बारामतीत पुन्हा ‘दादां’चाच नाद!  सचिन सातव नगराध्यक्षपदी विजयी;  मात्र ५ जागांवर धक्कादायक निकाल,  ‘जायंट किलर’ ठरले यशपाल पोटे!

बारामती: संपूर्ण राज्याचे लक्ष लागून राहिलेल्या बारामती नगरपरिषद सार्वत्रिक निवडणुकीचे निकाल आज जाहीर झाले. बारामतीकरांनी पुन्हा एकदा राज्याचे उपमुख्यमंत्री अजित पवार यांच्या नेतृत्वावर विश्वास दाखवत राष्ट्रवादी काँग्रेसला (अजित पवार गट) स्पष्ट बहुमत दिले आहे. नगराध्यक्षपदी राष्ट्रवादीचे सचिन सदाशिव सातव हे तब्बल ४०,७६६ मते मिळवून प्रचंड बहुमताने विजयी झाले आहेत.

मात्र, हे एकतर्फी यश संपादन करत असतानाच अजित पवार गटाला ५ महत्त्वाच्या जागांवर पराभवाचा सामना करावा लागला आहे. यामध्ये बहुजन समाज पार्टी (BSP), राष्ट्रीय समाज पक्ष (RSP) आणि अपक्षांनी मारलेली मुसंडी ही या निवडणुकीतील सर्वात मोठी चर्चा ठरली आहे.

थेट जनतेतून नगराध्यक्ष निवडीसाठी झालेल्या या लढतीत सचिन सातव यांना बारामतीकरांनी भरभरून मते दिली. त्यांनी आपल्या प्रतिस्पर्ध्यांचा मोठ्या फरकाने पराभव करत नगराध्यक्षपद काबीज केले.

प्रभाग क्रमांक १५ (ब) मधील लढत ही या निवडणुकीतील सर्वात लक्षवेधी लढत ठरली. येथे राष्ट्रवादीचे ज्येष्ठ नेते किरण गुजर यांचे बंधू आणि प्रस्थापित उमेदवार जितेंद्र गुजर यांना अपक्ष उमेदवार यशपाल सुनील पोटे यांनी धूळ चारली. यशपाल पोटे यांना २३१४ मते मिळाली, तर जितेंद्र गुजर यांना १४०५ मतांवर समाधान मानावे लागले. एका सामान्य युवा उमेदवाराने बलाढ्य नेत्याच्या भावाचा पराभव केल्याने पोटे हे या निवडणुकीचे ‘जायंट किलर’ ठरले आहेत.

प्रभाग क्रमांक १४ (अ) मध्ये मोठी उलथापालथ पाहायला मिळाली. येथे राष्ट्रवादीच्या (अजित पवार गट) उमेदवार स्वाती आप्पासाहेब अहिवळे यांचा पराभव करत, बहुजन समाज पार्टीच्या ॲड. संघमित्रा काळुराम चौधरी यांनी विजय मिळवला. संघमित्रा यांना १६१९ मते मिळाली. संघमित्रा या सर्वोच्च न्यायालयात वकिली करतात आणि त्यांचे वडील काळुराम चौधरी हे नगराध्यक्षपदाचे उमेदवार होते, हे विशेष.

प्रभाग क्रमांक १० (अ) मध्ये राष्ट्रवादी काँग्रेसच्या महिला शहराध्यक्षा अनिता गायकवाड यांना पराभवाचा सामना करावा लागला. येथे अपक्ष उमेदवार मनीषा संदीप बनकर यांनी १७३५ मते मिळवून विजय संपादन केला.

रासप: प्रभाग क्रमांक ५ (ब) मध्ये राष्ट्रीय समाज पक्षाच्या वनिता अमोल सातकर यांनी राष्ट्रवादीचे ज्येष्ठ पदाधिकारी प्रताप पागळे यांच्या कन्येचा, ऋतुजा पागळे यांचा पराभव केला. वनिता सातकर यांना २३४८ मते मिळाली.

शरद पवार गट: प्रभाग क्रमांक १३ (अ) मध्ये राष्ट्रवादी काँग्रेस (शरदचंद्र पवार) पक्षाच्या आरती मारुती शेंडगे (गव्हाळे) यांनी १९२४ मते मिळवून विजय मिळवला. ही लढत देखील अत्यंत चुरशीची झाली.

खंडोबानगर प्रभागातील (प्रभाग ९ अ) उमेदवार विशाल भानुदास हिंगणे (राष्ट्रवादी – अजित पवार गट) यांनी १९६० मते मिळवून आपल्या प्रतिस्पर्ध्याचा पराभव केला.

