली.

या हृदयस्पर्शी कार्यक्रमाचे आयोजन तुकाईमाता युवक मंडळ, वडगाव निंबाळकर यांनी केले होते. कार्यक्रमास सहाय्यक पोलीस निरीक्षक नागनाथजी पाटील, प्राचार्य हेमंत तांबे, राजेंद्र निंबाळकर, अमृत भाऊ दरेकर, आणि शिव काका प्रतिष्ठानचे स्वप्निल कारंडे यांची प्रमुख उपस्थिती होती.

​हा कार्यक्रम संपला, पण “बाप” नावाचा विचार प्रत्येकाच्या मनात कायमचा कोरला गेला!