हायवाचा धक्का मृत्यू पक्का ! बारामती शहरात पुन्हा अपघात, सायकल घेऊन पायी जाणाऱ्या वृद्धाचा जागीच मृत्यू .

बारामती: दि. 29/09/2025 रोजी दुपारी 12/20 वाजण्याच्या सुमारास फलटण चौक ते कसब्याकडे जाणाऱ्या रस्त्यावर एका हायवा (टिपर) हे अवजड वाहन रस्त्यावरून हातामध्ये सायकल धरून पायी चालत जाणाऱ्या एका 70 वर्षीय वृद्धाच्या मृत्यूस कारणीभूत ठरले असल्याची दुर्दैवी घटना घडली.

पोलिसांकडून मिळालेल्या माहितीनुसार आज दुपारी 12/20 वाजण्याच्या सुमारास फलटण चौक ते कसब्याकडे जाणाऱ्या रस्त्यावर फलटण चौक येथे मारूती उमाजी पारसे वय 70 वर्षे रा.आनंदनगर, गवारेफाटा,फलटण रोड ता.बारामती जि पुणे हे आपली सायकल हातामध्ये धरून पायी चालत जात असताना हायवा क्रमांक MH 12 SX 4750 वरील चालक राजनारायण बलजीत सिंह वय 45 वर्षे रा.चवदौर,चकडौर सीधी,राज्य-मध्यप्रदेश याने त्याच्या ताब्यातील हायवा हे अवजड वाहन हयगयीने,अविचाराने व रहादारीच्या नियमांकडे दुर्लक्ष करून भरधाव वेगात चालवून मारूती उमाजी पारसे वय 70 वर्षे यांना शरीरावर ठीकठिकाणी किरकोळ व गंभीर दुखापती करून त्याचे मृत्यूस कारणीभूत झाला.

या अपघातातील हायवा टिपर हे वाहन शेळके कन्स्ट्रक्शनचे असल्याचे समजत आहे.

याबाबत मयत यांचा मुलगा सतीश मारूती पारसे, रा. आनंदनगर,गवारे फाटा, फलटण रोड, ता बारामती,यांनी बारामती शहर पोलीस ठाण्यात फिर्याद दाखल केली आहे. दाखल फिर्यादीवरून हायवा टिपर क्रमांक MH 12 SX 4750 वरील चालक राजनारायण बलजीत सिंह याचेविरुद्ध बारामती शहर पोलीस ठाण्यात गुन्हा दाखल करण्यात आला आहे.

पुढील तपास बारामती शहर पोलीस ठाण्याचे पोलीस निरीक्षक,विलास नाळे यांच्या मार्गदर्शनाखाली पोलिस अंमलदार,आप्पासाहेब करे हे करीत आहेत.

दुपारी हायवा टिपर खाली वृद्धास चिरडले गेल्याने परिसरात खळबळ उडाली व यावेळी स्थानिक नागरिकांचा संताप पहायला मिळाला,अपघातानंतर नागरिकांकडून हायवा टिपरवर दगडफेक करण्यात आली तसेच फलटण चौक परिसरात काही नागरिकांनी हायवा डंपर चालकांवर कठोर कारवाई करण्याची मागणी करत तीव्र आक्रोश व्यक्त केला. 

दरम्यान बारामती शहरातील विविध संघटनांच्या पदाधिकाऱ्यांनी व संतप्त नागरिकांनी थेट रस्त्यावर उतरत रास्ता रोको आंदोलन केले. 

यावेळी बारामती पोलिस आणि प्रशासनावर बारामती शहरातील अवजड वाहतुकीबद्दल दुर्लक्ष होत असल्याचा आरोप करण्यात आला.अपघातानंतर काही दिवस कारवाई होते,पण नंतर दुर्लक्ष केले जाते असं म्हणत नागरिकांनी आपला संताप व्यक्त केला आहे.

यावेळी काळूराम चौधरी यांनी सांगितले की बारामती शहरात अवजड वाहतुकीसाठी नियमावली तयार करण्यात आली होती त्यानुसार वाहतूक होत नाही परिणामी अपघात होत आहेत, हि वाहतूक नियमावली कोणी व का रद्द केली रद्द करत असताना बारामती करांना विचारात घेतले का? असा सवालही त्यांनी उपस्थित केला, वाहतूक नियमावली रद्द करण्यास ज्या ज्या संघटना व जे जे लोक होते त्यांच्यावर गुन्हा दाखल व्हावा अशी त्यांनी या वेळी मागणी केली.

दरम्यान आजच अपघाताच्या अनुषंगाने बारामतीकर नागरिकांच्या वतीने

मा. जिल्हाधिकारी,पुणे

मा. उपविभागीय अधिकारी, बारामती

मा. तहसीलदार, बारामती

मा. उपविभागीय पोलीस

अधिकारी, उपविभाग बारामती

मा. प्रादेशिक परिवहन अधिकारी,बारामती

मा. पोलिस निरीक्षक,बारामती शहर

यांना निवेदन देण्यात आले असून उद्या दिनांक 30/09/2025 रोजी सकाळी 11.00 वाजता विशाल मोर्चा व आंदोलन करण्यात येणार आहे.

मोर्चाचे ठिकाण विश्वरत्न डॉ बाबासाहेब आंबेडकर पुतळा स्मारका पासून ते उपविभागीय अधिकारी कार्यालय, बारामती असे असेल.

बारामती शहरातील रस्त्यावरून बेदरकारपणे धडधडणारे अवजड डंपर,टिपर या अवजड वाहनांमुळे वारंवार निष्पाप नागरिकांचे जीव जात आहेत.

त्या साठी जनतेला आवाहन करण्यात आले आहे की बारामतीकर नागरिक, युवक-युवती, महिला, ज्येष्ठ नागरिकांनी या जनआंदोलनात सहभागी व्हावे,

आपला हक्क आणि जीविताच्या सुरक्षेसाठी एकजुटीने आवाज उठवावा असे सर्व बारामतीकर नागरिकांना आवाहन करण्यात आले आहे.