बारामती नगरपरिषद निवडणूक २०२५

विजयी उमेदवारांची सविस्तर यादी

नगराध्यक्ष (थेट जनतेतून निवड)

 सचिन सदाशिव सातव (राष्ट्रवादी काँग्रेस – अजित पवार गट) – ४०,७६६ मते (विक्रमी मतांनी विजयी)

निवडणुकीतील लक्षवेधी व धक्कादायक निकाल (विरोधक व अपक्ष)

या निवडणुकीत राष्ट्रवादी काँग्रेस (अजित पवार गट) चे वर्चस्व राहिले असले तरी, खालील ५ उमेदवारांनी प्रस्थापितांना धक्का देत विजय मिळवला आहे

 * प्रभाग १४ अ: ॲड. संघमित्रा काळुराम चौधरी (बहुजन समाज पार्टी – BSP) – १६१९ मते

 * प्रभाग १३ अ: आरती मारुती शेंडगे-गव्हाळे (राष्ट्रवादी काँग्रेस – शरदचंद्र पवार गट) – १९२४ मते

 * प्रभाग ५ ब: वनिता अमोल सातकर (राष्ट्रीय समाज पक्ष – रासप) – २३४८ मते

 * प्रभाग १५ ब: यशपाल सुनिल पोटे (अपक्ष – जायंट किलर) – २३१४ मते

 * प्रभाग १० अ: मनीषा संदीप बनकर (अपक्ष) – १७३५ मते

 * प्रभाग २० अ: निलेश भारत इंगुले (अपक्ष) – २३०२ मते

राष्ट्रवादी काँग्रेस (अजित पवार गट) विजयी उमेदवार (प्रभागनिहाय)

बहुतांश प्रभागांमध्ये ‘दादां’च्या शिलेदारांनी बाजी मारली आहे. त्यांची यादी खालीलप्रमाणे

 * प्रभाग १ अ: अविनाश हनुमंत निकाळजे (२३७६ मते)

 * प्रभाग १ ब: मनिषा समीर चव्हाण (२३५० मते)

 * प्रभाग २ ब: जय नानासो पाटील (१७३४ मते)

 * प्रभाग ३ अ: प्रवीण दत्तू माने (१५५४ मते)

 * प्रभाग ३ ब: रुपाली नवनाथ मलगुंडे (२००३ मते)

 * प्रभाग ४ अ: संपदा सुमित चौधर (२२२१ मते)

 * प्रभाग ४ ब: विष्णू तुळशीराम चौधर (१३७९ मते)

 * प्रभाग ७ अ: प्रसाद भगवान खारतुडे (९९९ मते)

 * प्रभाग ७ ब: भारती विश्वास शेळके (१०६५ मते)

 * प्रभाग ८ ब: अमर बाळासाहेब धुमाळ (२२३४ मते)

 * प्रभाग ९ अ: विशाल भानुदास हिंगणे (१९६० मते)

 * प्रभाग ९ ब: पूनम ज्योतीबा चव्हाण (२८८१ मते)

 * प्रभाग १० ब: जयसिंग अशोक काटे देशमुख (२२५८ मते)

 * प्रभाग ११ अ: सविता सुजित जाधव (२१६७ मते)

 * प्रभाग ११ ब: संजय वालचंद संघवी (१८३७ मते)

 * प्रभाग १२ अ: सारिका अमोल वाघमारे (१६४१ मते)

 * प्रभाग १२ ब: अभिजीत यशवंत चव्हाण (१७८१ मते)

 * प्रभाग १३ ब: बिरजू भाऊसाहेब मांढरे (१८६४ मते)

 * प्रभाग १४ ब: नवनाथ सदाशिव बल्लाळ (१५२२ मते)

 * प्रभाग १५ अ: मंगल जयप्रकाश किर्वे (२७१३ मते)

 * प्रभाग १६ अ: गोरख ज्ञानदेव पारसे (३८७७ मते)

 * प्रभाग १६ ब: मंगल शिवाजीराव जगताप (३४६४ मते)

 * प्रभाग १७ अ: सय्यद अलताब हैदर (१६२७ मते)

 * प्रभाग १८ अ: राजेंद्र बाबुराव सोनवणे (२९६७ मते)

 * प्रभाग १९ अ: प्रतिभा विजय खरात (२७३७ मते)

 * प्रभाग १९ ब: सुनिल दादासाहेब सस्ते (१८६९ मते)

 * प्रभाग २० क: दर्शना विक्रांत तांबे (३७४५ मते)

या निकालांव्यतिरिक्त ८ जागा बिनविरोध झाल्या आहेत.

बारामती नगरपरिषदेवर पुन्हा एकदा अजित पवारांचे वर्चस्व सिद्ध झाले असले तरी, मतदारांनी काही प्रभागांमध्ये भाकरी फिरवली आहे. प्रस्थापितांना नाकारत उच्चशिक्षित (ॲड. संघमित्रा चौधरी) आणि सामान्य घरातील (यशपाल पोटे) उमेदवारांना दिलेली संधी ही या निवडणुकीची जमेची बाजू ठरली आहे.