वडगाव निंबाळकरच्या ‘शिवांजली’ची BSF मध्ये गरुडझेप; संघर्षातून यशाचे शिखर; लेकीच्या यशाने बापाचा ऊर भरून आला!

वडगाव निंबाळकर : परिस्थितीवर मात करत जिद्द आणि चिकाटीच्या जोरावर शिवांजलीने ‘सीमा सुरक्षा बल’ (BSF) मध्ये भरती होत यश संपादन केले आहे. तिच्या या यशामुळे केवळ तिच्या कुटुंबाचेच नव्हे, तर संपूर्ण गावाची मान अभिमानाने उंचावली आहे. या यशाचा आनंद साजरा करताना तिच्या वडिलांना अश्रू अनावर झाले, हा प्रसंग मनाला स्पर्श करून गेला.

शिवांजली चा हा प्रवास अत्यंत प्रेरणादायी आहे. अत्यंत सामान्य कुटुंबात जन्मलेल्या शिवांजलीने शिक्षणाचे महत्त्व ओळखून लहानपणापासूनच अभ्यासात सातत्य ठेवले. घरची परिस्थिती बेताची असतानाही तिने हार मानली नाही. अभ्यासासाठी आवश्यक साधनांची कमतरता असतानाही, तिने केवळ आपल्या ध्येयावर लक्ष केंद्रित केले. दिवसाचे अनेक तास अभ्यास करून आणि संयम ठेवून तिने हे यश मिळवले आहे. तिच्या या प्रवासात तिला तिच्या आई-वडिलांनी खंबीर साथ दिली.

परिस्थितीवर मात करत, अपयशाला न घाबरता जिद्द आणि चिकाटीच्या जोरावर वडगाव निंबाळकर येथील शिवांजली शंकर चव्हाण हिने एसएससी जीडी (SSC GD) परीक्षेत घवघवीत यश संपादन करत ‘सीमा सुरक्षा बल’ (BSF) मध्ये आपले स्थान निश्चित केले आहे. ती सध्या एस.वाय.बी.ए. (SYBA) मध्ये शिक्षण घेत असतानाच तिने हे यश मिळवून केवळ आपल्या कुटुंबाचेच नव्हे, तर संपूर्ण गावाचे नाव अभिमानाने उंचावले आहे. या यशाचा आनंद साजरा करताना तिच्या वडिलांना अश्रू अनावर झाले, हा प्रसंग खरंतर प्रत्येकाच्याच मनाला स्पर्श करून गेला.

शाळेच्या मैदानापासून सीमेपर्यंतचा शिवांजलीचा प्रवास एक संघर्षगाथा

शिवांजलीचा हा प्रवास अत्यंत प्रेरणादायी आहे. अत्यंत सामान्य कुटुंबात जन्मलेल्या शिवांजलीचे पहिली ते पाचवीपर्यंतचे शिक्षण अतिशय दुर्गम अशा डोंगरी भागात दत्तनगर वेनवडी (ता. भोर) येथे झाले. पुढील शिक्षण (५वी ते १०वी) तिने वडगाव निंबाळकर येथील स्वातंत्र्य विद्या मंदिरात पूर्ण केले. सध्या ती मु. सा. काकडे महाविद्यालयात SYBA च्या वर्षात शिकत आहे. तिला लहानपणापासूनच पोलीस दलात जाण्याचे स्वप्न होते आणि खेळाचीही विशेष आवड होती.

शिवांजलीने २०२४ मध्ये पोलीस भरतीसाठी प्रयत्न केला होता. मात्र, केवळ स्व-अभ्यास (Self-study) करत असल्याने तिला त्यावेळी यश आले नाही. पण या अपयशाने ती खचून गेली नाही. तिने जिद्दीने करिअर अकॅडमीत प्रवेश घेतला आणि तिथेच तिच्या आयुष्याला नवी दिशा मिळाली.

अकॅडमीमध्ये तिला मोलाचे प्रोत्साहन मिळाले. त्यांनीच तिला SSC GD परीक्षेबद्दल माहिती दिली व मार्गदर्शन केले. दीड वर्ष सतत अभ्यास करून तिने फेब्रुवारीमध्ये ऑनलाइन परीक्षा दिली.

