‘महाराष्ट्र पोलीस कारनामा’च्या बातमीचा दणका! वडगाव निंबाळकर बस स्थानक झाले प्रकाशमान; प्रवाशांचा जीव भांड्यात

​वडगाव निंबाळकर : येथील बस स्थानकात पसरलेले अंधाराचे साम्राज्य आणि प्रवाशांच्या सुरक्षेचा गंभीर प्रश्न ‘महाराष्ट्र पोलीस कारनामा’ (MPK NEWS) ने चव्हाट्यावर आणताच प्रशासनाला जाग आली आहे. या बातमीची आणि स्थानिक नागरिक ऋषिकेश जगताप यांच्या तक्रारीची तात्काळ गंभीर दखल घेत बारामती आगार प्रमुखांनी आणि वडगांव निंबाळकर सरपंचांनी बस स्थानकात विद्युत व्यवस्था केली असून, बसेस स्थानकात येण्यासाठी सुरक्षा रक्षकाची नेमणूक करण्यात आली आहे.

काही दिवसांपूर्वीच वडगाव निंबाळकर येथील बस स्थानक हे केवळ ‘शोभेची वास्तू’ बनले असल्याची बातमी प्रसिद्ध झाली होती. रात्रीच्या वेळी येथे मिट्ट काळोख असल्याने मद्यपींचा आणि टवाळखोरांचा सुळसुळाट वाढला होता. यामुळे महिला व विद्यार्थ्यांची मोठी कुचंबणा होत होती. तसेच बसेस स्थानकात न येता बाहेरूनच जात होत्या.

​मात्र, आता चित्र पालटले आहे. ‘महाराष्ट्र पोलीस कारनामा’ने ही समस्या मांडताच प्रशासकीय चक्रे वेगाने फिरली व विद्युत व्यवस्था करण्यात आली,जरी ग्रामस्थांनी हायमास्ट दिव्याची मागणी केली असली, तरी प्रशासनाने तात्काळ दोन लाईटची सोय करून परिसर प्रकाशमान केला आहे. यामुळे रात्रीच्या वेळी प्रवाशांना होणारा त्रास कमी झाला आहे.

तसेच बसेस स्थानकात येतात की नाही, यावर लक्ष ठेवण्यासाठी एका सुरक्षा रक्षकाची नेमणूक करण्यात आली आहे. हा रक्षक बसेसच्या येण्या-जाण्याच्या नोंदी घेऊन आगार प्रमुखांना अहवाल देत आहे. यामुळे आता एसटी बसेस स्थानकात येऊ लागल्या आहेत.

याबाबत स्थानिक जागरूक नागरिक ऋषिकेश जगताप यांनी आगार प्रमुखांकडे सातत्याने पाठपुरावा केला होता. त्यांच्या मागणीला आणि MPK News च्या बातमीला प्रतिसाद देत, वडगाव निंबाळकरचे सरपंच सुनील ढोले आणि बारामती एसटी आगाराचे आगार प्रमुख यांनी अत्यंत तत्परता दाखवून हे काम पूर्ण केले.

​गावातील प्रवाशांची आणि महिलांची होणारी गैरसोय दूर केल्याबद्दल ग्रामस्थांनी सरपंच आणि आगार व्यवस्थापनाचे आभार मानले आहेत.