डोर्लेवाडीत संत तुकाराम महाराज बीज सोहळा उत्साहात; ५० हजार भाविकांची उपस्थिती

बारामती: जगद्गुरु संत तुकाराम महाराज यांच्या वैकुंठगमन सोहळ्यानिमित्त (तुकाराम बीज) बारामती तालुक्यातील डोर्लेवाडी येथे ६७ व्या अखंड हरिनाम सप्ताहाचे आणि बीज उत्सवाचे अत्यंत भक्तिमय वातावरणात आयोजन करण्यात आले होते. या सोहळ्यासाठी पुणे, सोलापूर आणि सातारा जिल्ह्यांतून ५० हजारांहून अधिक भाविकांनी उपस्थिती लावून दर्शनाचा लाभ घेतला.

देवस्थान समिती व सांप्रदायिक भजनी मंडळाच्या वतीने आयोजित या सप्ताहात शैला महाराज यादव व बाळासाहेब नाळे महाराज यांच्या मार्गदर्शनाखाली टाळ-मृदंगाच्या गजरात भव्य गाथा पारायण संपन्न झाले. सप्ताहादरम्यान भागवत शिंदे, शांताबाई बोराटे, माऊली नवले, राजेंद्र कंडरे, दत्तात्रय घुले, विजय शेंडे आणि शैला यादव यांची अभ्यासपूर्ण प्रवचने झाली.

कीर्तन महोत्सवात महाराष्ट्रातील नामवंत कीर्तनकार शरद महाराज काळे, रोहिदास महाराज शास्त्री, सुनील महाराज निवंगुणे, समाधान महाराज पगार, एकनाथ महाराज गोळेसर आणि जयंत महाराज गोसावी यांनी आपल्या रसाळ कीर्तनातून समाजप्रबोधन केले.

आज पहाटे मंदिरात आकर्षक फुलांची सजावट करण्यात आली होती. पहाटेच्या महाभिषेकानंतर बाळासाहेब महाराज नाळे यांचे प्रवचन झाले. त्यानंतर लक्ष्मण महाराज कोकाटे यांचे ‘बीजेचे कीर्तन’ संपन्न झाले. या कीर्तनात त्यांनी तुकोबारायांच्या वैकुंठगमनाचे भावूक वर्णन केले. दुपारी ठीक १२ वाजता टाळ-मृदंगाचा गजर, गुलाल आणि पुष्पवृष्टी करत भाविकांनी जड अंतःकरणाने बीज सोहळा साजरा केला.

या सोहळ्यादरम्यान स्व.अजितदादा पवार यांना भावपूर्ण श्रद्धांजली अर्पण करण्यात आली. कीर्तनकार लक्ष्मण महाराज कोकाटे आणि सोमनाथ भिले यांनी त्यांच्या स्मृतींना उजाळा देत श्रद्धांजली वाहिली.

दरम्यान भाविकांच्या सुविधेसाठी ग्रामपंचायतीच्या वतीने स्वच्छता, रस्ते दुरुस्ती आणि शुद्ध पिण्याच्या पाण्याची चोख व्यवस्था करण्यात आली होती. आरोग्य केंद्रातर्फे मोफत तपासणी शिबिर राबवण्यात आले, तर वीज मंडळाने अखंड वीज पुरवठा सुनिश्चित केला. सुरक्षेच्या दृष्टीने बारामती शहर पोलीस स्टेशनच्या वतीने चोख बंदोबस्त तैनात करण्यात आला होता.

दुपारी परिसरातील नामवंत गायकांचा भजन कार्यक्रम आणि त्यानंतर निघालेल्या भव्य दिंडी मिरवणुकीने या सोहळ्याची सांगता झाली.