गुन्हेगारीब्रेकिंगमहाराष्ट्रसकारात्मक बातमी
‘मी बारामतीचा डॉन आहे…’ उद्योजकाची झोप उडवणारा ‘तो’ तिसरा खंडणीखोर अखेर गजाआड! हप्ता दे, नाहीतर हातपाय तोडीन; बारामती एमआयडीसीत दहशत माजवणारी त्रिकुट पोलिसांच्या जाळ्यात
0
5
4
4
2
8
बारामती : कष्टाने व्यवसाय उभा करायचा, रात्रंदिवस मेहनत करायची आणि अचानक कोणीतरी स्वतःला ‘डॉन’ म्हणवून समोर यायचं… “धंदा करायचा असेल तर हप्ता द्यावा लागेल,” अशी धमकी द्यायची. बारामती एमआयडीसीतील (Baramati MIDC) एका उद्योजकावर गेल्या काही महिन्यांपासून हे संकट ओढवले होते. दारूच्या पार्ट्या, रोख रकमा आणि जिवाचा थरकाप उडवणाऱ्या धमक्या… या जाचामुळे त्रस्त झालेल्या उद्योजकाची सुटका अखेर बारामती तालुका पोलिसांनी केली असून, वारंवार खंडणी उकळणाऱ्या टोळीतील तिसऱ्या फरार आरोपीच्या मुसक्या आवळल्या आहेत.
आता अटक केलेला आरोपी भूषण रणसिंग असे त्याचे नाव आहे.
कटफळ (ता. बारामती) येथे एका उद्योजकाचा शेती अवजारे बनवण्याचा कारखाना आहे. आपला व्यवसाय सांभाळून ते शांततेत काम करत होते. मात्र, ऑक्टोबर २०२४ मध्ये त्यांच्या आयुष्यातील शांतता भंग पावली. निरज रॉय, शुभम मोरे आणि भूषण रणसिंगे या तिघांनी या उद्योजकावर लक्ष केले. “आम्ही बारामतीचे डॉन आहोत,” अशी बतावणी करत त्यांनी उद्योजकावर दबाव टाकण्यास सुरुवात केली.
सुरुवातीला या टोळीने उद्योजकाला बारामतीतील विविध हॉटेल्समध्ये बोलावून जबरदस्तीने दारूचे बिल भरण्यास भाग पाडले. ही फक्त सुरुवात होती. एप्रिल २०२५ पासून त्यांची हिंमत आणखी वाढली. “तुला जर इथे कंपनी चालवायची असेल, तर आम्हाला महिन्याला हप्ता द्यावाच लागेल, नाहीतर तुला बारामतीत राहू देणार नाही,” अशा शब्दांत त्यांनी थेट धमक्या देण्यास सुरुवात केली.
खंडणीखोरांचा उपद्रव दिवसेंदिवस वाढतच होता. कधी ४ हजार, तर कधी १० हजार अशी मागणी करत त्यांनी उद्योजकाची आर्थिक पिळवणूक सुरूच ठेवली. ऑक्टोबर २०२५ मध्ये पेन्सिल चौक परिसरात या टोळीने कहर केला. उद्योजकाला भररस्त्यात अडवून, “दारूचे बिल भर, नाहीतर तुझे हातपाय मोडीन,” अशी धमकी देत मारहाण केली.
इतकेच नव्हे तर, वंजारवाडी परिसरात या गुंडांनी उद्योजकाकडून जबरदस्तीने २० हजार रुपये ऑनलाईन ट्रान्सफर करून घेतले. विशेष म्हणजे, दहशतीखाली असलेल्या उद्योजकाचा त्यांनी एक व्हिडिओ देखील रेकॉर्ड केला, जेणेकरून भविष्यात त्यांना ब्लॅकमेल करता येईल. १८ ऑक्टोबर रोजी रात्री अमरदीप हॉटेलजवळ पुन्हा १३ हजार रुपयांच्या मागणीसाठी मारहाण करण्याचा प्रयत्न झाला. या संपूर्ण काळात या त्रिकुटाने तब्बल ८५ हजार रुपयांची खंडणी वसूल केली होती.
सततच्या त्रासाला आणि जिवाच्या भीतीला कंटाळून अखेर उद्योजकाने धाडस दाखवत बारामती तालुका पोलीस ठाण्यात धाव घेतली. पोलिसांनी या प्रकरणाचे गांभीर्य ओळखले. पोलीस निरीक्षक चंद्रशेखर यादव यांनी तात्काळ तपासाची चक्रे फिरवली. या गुन्ह्यातील दोन आरोपींना यापूर्वीच अटक करण्यात आली होती, मात्र तिसरा साथीदार पोलिसांना चकवा देत फरार होता.
बारामती तालुका पोलिसांना गुप्त माहिती मिळाली की, गुन्ह्यातील फरार असलेला तिसरा आरोपी एमआयडीसी परिसरात येणार आहे. पोलिसांनी सापळा रचला आणि त्याला शिताफीने अटक केली. न्यायालयाने त्याला तीन दिवसांची पोलीस कोठडी सुनावली आहे.
ही धडाकेबाज कामगिरी पुणे ग्रामीणचे पोलीस अधीक्षक संदीपसिंह गिल्ल, अप्पर पोलीस अधीक्षक गणेश बिरादार, उपविभागीय पोलीस अधिकारी सुदर्शन राठोड यांच्या मार्गदर्शनाखाली पोलीस निरीक्षक चंद्रशेखर यादव, पोलीस उपनिरीक्षक युवराज पाटील, धनश्री भगत, मनोज पवार, राजू बन्ने, ओंकार भोसले, भारतीय खंडागळे आणि रेणुका पवार यांच्या पथकाने केली.
पोलिसांच्या या कारवाईमुळे बारामती एमआयडीसी परिसरात दहशत माजवू पाहणाऱ्या गुन्हेगारी प्रवृत्तींना जरब बसली असून, उद्योजकांनी सुटकेचा निःश्वास सोडला आहे.
पुढील तपास बारामती तालुका पोलीस करत आहेत.