शिवांजली सुरुवातीला मैदानी सरावात थोडी कमकुवत होती. मात्र, तिने स्वतःचा आत्मविश्वास वाढवला. “तू हे करू शकतेस आणि तुला हे करायचेच आहे,” या प्रेरणेमुळे तिच्या मैदानातील सराव सुधारला. मुलींसाठी असलेल्या १६०० मीटर धावण्याचे (८.३० मिनिटे वेळ) आव्हान तिने लिलया पेलले. सप्टेंबरमध्ये तिने ग्राउंड पास केले, त्यानंतर मेडिकल आणि अखेर तिची अंतिम निवड झाली.

या प्रवासात शिवांजलीला तिच्या आई-वडिलांची खंबीर साथ मिळाली. घरची परिस्थिती बेताची असतानाही वडिलांनी तिला कधीच कशाची कमतरता भासू दिली नाही. शिवांजली सांगते, “माझ्यावर विश्वास ठेवून वडिलांनी मला बाहेरगावी अकॅडमीत पाठवले. समाजातील आणि नात्यातील काही लोकांनी नावे ठेवली, पण वडिलांनी त्यांच्याकडे दुर्लक्ष करत मला खंबीर पाठिंबा दिला. आज त्यांचे स्वप्न पूर्ण झाल्याचे समाधान आहे.”

हा संघर्ष एकटीचा नव्हता. जेव्हा जेव्हा शिवांजली खचली किंवा निराश झाली, तेव्हा तिची मैत्रीण संजना हिने तिला मोठा मानसिक दिलासा दिला. शिवांजलीने आपल्या यशाचे श्रेय तिची मैत्रीण संजना व अकॅडमीच्या संपूर्ण टीमला दिले आहे.

मुलीच्या यशाबद्दल बोलताना वडील भावूक झाले होते. आनंदश्रूंनी भरलेल्या डोळ्यांनी ते म्हणाले, “आम्ही काबाडकष्ट केले, पण पोरीला शिक्षणात कधी कमी पडू दिलं नाही. आज तिने केलेल्या कष्टाचं चीज झालं आहे. तिचं हे यश पाहून आज जीवनाचं सोनं झाल्यासारखं वाटत आहे.”

घरच्या परिस्थितीची कधीही जाणीव करू न देता माझ्या वडिलांनी मला प्रोत्साहन दिले तसेच कधीच कोणत्याही गोष्टीची मला कमी पडू दिली नाही. माझ्यावर विश्वास ठेऊन मला बाहेर अकॅडमी मध्ये पाठवले समाजातील किंवा नात्यांमधील काही लोकांनी नावे ठेवली तरी त्यांचा विचार न करता माझ्या वडीलांनी मला खंबीर पाठिंबा दिला. आणि मी आज त्यांच स्वप्न पूर्ण केलं. आई वडिलांच्या आशिर्वादाने माझे आयुष्य घडले आहे घडत आहे आणि त्यांच्याच मुळे मी हे यशाचं शिखर गाठलं आहे अशी मोकळी भावना यावेळी शिवांजलीने व्यक्त केली.

शिवांजलीचे हे यश ग्रामीण भागातील सर्व प्रकारच्या पोलीस भरती,आर्मी तसेच विविध परीक्षेची तयारी करणाऱ्या हजारो विद्यार्थी-विद्यार्थिनींसाठी एक आदर्श आहे. “परिस्थिती कोणतीही असो, मेहनत करण्याची तयारी असेल तर यश नक्की मिळते,” असा संदेश तिने आपल्या यशातून दिला आहे.

आपल्या यशातून शिवांजलीने ग्रामीण भागातील पालकांना एक महत्त्वाचा संदेश दिला आहे: “आजकाल थोडे शिक्षण झाले की मुलींची लग्ने लावून दिली जातात. पालकांनी असे न करता आपल्या मुलींना पुढे शिकू द्यावे आणि त्यांच्या पाठीशी खंबीरपणे उभे राहावे.”

शिवांजलीच्या या निवडीनंतर परिसरातून तिच्यावर अभिनंदनाचा वर्षाव होत असून, तिचा हा प्रवास येणाऱ्या अनेक विद्यार्थी विद्यार्थिनींसाठी आदर्श ठरला आहे.