धार्मिक तेढ निर्माण करणारे स्टेटस किंवा मजकूर सोशल मिडीयावर ठेवाल तर कडक कारवाई, बारामती शहरात एकावर गुन्हा दाखल – अप्पर पोलीस अधिक्षक बारामती,श्री.गणेश बिरादार

बारामती :  एका इसमाने आपल्या व्हाट्सअप स्टेटस वर औरंगजेबाचा फोटो ठेवून त्यावर धार्मिक तेढ निर्माण होईल असा आक्षेपार्ह मजकूर ठेवला आहे.अशी माहिती दिनांक ०२/०३/२०२५ रोजी बारामती शहर पोलीस ठाण्यात मिळाली होती,

मिळालेल्या माहितीच्या अनुषंगाने लागलीच त्या इसमास बारामती पोलीसांच्या मार्फत ताब्यात घेऊन त्याच्या मोबाईलची तपासणी केली असता त्यावर मिळालेल्या माहितीच्या अनुसार औरंगजेबाचे उदात्तीकरण करणारा फोटो व आक्षेपार्ह मजकूर मिळून आला.

या इसमाच्या कृत्यामुळे धार्मिक तेड निर्माण होऊन बारामती शहर हद्दीत कायदा व सुव्यवस्थेचा प्रश्न निर्माण होऊ नये याकरिता बारामती शहर पोलीस ठाण्याचे प्रभारी अधिकारी,पोलीस निरीक्षक, श्री.विलास नाळे, यांनी त्याचे विरुद्ध भारतीय नागरिक सुरक्षा संहिता कलम १२७ प्रमाणे प्रस्ताव तयार करून तो बारामतीचे विशेष कार्यकारी दंडाधिकारी तथा अप्पर पोलीस अधीक्षक श्री.गणेश बिरादार यांना सादर केला असता यावर सुनावणी घेऊन या इसमाची कृती ही धार्मिक तेढ निर्माण करणारी असल्याची खात्री झाल्याने, प्रतिबंधक उपाययोजना म्हणून, त्याने योग्य व लायक जामिनदार न दिल्याने त्याची १४ दिवसांकरीता येरवडा मध्यवर्ती कारागृह पुणे येथे रवानगी करण्यात आली आहे.

बारामती शहर पोलीस स्टेशनकडून बारामती शहरातील वेगवेगळ्या सोशल मीडिया साइडवर, तसेच नागरिक ठेवत असलेल्या व्हाट्सअप  स्टेटसवर बारकाईने लक्ष ठेवण्यात येत असून त्या माध्यमातून कोणत्याही धर्मा विरुद्ध तेढ निर्माण करणाऱ्या इसमांवर यापुढे देखील उचित व कडक कायदेशीर कारवाई करण्यात येणार आहे.

असा इशारा बारामती पोलिसांच्या वतीने देण्यात आला आहे.

सध्या छत्रपती संभाजी महाराज बलिदान मास तसेच मुस्लीम बांधवांचा पवित्र रमजान मास चालु असून आगामी काळात हिंदू व मुस्लिम समाजाचे उत्सव येणार आहेत या उत्सवांच्या अनुषंगाने कोणत्याही प्रकारचे आक्षेपार्ह  स्टेटस किंवा अफवा पसरवणाऱ्या मजकुराचा संदेश कोणत्याही धर्माच्या इसमाने कोणत्याही धर्मा विरुद्ध सोशल मीडियावर शेअर करू नये असेही आवाहन नागरीकांना करण्यात आले आहे.

हि कारवाई पोलीस अधीक्षक, पुणे ग्रामिण श्री.पंकज देशमुख सो. मा.अपर पोलीस अधीक्षक बारामती, श्री.गणेश बिरादार सो, मा. उपविभागीय पोलीस अधिकारी बारामती श्री. सुदर्शन राठोड सो. यांचे मार्गदर्शनाखाली बारामती शहर पोलीस स्टेशनचे पोलीस अधिकारी व पोलीस अंमलदार यांनी केली आहे.